¹ Ai na vada a roho mauri, bena vada a diba una motumotu ladana na Melita. ² Una motumotu taudia edia kara namona e karaia, idia ese lahi eha-araia bona eabimai dae, badina be medu bona paraka dainai. ³ To Paulo ese au haida e gogo bena lahi ai e atokau ai, gaigai e vero lasi badina siahu dainai, bena imana ai e hetau dae. ⁴ Bena una motumotu taudia ese hari gaigai imanai e hetau dae na e itaia, bena e hereva heheni eto, "Momokani ina tau na ala-ala tauna, gadobada amo e roho-mauri to kara maoromaoro na se uramu baine mauri. ⁵ A ia ese gaigai e davea dobi lahi lalonai bona dika ta se davaria. ⁶ Idia ese e itaiatao tauna baine gudu eiava baine hekida dobi baine mase taku. A nega taina e daudau idia ese e itaia ienai gauta se vara, lalodia e ha-idau eto ia na dirava ta. ⁷ Una gabu tamona lalonai, be motumotu Lohiana ta ladana Pabilio mai ena tano. Ia ese e abimai dae mai gaiho-namona ida dina toi ena vadivadi ai e halaomai. ⁸ Unu e vara toma hari Pabilio tamana na hekure gorere taina ese eabia bona rara e kukuva ela bena e guriguri, imana latana ai e atokau bona e hanamoa. ⁹ Una kara e vara murinai, motumotu ai e nohova gorere taudia iboudiai danu ema bona namo e davari. ¹⁰ Unu taunimanima ese hahenamo bada herea e henimai. A hegaegaeva baia heau oho lalonai, idia ese emai lakwa (aniani) e henimai. ¹¹ Hua toi ela murinai, bena Alexander kadana ai a guikau una kada toana be Hekapa diravadia. Ia be lahara negana ai una motumotu ai e nohova. ¹² Surakuse ai a heau kau, dina toi unuseni ai a noho. ¹³ Unu amo a heau Regio ai a kau. Dina ta murinai diho lai na e toa, bena dina iharuana ai Puteola ai a kau. ¹⁴ Unuseni ai tadikaka mai haida a davaridia bena idia ese e boirimai dina hitu idia ida a noho. Ina dala amo Roma ai a kau. ¹⁵ Unuseni ai tadikaka haida ese harimai e kamonai, bena vada ema e hedavari heni mai hanua maragidia Appius bona Tarven toiosi ai. Paulo ese tadikaka mai e itadia neganai, Dirava e hanamoa bona goada e abia. ¹⁶ Roma ai a kau neganai, Paulo na e kahua nege sibona baine noho e gimaiava tauna ida. ¹⁷ Dina toi vada ela ia ese Iuda ikwaradia taudia e boiridia ia ida bae hedavari. Idia na e hebou, bena ia ese e hereva henidia eto, Tatau, Tadikakagu e, ena be taunimanima asina hadikadia bona seneda edia kara danu asina hadika, to Ierusalema ai e guigu Roma taudia imadia ai e atogu kau. ¹⁸ Idia ese e nanadaigu murinai, e urava bae ruhage nege, badina be mase badina ta egu ai asie davaria. ¹⁹ A Iuda taudia e gwau-gwau, lau na e hagugu-guva Kaisara dekena bainala, gau tamona launa asi egu hahebade ta egu bese taudia basina habadelaidia. ²⁰ Una dainai, badina binai, na boirimui baina itamui bona baina hereva henimui, badina doini ini e guigu tomamu badina be Isaraela ena helaro dainai." ²¹ Idia ese e haere henia eto, oi herevamu Iudea amo ta asia davaria, eiava tadikaka ta danu sema emu kara dika eiava sivaraimu dikana ta se gwauraia. ²² A ai na auramu emu lalo-hadai baia kamonai, badina be a kamonai ina orea na gabu idoidiai e gwautubu." ²³ Idia ese dina ta e gwauraia hidi bena una dina ai hutuma bada na ema ruma ai e hebou. Ia ese Dirava ena basileia e harorolaia. Iesu herevana, Mose ena taravatu bona peroveta taudia edia buka amo e gwauraia hedinarai, daba amo ela bona adorahi. ²⁴ Haida ese ena hereva e herevalai gaudia e abidae, A haida ese asie abidae. ²⁵ Lalodia na dia tamona, bena e karoho murinai Paulo ese ina hereva tamona ma e hamaorolaidia eto, Hereva momonai na Lauma Helaga ese Isaia peroveta tauna ena amo seneda e gwaurai henidia, ²⁶ eto, "aola ina bese taudia dekedia bena baoto, "Kamonai be ba kamonai, to lalomui basie parara; bona ita be ba ita to basio diba. ²⁷ Badina be ina bese taudia lalodia na duduhu, bona taiadia na kukudima, bona matadia vada e hakapu. Matadia amo bae ita na garina, bona taiadia amo bae kamonai na garina, bona lalodia bae parara na garina bae hegiro, bena baina hamauridia na garina." ²⁸ Una dainai, do ba diba Dirava ena hahemauri na bese idau-idau dekedia vada e siaia lao, idia na do bae kamonai." ²⁹ Ia na unu e gwau toma, bena Iuda taudia na dauha ela, ena hereva e helalolai badava. ³⁰ Paulo na lagani rua sibona davana e heniva rumana ai e nohova, bena ia dekena ela taudia iboudiai e abidiadae. ³¹ Ia ese Dirava ena basileia herevana e harorolai henidiava bona Lohiabada Iesu Keriso sivaraina e hadibalaidiava mai goadana ida. Bona ta ese se gwaua-tao. Translation done by: Mrs. Ori Claude Kohu on Friday (06/10/23), time: 7.10 am, ready for quality checking.