¹ Una negana ai haida e vaira bena Galileia taudia sivaraidia ia e hamaorolaia eto, Pilato ese idia raradia na edia boubou gaudia ida e bulo hebou. ² Iesu ese e haere henidia bena eto, umui o laloamu unu Galileia taudia edia dika ese Galileia taudia oreadia edia dika e hereadiamu badina una dala ai unu e hahisihisidia tomava dainai a? ³ Na hamaoromuimu, lasi. To bema umui basio helalokerehai, iboumui ai unu ba mase toma. ⁴ Eiava unu taunimanima gwauta taurahaniosi Siloam ai kohoro e moru bena e aladia mase umui ese o laloamu edia dika ese Ierusalema ai, e nohomu taudia iboudiai edia dika e hereaia a? ⁵ Na hamaoromuimu, lasi. To bema umui basio helalokerehai, iboumui ai unu ba mase toma. ⁶ Bena Iesu ese sivarai hegeregerena e hamaorodia eto, "Tau ta ena vine imeana lalonai suke auna ta e hadoa, bena huahua itahuna ela, to ta se davaria. ⁷ Bena ia ese imea ireguna tauna, e hamaoroa eto, "aitaia, lau na lagani ihatoina nama ina suke auna ai huahua name tahua to gau ta asiname davaria ba utua oho. ⁸ A ia ese e haere henia bena eto, Biagugu e, ina lagani mo do boma rakatania lau ese badina do baina geia hegege bona tano namona latanai baina atoa. ⁹ Bena eto bema una neganai huahuana baine dobi, be namo A bema lasi, oi ese na ba utua oho! ¹⁰ Hari Iesu na dina helagana ai dubu helaga ta lalonai ai e hahedibava, ¹¹ bona unuseni ai hahine ta, lagani gwauta-taurahani lauma dikadia ese e boloa, doruna dika bona se maoro guguruva. ¹² Una hora ai Iesu ese e itaia, bena e boiria kahi bena e hamaoroa eto, "Hahine e, "emu manokamanoka amo ame herua nege." ¹³ Bena imana latanai e atoa kau, una horanai doruna e maoromaoro bona ia ese Dirava e hanamoa. ¹⁴ A dubu lohiana, e badu badina Iesu ese dina helagana ai e hamauria dainai. Hutuma e haere henia bona eto, "Dina tauratoi mimia taunimanima edia gaukara dinadia bona unu dinadia hahemauri totona baoma. ¹⁵ A Lohiabada ese e haere henia bena eto, "koikoi taumui e! umui ta dina helaga ai ena boromakau eiava doniki asio ruhaiamu, ranu ihenina asio hakaua laomu a? ¹⁶ A ina hahine, na Aberahamo besena hahinena, lagani gwauta taurahani Satani ese e guia, be dina helaga ai ia ina igui amo basine ruhaia a?" ¹⁷ Unu e gwau toma, e inai henia taudia iboudia ai vada e hemarai, A hutuma idoinai ese e moale henia e kara gaudia iboudiai hahenamodia dainai. ¹⁸ Bena Iesu eto, "Dirava ena basileia be ede heto? bona dahaka ai baine hegeregerea? ¹⁹ Ina na e kara sinapi nadinadina ta na heto tau ta ese eabia bena ena uma ai e tahoa, bena e tubu bona au badana ta ai ela, bona atai manudia na rigina ai e roho kau e laga'ani." ²⁰ Bena ma eto, "to Dirava ena basileia be dahaka ai baina hegeregerea? ²¹ Ina na e kara asi e hatubua muramurana ta na heto Hahine ta ese eabia bena flaoa nau atoi ida e buloa ela bona idoinai vada e tubu." ²² Bena Iesu na Ierusalema e lao heniava ai hanua badadia bona maragidia, lalodiai e hahedibava. ²³ Bena tau ta ese hereva henia eto, "Lohiabada e, gagadoi mo bae mauri a? Ia e haere eto, ²⁴ hededegwa ai ikoukou hekahi-hekahina amo ba raka vareai, badina be na hamaoromuimu, hutuma bae hetahu bae raka vareai toho, to basie karaia diba. ²⁵ Ruma biaguna baine toreisi bena iduara baine koua bena oi na murimuri ai ba gini bena iduara ai ba pidipidi ba gwau "Lohiabada e, iduara mai ame kehoa! A ia ese baine haere henimui bona baineto, "Umui be ede amo oma, asi dibagu umui! ²⁶ Bena umui na baogwa, "aina umui vairamui ai baia aniani bona baia inuinu, emai ariara ai o hahedibava." ²⁷ A ia e haere eto, na hamaoromuimu, launa asi dibagu umui be ede amo oma. Karadika taumui iboumui ai, egu amo dauha aola." ²⁸ Una gabu amo, bae dorimui lasi murimuri ai ba tai bona gadigadimui ba hahedai bena umui ese Aberahamo, bona Isa'ako, bona Iakobo bona peroveta taudia iboudiai baitadia Dirava ena basileia lalonai. ²⁹ Idia na dina dae amo bona dina diho amo, baema, Dirava ena basileia lalonai bae ege diho. ³⁰ Bona baitala, haida na do bae gabe to bae guna, bona haida na do bae guna to bae gabe." ³¹ Una negana ai Farisea taudia haida ia dekena eo, e hamaoroa eto, "Ina gabu ba rakatania bona dauha baola, badina be Heroda e uramu oi baine alamu mase." ³² Bena ia ese e hamaorodia eto, "aola bona ba hamaoroa uda sisiana, "ai itaia lau na ina harihari lauma dikadia na luludiamu bona hahemauri karadia na karamu bona kerukeru, bona dina ihatoina ai egu gaukara baine a hagugurua. ³³ A harihari bona kerukeru, egu laolao baine hesiriu bona bainela bona vaira dinadia, badina be peroveta tauna na se abia daemu Ierusalema murimuri na ai basine mase. ³⁴ Ierusalema e, Ierusalema e, daika ese peroveta taudia e aladia bona dekemu e siaidia vasi taudia nadi amo o hododia. Nega ede hetomana na ura natumu baina haboudia. Kokoroku hahinena ese natuna hanina henunai e gorudia ahumu na heto, to oi na asio uramu. ³⁵ A itaia, emui ruma vada e negea badina lau ese umui na hamaoromui, umui ese ma basio itagu lou ela bona negana bainema bena umui baoto, "Lohiabada ladanai e maimu tauna aita hanamoa."