¹ Ioane Babatiso nega ei Iudea mata ḡaḡaeva hakivi Dirava hari maḡeve ro ioavege, roege, ² “Iama iai daure ḡumave ḡare geisa, badivara va Basileia ramu hugure.” ³ Oramu Isaia peroveta koita gavane au rone, “Koita be raki mata ḡaḡaeva gure to roma: Rohi Bauge ḡumaḡe baoviahe, au ioavare ḡumava ieriri ḡahisa. ” ⁴ Ioane ogonave ramu kamela homoka ge auki kiege renu vadaka ge auki au negotane bodivi vanu. Au demaka ramu iso iso mati umuko idi. ⁵ Gerege koita iabaraki Ierusalema seni renu Iudea uhura au ḡasina otege, mati Ioridana iaro hakira oḡo ḡahava ia, ⁶ eige auki babatiso ḡahigei Ioridana iarova iau daureve rogei keto gevege. ⁷ Eduge auki Faresia mati Sadukea ḡahava au ḡasina babatiso oroḡonu, auki kiro gevege, “Inuhu ḡamika ma ḡahanu! Unuhuna roma iaka Dirava hedokehe siviḡoro raḡohisa? ⁸ Oti me maḡe be kiogeisa eramu ia maḡuri maḡe mane ḡaḡae kisa. ⁹ Ia negu rome iaka ḡuma daure vara ia ḡare gevenu, Noka Aberahamo ramu ni tene; iakera daki ia kirogeima, Dirava vara riaḡahe muni o idigei Aberahamo vahiruhe kiogei gevara ¹⁰ Ḡuma ra bao bao vera aka idi umukahe dodo geisa; idi inuhati iau madika maḡe kiki veite era iaka dodovare mi vene uhura kiraki vara. ¹¹ “Daka eiava ge daki koita babatiso ḡahi gevenu, iau daureve ḡare gevare gahavaia. Eduge koita be di itahe oroḡare au hedoke ra raho ketake; eige daka au vaḡotoni maḡe veite renu ḡereḡere veite au vasi iaḡane agohisa. Auka Horu Aena mati hedo ruta gera auna ia babatiso ḡahigeisa. ¹² Auka riaḡahe koita maḡe kasagei daure ḡaha iau, erehuta negu ḡeḡe kiki koita naḡate, au me kiare auriva miare au demaka iaka maḡe kasai daureva iau. Gerege ḡeḡe kiki koita vana maḡeva idigei au demaka reḡui bougevare iagahe ḡosiḡei, eduge daureve iabara auka idigei vene raḡare uhura kira geige vara.” ¹³ Gerege Iesu raki Galileia seni urimi Ioane ḡasina Ioridana otinu, Ioane so babatiso ḡahisa. ¹⁴ Eduge Ioane raki imiḡi, roege, “Akena da babatiso ḡahisa, esemena a di ḡasina oroḡi roma daka a babatiso ḡahisa?” ¹⁵ Iesu raki kironu, “Da roiare so negubutu kisa. Ḡuma onaki ora noka Dirava roiare inuhati riaḡa ḡahisa.” Gerege Ioane raki itonu. ¹⁶ Gerege auka Iesu babatiso ḡahanu, auka eiava seni hakivanu, va uduani iabaraki au baoraḡohi, auki Dirava Horu Aenave eraḡage auki uguhi erehuta uguha naḡate abaga vara au ada. ¹⁷ Gerege eno be raki vava seni uguhi onaki ronu, “Ora di Moera, di soruke, auge di heḡirive ra raho ketakera.”