¹ Iesu na syngogue ai ma e raka vareai lou, bona ima heveri tauna ta na unuseni ai. ² Haida ese ia eha-gereava bema ia ese una tau do baine hanamoa dina helagana ai bena una an idia edia habade gauna ai bainela. ³ Iesu ese ima heveri tauna e hamaoroa, eto, "A tore-isi bona a gini tore ini hutuma bogaragidiai." ⁴ Bena ia ese aru taudia eha-maorodia, eto, "Ina be maoro dina helaga ai ba kara dika, ba hahemauri eiava ba ha-hemase, a? To idia na iboudiai asi regeregedia. ⁵ Ia ese e raraidia mai lalo hisihisina ida bona mai lalodikana ida, badina edia kudou auka daidiai, bona ia ese hari ima heveri tauna na e hamaoroa eto, "Imamu na atoia roro." Ia imana na e toia-roro bena vada e hedai hebou lou. ⁶ Hari Farasia taudia na haraga e raka lasi, bona Heroda ena orea taudia ida e hebou bona ia ialana dalana e tahua. ⁷ Bena Iesu na mai ena hahediba memerodia ida ela davara kahana, bona taunimanima hutuma bada danu ia murinai e raka, Galileia amo, bona Iudea amo, ⁸ bona Ierusalema amo, bona Idumaea amo, bona Ioridaena kahana amo, bona Turo bona Sidono amo. Ia e karava karadia e kamonai dia, hutuma na ia dekena ema. ⁹ Ena hahediba memero dia na e hereva henidia vanagi maragina ta bae hahegaegaea ia ena, badina be hutuma na bada herea bona ia e doriava bona e biriava. ¹⁰ Badina ia ese hutuma edia gorere amo eha namodia guguru, bona una ese gorere taudia na e guguva, baela ia ba daua-toho. ¹¹ Lauma dikadia ese e itaiava neganai ia vairanai e goru dihova bona mai tai lolodia ida e herevava, "Oi na Dirava Natuna." ¹² Ia ese e tamanudiava ia na basie hahedinaraia. ¹³ Ia na e dae ororo ai, bona ia ese e urahenidia taudia e boiridia, bona dekena ema. ¹⁴ Ia ese gwauta-rua e abidia-hidi (apostolo ai e gwauraidia) bena idia na ia dekenai bae noho, bona baine siaidia sivarai namo bae harorolaia, ¹⁵ bona siahu danu e henidia lauma dikadia bae luludia-lasi. ¹⁶ Bena ia ese ini gwauta-rua e abidia hidi Simona ladana ta e hatoa Petero, ¹⁷ Iakobo Zebedeo natuna, Ioane Iakobo tadina, ia ese ladana e hatoa Boanergea anina na guba rahu-rahu natudia, ¹⁸ bona Aniderea, Pilipi, Batolomiu, Mataio, Toma, Iakobo Alphaes natuna, Thadeo, Simona Zealot natuna, ¹⁹ bona Iuda Isakariota, ia taona itorena tauna. ²⁰ Bena ia na ena hanua ela, bona aru taudia hutuma danu ia ida ma e hebou, aniani danu asie urava. ²¹ Ia varavarana na e kamonai neganai, idia na ela ba dabaia-tao bona ba habadea eto, "Ia na eme kavaia." ²² Itorena taudia na Ierusalema amo ema eto, Ia na Beelzebul ese e rohea, bona lauma dikadia lohiana ladanai lauma dika e luludia lasimu." ²³ Iesu ese e boiridia bena sivarai hegeregerenai eha maorodia eto, "Satani be edena dala ai Satani do baine lulua lasi, a? ²⁴ "Bema basileia ta sibona do baine haheparara neganai, una basileia na basine gini diba. ²⁵ Bema ruma ta sibona baine haheparara neganai, una ruma na basine gini diba." ²⁶ Bema, Satani na sibona baine toreisi, sibona enai baine haheparara, ia na basine gini, a ena dokona baine kau. ²⁷ Asi tauna-ta na mai goadana tauna ena kohu do baine henao, a una goada tauna na baine guia guna, bena ena ruma ai baine raka vareai ²⁸ Na hamaoromui momokanimu taunimanima natudia edia kara dika na do bae hegwautao, edia ere dika danu, ²⁹ to, daika ese Lauma Helaga dikana baine gwaurai henia tauna ena kara dika na basine hegwautao diba, a ena kerere dainai ena kara dika na baine hanaihanai. ³⁰ Iesu ese unu bamona eha-maorodia badina be idia na eto, "Ia na mai ena lauma dika." ³¹ Bena sinana bona tadina na ema gigini. Haida e siaidia iboirina ela. ³² Hutuma ese e helaia hegere, bona idia ese ehamaoroa eto, "Oi sinamu bona tadimu na gigini bona idia na oi e tahumumu." ³³ Ia na e haere eto, "Lau sinagu bona tadigu be daidia, a?" ³⁴ Ia na e roha lao, ia e helaia hegere taudia e e itadia bena eto, "Aitaia, ini idia na lau sinagu bona tadigu veridia." ³⁵ Badina be, lau Tamagu ena ura e karamu tauna, ia na lau tadigu, lau taihugu bona lau sinagu.