¹ Lau na vine korikori, bona Tamagu na uma biaguna. ² Do basie huahua rigidia iboudiai ia ese baine abidia oho, bona do bae huahua rigidia iboudiai, ia ese baine abidia bena idia na huahuadia momo ma bae vara. ³ Umui na vada o goeva badina lau ese vada na hamaoromu hereva dainai. ⁴ Lau lalogu ai ba noho, bona lau na umui lalomui ai baina noho. Hegeregerena rigi na basine huahua bema sibona neganai ela bona vine lalonai baine mia, bena unuhetomana umui na do basio huahua ela bona lau lalogy ai ba noho neganai. ⁵ Lau na vine umui na rigi. Daika lau lalogu ai e nohomu bona lau ia lalonai, ia na huahuana momo do baine vara, badina lau lasi neganai umui na gau ta basio karaia. ⁶ Bema tau ta lau lalogu ai se nohomu, ia na do ba tahoa oho rigi hegeregerena bena baine kakoro bona rigi bae haboua lahi lalonai ba tahodia vareai bae aradia ore. ⁷ Bema umui na lau laloguai bona bema egu hereva danu umui lalomui ai neganai, dahaka ba noi gaudia iboudiai do baina karaia umui emui ai. ⁸ Tamagu na ba heatolaia ini daidiai umui huahuamu momo daidiai bona umui na lau egu hahediba memerodia. ⁹ Tamagu ese e lalokau henig hegeregerena, lau ese umui danu nalalokau henimuimu. Egu lalokau lalonai ba noho. ¹⁰ Bema lau egu hahegani ba badinadia, umui na egu lalokau lalonai ba noho, lau ese Tamagu ena hahegani na badinamu hetomana bona ena lalokau lalonai na nohomu. ¹¹ Ini gau na vada na hamaoro laimui bona unu amo lau egu moale na umui lalomui ai bona unu amo emui moale na baine guguru. ¹² Ina na lauegu hahegani umui na ta ta ba helalokau heheni, lau ese na lalokau henimuimu hegeregerena ai. ¹³ Tau ta na asi ena lalokau herea daena a ina mo - Una ia ese ena mauri e atoa diho ia turana daidiai. ¹⁴ Umui na lau turagu veridia, bema umui ese lauegu hahegani gaudia ba karadia neganai. ¹⁵ Lau ese umui na asina gwauraimuimu hesiai memerodia, badina be hesiai merona na asi dibana ia biaguna be dahaka e karamu. A lau ese umui na lau turagu ai na gwauraimuimu badina be gau iboudiai lau ese na kamonai herevadia. Tamagu ena amo, lau ese umui vada name hadibalaimui. ¹⁶ Umui ese lau asio abigu-hidi, a lau ese umui na abimuihidi bona na duanaimui bena unu amo umui na baola bona huahuamui ba vara, bona huahua mui do bae mia. Bena unu amo dahaka gau Tamagu enai ba noi, lau ladagu ai, ia ese baine henimui. ¹⁷ Ini gau na hamaoromuimu, bena umui na ta ta ba lalokau heheni. ¹⁸ Bema ina tanobada ese e inai henimuimu, vada ba diba ina na lau e inai henigu guna umui be gabeai. ¹⁹ Bema umui na ina tanobada ena, tanobada ese bema ura henimu ia ena na heto. ²⁰ Ba helalotao, hereva ta lau ese na hamaoromui nato, "Hesiai merona ta ese biaguna na basine hereaia." Bema idia ese lau e dagedage henigumu, umui danu do bae dagedage henimui, bema idia ese lauegu hereva vada bema badina, umui emui hereva danu ba badina. ²¹ A ini gau iboudiai na umui do ba kara henimui, badina lau ladagu dainai, badina be asi dibadia lau be daika ese e siaigu. ²² Bema lau na basinama mai bona basiname hereva badina, idia na basiema kara dika, a harihari idia na asi edia ha-hekora edia kara dika daidiai. ²³ Lau e inai henigumu tauna ese Tamagu danu e inai heniamu. ²⁴ Bema lau ese na basinama karadia, una umui padamu ai na ta ese se karadia, neganai idia na asi edia kara dika, a harihari idia ese eme itaia bena lau bona Tamagu e inai henimaimu. ²⁵ A ini na bavara dalanai edia taravatu ai e torea herevana baine momokani, "Idia ese lau e inai henigu asi badinata ai. ²⁶ Tauhalo Tauna lau ese do baina siaia umui dekemu Tamagu ena amo - Ia na hereva momokani Laumana daika be Tamagu ena amo - bainema, ia ese lau do baine gwauraigu hedinarai. ²⁷ A umui danu lau o gwauraigu hedinaraimu badina be umui na lau dekegu ai una matamana ai. Translator: Ret/Dk. Lohia Gari Completed on Thursday (22/06/23), time: 3.45 pm. Ready for quality checking.