¹ Keriso ria peulavunu koukou, thaina mai gapuumuini Palau gena veuga ipo pigono gapi awa awa. ² Repana ia neiwao, ''Ora nanamari thaorai thauna goi avagelemuo, nama garonai thauna goi avaa avamuo. ''Ono iatha, evanamona ora namana. Ono iatha, evanamona wara nama garona. ³ Auapua vilana gau wauana thaina noai gakana gavuani, repana thai noai gaririwani gemai olea (ministry) pige ilagi raava. ⁴ Thai gegelamai ai e gemai ralewai maaumai gava magai maini thai Palau gena veunagi auri. Thai ia gena veunagi auri vanagi vanagi, meaumeauai, gauagaua thaorai, ⁵ auniparai wari iavurai, tipurai, vevagi thaorai, ulavunu gagauarai, noai mau namanama, thaka thaorai, ⁶ thaovethalevai, thaonekai, vaigauai, alanamai, Veaa Palauna thaonai, ulamagi aunaauna nanai. ⁷ Thai ia gena veunagi auri thori auna auna thaonai, Palau gena iavu thaonai. Thakwa thakwa rapuari garoagi rana aulimai ai e ripa maiai. ⁸ Thai gaulavunu nia vevavele ai e nori vevavele ai, veva raavai e veva rageai. Geilagi wapa wapa maini namu thai auna aunai gaulavunu nia. ⁹ Thai gaulavunu nia ia ia mai nonoai geripa maio, namu gauwa thai geripa gauavagi maio. Thai gaulavunu waregani namu igo- iatha-thai rogamaulini. Thai gemai ulavunu ralewana e gegelana pakunai iavu geva vuamaini nori geva warega maini. ¹⁰ Thai mave nuavi mai gaulavunu nia, namu gaverelenia. Lealeai gaulavunu nia namu vogo vagi paga va rinaa ri. Ovao mai gaulavunu nia namu gau vogo vagi garawaliani. ¹¹ Auna auna maparana mui, Korento, paga vaila venimui e thai thaomai pege vealapa vagi. ¹² Mui nori thaina paga thaleva mui, namu mui maaumui thaomuiai pogo vethaleva. ¹³ Evanamona thori gelegele ai-Thau na no melo melo availa rana-maaumui thaomui pigo alaparia maina. ¹⁴ Keriso noai geva auna aunania auria ila pigono vewalo kou. Thakwa thakwa maulina e rova nee vageleani auna raa pegere koukou iwa?Mathaa e muuna raa pegere koukou iwa? ¹⁵ Keriso e wapa auna ra pegere thori kou iwa? Ekalesia auna e nori ekalesia auna raa pegere vepuu iwa? ¹⁶ Palau gena rupu e kaivakuku raa pegere thori koukou iwa? Ia mauli Palauna gena rupu, Palauna ethoriao veaina: ''Thau ila thaorai pana alu e thaorai pana thoa. Thau ila geria Palau, e ila thau geku aunilimalima.'' ¹⁷ Gaurai, ''Thaorana ono thoa rai, e ono veole gerevagi, ''Velegaua neiwao. ''Milo gauna waua poono napa aunagia, pe thauna goi pana vai ragemu. ¹⁸ Thau mui amamui, e mui thau nauku maluaneri e vavineri, '' iliga iwavagi Velegauna neinia.