¹ Bena Iesu, na Lauma Helaga, ese e rohea, Ioridaena sinavaina amo e lou ai. Bena lauma ese tano gagaena e hakaua lao, ² unuseni ai dina hari-ahui diabolo ese e dibagania. Unu dina iboudiai, ia na se anianiva, dokonai e hitoloa. ³ Bena diabolo ese e hereva henia eto, :Bema oi na Dirava natuna, ina nadi boma hagania aniani gauna ai bema lao." ⁴ Iesu e haere eto, "Vada e torea, "Taunimanima na dia aniani ai mo baine mauri." ⁵ Bena diabolo ese Iesu e hakaua dae tanobada basileia dia idoidiai e haheitalaia una horanai. ⁶ Bena diabolo ese ma e hamaoroa eto, "Lau na ini siahudia bona hairaidia iboudiai baina henimu, badina be lau mo e henigu, bona na ura heniamu tauna do baina henia. ⁷ Una dainai, boma toma henigu diho, idoinai boma abia oiemu. ⁸ A Iesu ese e haere henia, eto, "Vada e torea, Lohiabada emu Dirava mo ba toma henia diho, bona ia mo sibona isiaina ba lao heni." ⁹ Bena diabolo ese Ierusalema ma e hakaua lao, Dubu helaga kogena (atai hereana) ai e haginia kau, eto, "Bema oi na Dirava Natuna, ini amo boma roho dobi, ¹⁰ "Badina be vada e torea, "Ia ese ena aneru baine haduadia, oi bae gimamu," ¹¹ bona, imadia ai bae abimu isi, aemu nadi ai ba tutuhia na garina." ¹² Iese e haere eto, "Vada e torea, Lohiabada emu Dirava basio dibagania. ¹³ Diabolo ena hedibagani iboudiai e haere bena e rakatania ela bona nega ta. ¹⁴ Bena Iesu, na Lauma ena siahu ai Galileia e lou lao, bona ia harina una tano hegege madai idoinai e piua. ¹⁵ Edia dubu lalonai e hahedibava bona iboudiai ese imodaia. ¹⁶ Bena ela Nasareta, ia e nada gabuna bona vaia edia kara Dina helaga ai dubu ai e raka vareai, bena e toreisi Buka helaga e duahia lolo-lolo. ¹⁷ Isaia peroveta tauna ena buka e henia. E kehoa bena e davaria gabuna amo e duahia eto, ¹⁸ Lohiabada Laumana ese eme rohegu (na latagu ai), badina be vada e hahelagagu, sivarai namo ogogami taudia baina harorolai henidia. E siaigu vada nama e guidia taudia iruhadia, bona mata kepulu taudia matadia ihapapadia baina gwaurai bona e haberodia taudia baina hamauridia, ¹⁹ bona Lohiabada ena lalo-namo laganina baina harorolaia. ²⁰ Bena buka e lokua, inarina tauna e henia lou bena e helai diho. Iboudiai dubu lalonai ese ia e raraia. ²¹ Bena e hereva henidia matama eto, "Hari ina dinai ome kamonaia hereva vada eme momokani. ²² Bena iboudiai ese e imodaia, hereva namo dia uduna amo e lasi dainai, bona e hoa eto, ina na dia Iosepa natuna a? ²³ Bena ia ese e hereva henidia eto, ina hereva hegeregerena ba gwaurai henigu dahaka baoto, "Dokta sibomu hahemauri. Dahaka a kamonai Kaperanauma ai o karava karadia, emu hanua korikori ai ba kara. ²⁴ A ia na eto, na hamaoromui momokanimu, peroveta tauna na ena hanua korikori ai basie abiadae. ²⁵ Na hamaoromuimu danu, Elia neganai vabu hutuma Isaraela ai e nohova, una neganai lagani toi bona hua tauratoi, medu se dihova, tanobada idoinai doe e badava. ²⁶ A Elia na idia ta dekena se siai lao, Sarepeta Sidono kahana hanuana, vabuna ta dekena e siaia lao. ²⁷ Bena lepera taudia hutuma Isaraela ai e nohova peroveta Elisaia neganai, a ta se hamauria, Naman Siria tauna mo sibona. ²⁸ Bena dubu lalonai e hebou taudia iboudiai unu hereva e kamonai e badu dikadika. ²⁹ E tore isi, hanua amo e doria lasi, edia hanua e hadaia ororona e dabuia lao, hagahaga amo bae tahoa dobi eto. ³⁰ To ia na bogaragidia amo e raka oho, ena dala amo ela. ³¹ Bena ela Kaperanaumai, Galileia hanuana ta, ai e lasi bena dina helagai e hahedibava. ³² Idia na ena hahediba herevadia e hoalaiva, badina be e herevava mai siahuna ida. ³³ Dubu lalonai tau ta lauma dikana ese vada e boloa, ia na e tai lolo eto, ³⁴ E! Iesu Nasareta tauna, dahaka emai ai o karamu? Oi ialamai totona oma a? Lau mai dibagu oibe daika - Dirava ena Helaga Tauna. ³⁵ Bena Iesu ese emoni e gwau henia eto, :Eremu, iena amo a raka lasi! "Bena lauma dikana ese tano e kwadilaia idia bogaragidiai, bena iena amo e lasi. Hari tau na asi berona. ³⁶ Bena iboudiai e hoa, e hereva heheni eto, ini na dahaka hereva? Ia na mai siahuna bona mai goadana ida lauma dikadia e haganidiamu bona e raka lasimu. ³⁷ Una hegege madai tano idoinai ia harina e hapiua. ³⁸ Dubu amo e didi lasi bena Simona ena ruma ai e daekau. Simona ravana hahinena e gorerea, tauna e siahu, bena idia ese Iesu e hamaoroa. ³⁹ Ia na hahine dekena ai e gini, gorere e gwau henia, bena gorere e doko hahine na e tore isi idia isiaidia e lao heni. ⁴⁰ Dina kerekerena ai, idia ese gorere idau-idau taudia iboudiai ia dekena e laohaidia. Bena ia imana idia ta ta latadia ai e daukau, e hamauridia. ⁴¹ Lauma dikadia danu taunimanima hutuma edia amo e halasidia. Bena lauma dikadia e lolo, eto, Oi na Dirava Natuna. To ia ese e gwau henidia, bona e tamanudia basie hereva, badina idia dibadia ia na Keriso. ⁴² Daba e rere ia na e tore isi gabu gagaena ela a hutuma ese e hatahua e davaria bena e rua, basine rakatanidia eto. ⁴³ A ia ese e hereva henidia eto, lau ese Dirava ena basileia hanuadia idaudia ai baina harorolaia e siagu badina bunai. ⁴⁴ Bena Iudea dubu dia lalodiai e harorova. Translation done by: Ret/Dkh. Ori Claudie Kohu, completed on 31/03/23, time: 10.15 pm.