¹ Uumo ma ivai bubuido ma orobodoou moiri via nii eraara aai uubiido ma iroroovidiou moiri, mia naanai ova'atiiri rediha ma e'idioumo, ² mereata kes ovai naa biaka, hiavo hoviri aai naa biaka, mia uubiito maraahoi, uubiido mia ge'ebadi oroi'ioiha ma obodii. ³ Nimo epuuha avaavo pine'idioumo via orobodooumo biaka. Nimo tauo pinaraa-- huuraimo kekai pinodaumo via mama naanai pauo pauoi piniai diodioumo. Memiho hi'a oroi'ioida pine'idioumo. Nimo araraibodioi geema hi'a poo'a via kopiha idabuaito modobo biaka. ⁴ Inai Iehova, nimo oroi'ioida inideeai merei via nu uubii ivaabai gi'epu iraramoi, hivio mabui ioohiaida, ⁵ nimo nuuado pinivaabai, miamia naanai inova'atiumoiri biaka, inai nu orovaabai kaukau miai pobodii, Tana Uriioito inivoru'o via oio inidodiai. ⁶ Iehovaro nimo oroi'ioi inimovoi merei Iesu iotiodaida, Tana Uriioi nimo ohuida geema hi'a pahu'eedi, ⁷ ka nimo mia hi'a orododiai modoboi oropoi'o tataha oroi'ioi oo'a vati naanaida nimo paina ii'ai ouka. ⁸ Ihu naa vadei oroha hi'a vadeipika. Mo nioka nioro ihu naanai koriha ma ideeaumo, mabu Iehova orohaito ahooi ioovahoroumoi uubii iraromoi rautu ooi oukaumo mia naanai ova'atiiri. Aa'o naanai miaka via tuunioha uubii orovaabai eidai oukaumo. ⁹ Inai hobou eremaimo aute, aramioi listii dodo mai'i, oromooviumo aute, via bubuiri hiavo eremaimo aute. Ihu naanaida nio orovaabai eveeai bia oukaumo via hobou naanaka. ¹⁰ Nio tuiaito himia himia e'idioi ovohiidio merei wan o tu woniini didimoida ma araibodioi, ¹¹ nio uumo mai'i nu gabo hi'aida tauo peemahe via nu himia memiho orovairi aika. ¹² Mooro Atemasiira e Taitikasiira mereata animotiodaia, hio hi'aito ma ou matidioi Nikopolisito, mabu mo hooboboi ire'iida eidai nouka. ¹³ Nio iraromo evera hi'aiha ma emahibai loiai Senasiire via Apolosiire ma ivaabai mamau moiri, mabu niiti naa ata dodo tana i'ii kaido. ¹⁴ Nimo uubii hivio aamiiaado ma emahiboi mia naana ova'atiiri, naana hi'ai ma oou moiri, mamaa oroi'ioi haado e'idioiri aai naa biaka. ¹⁵ Moo rautu e'idioumo uubii nioido gee'i vadei itioda kaumo. Ka nimoido gi'epu aimo uubi nioro via gee'i vade ita imohaumo. Iehova eremaabei nio tuunioha rautu ita oo'a.