¹ Magera, Keriso raki noni mi oroganu, ama rami berebe visa. ² Da Paulo, daki ia kirogevenu ia ata tene meve uhura siri ragohege, Keriso ra beta ia mage gahigei gevana. ³ Daki goutama ia tohogeima, unuhuna ata iau tene mevebe sirivima, ama dibanagoisa, aka aena uhurahe gera. ⁴ Aka Keriso gasina gera veitera, aka aena vana a misa; aka beta mage eraravara. ⁵ Eige, Horu aena renu gabidadama vagera, noki maguri mage riaga gahera ragoha. ⁶ Keriso Iesu koitatuhe bena ata iau tene meve manu se veitenu, era beta iaga bera, gabidadama renu mage uhurahegera. ⁷ Aka otito magevana aki viege. Unuhuna ai ga ihihi mageve daure gahanu? ⁸ Ai ga ihihive daure goinera beta a ihiromene ge auki oroganu. V 9 Iesti tinabe raki parao bega e raho gahanu. ¹⁰ Daka, ni Rohite, daki riaga gahima aka beta ni nunebe mati kikkivara, unuhuna isuke o moimima auka daureve isukeva mimivara, auna unuhunu? ¹¹ Di sokuhea, dana dagedage gena da ata iau tene meve riagahima, otado be dainehe iau dagedage da daure gaha? Emakavara, Satauro me isuke gahare iaganiva veitera. ¹² A, ogore iabanu a korahigaha, imimi daki vima iauna so iauahu daure uhura siri ragohare. ¹³ Iaka mage e uhurahegera iaki oroganu, di sokuhea. Eduge, ianegu mageemi daure kime, iama bu emi bebe mage gahigeisa. Badivara, aena aubougera, ga kobabe uhurahe gera, "Auma, ai bamode mage gahisa, a ahavahu a mage gahare nagate." ¹⁵ Eduge, ia bebe daure gahi geima, iama orogi mage gahisa, beanegu ia tara geima. ¹⁶ Eduge daki roma, Horu aena rutagera ana ogisa, aka beta daure uhura sirisivara. ¹⁷ Maguri daure vara Horu aena besibe gahime auka, e geregereva Horu aena tage maguri daure besibe gahime auki. Abu rutagera inai uhurahegera, eige aka beta ai meve kikimage gahiga vara. ¹⁸ Eduge, a Horu aena uhurahe goiege, aka beta aena derikehegera. ¹⁹ Guma daure mevera yariri vera, magi renu ata iagia guma daurea, uhu vaidibu, vadibu mevaia. ²⁰ Muni , Idi rahi gahigeva, goto riaga gahigeve, kohu daure kamugeve , isuke uhura via, bebe mama gahiyega, hogahi ga raho se ga berebe ragoha, bebe daure gahigeva, hogahi gabubeauota, bebe kasagei, ²¹ bebe yariri veite, gadiki daure vare, uhurahe hegiri ragohi, guma daure onaki kia. Dakamu subuta aki ronu gaitanagedaki o mati aki roma, ogore iabanu onaki maguri daure o kia, maguri ora beta no idigei Basileiava ni idigei otito magurivara ²² Eduge, Horu aena uhurahegera mage, hegiri , uhu mage, iahe iahe, be be haire, gabidadama ma, ²³ uhu manada, uhu berebe; maguri onavivi uhurahegera, aenavara veitera. ²⁴ Ogere iabana Keriso Iesu ruta, Iau daureve iabara Keriso Iesu hogeraganei, daure e aubougi sebogevenu. ²⁵ No, Horu aena ruat maguri ragohege noma mati au ruta ogisa. ²⁶ No negu, uhu daure uhura maguri ragohime, bebe daure gahigeima ni uhu ananavehe se ni garehe.