¹ Va tahi vagutu, haroro bauge inuhati mati ata baugea iabaraki bouraḡohi Iesu ḡamiḡa ḡumava gava raḡohege. ² Gerege iauki adakava raroare, iauki nisiḡami Pilato gavana ata e ḡasina otinu. ³ Iuda taotore vane koitava raki dibana ḡoinu Iesu ra hoḡe raḡira vara, gerege auki aukine ḡumava ananai ḡoiraḡare au muni tahaka utu abigaḡa idigei otime auki haroro baugea mati ata baugea mohigei ḡoiraḡanu. ⁴ Auki kirogevenu, “Daka ḡuma daure vara daki kinu, daki daure be kiki veite koitava hoḡe ḡumaḡe kinu.” Eduge iauki kironu, “Noka e anana veitera? Era avahu ai tohidera.” ⁵ Iauki negu muni tahaka e idigei dubu uhura kirage vare, auki hakivi otare auvahu au enoke raroi hoḡe raḡanu. ⁶ Edube haroro baugea iabaraki negu muni tahaka e idige vare iauki ronu, “Ora taḡote muni tahaka vara, beta maḡera no mi dubu moni maemare ei maemisa.” ⁷ Iauki iau bouge ga raḡohi, iauki muni tahaka emi hodu kiare koitava vateta tinabe haevi, ḡeahu ḡaha iau abate abate gabune. ⁸ Enaki eige iauki mata e ihiva kinu Taḡo Mata oroḡi negu. ⁹ Gerege peroveta koita Ieremia gare raki riaḡa ḡoinu, roege, “Iauki siliva muni tahaka utu abigaḡa, au damune Isarela ḡahaia au ibine rone era, ¹⁰ renu iauki moni e mi hodu kiare koitava matame haevi, era Rohi bauge da ḡanito ḡahane dodihe.” ¹¹ Iesu raki Roma gavanava vaḡotoni rami; gerege gavana raki beragi, “Ana Iuda ḡaha iau Rohi venu?” Iesu raki ronu, “Auka amu e roma.” ¹² Eduge auka ga be roro veitera, haroro baugea mati oḡo ata rahoia iabaraki auka daure kinu. ¹³ Gerege Pilato raki boriti ḡahi roma, “Ana iau ai ḡuma daure kiege gava raḡohare ihi geima se?” ¹⁴ Eduge auka iau gare be dodo veitera; eige gavana raki dauraḡi badiva Iesu ra ga kobabe tage roro veitera. ¹⁵ Edoredore heḡiri nega inuhati gera gavana ra vadibu iagava uiare bera koita iabana roege iauna mi hakivisa. ¹⁶ Nega ei vadibu uiege bera koita inuhati gera au dibane, au ihera Barabasi. ¹⁷ Gerege koita bou raḡane eige Pilato raki bera gevenu, “Orena ia gahara raḡohi dana iani vaheḡisa, Barabas se Iesu ihiva rone Keriso?” ¹⁸ Auka dibana riaḡa vara Iuda ḡaha iau aenave ge iauka Iesu mi moimo vara. ¹⁹ Au kota kiare gabuhe guramege uhura au mabare raki au enoḡe besuḡanu, “A negu ḡuma ieriri koita ei iaḡabe kime, dakamu vani uhuḡae daki huhu naḡanu da iaḡo be au vane.” ²⁰ Haroro baugea mati ogo ata rahoia iabaraki ḡaru ḡaha kiro gevenu iauka Pilato kiroege aukai Barabasi vaheḡisa a Iesu ra iauma ḡami hoekisa. ²¹ Eduge Pilato ḡaitana bera gevenu, “Unuhuna ia iau abu iau uhura gahara raḡohi dakai vaheḡisa iani?” Iauki roege, “Barabasi.” ²² Pilato raki kirogei, “Gerege dana orenaki Iesu iau au ihe rone Keriso kiki vanu?” Iauki iau bouge ronu, “Mi satauro ḡaha.” ²³ Edube auki berabe vanu, “Otavado dainehe, auna otavado ḡuma daure bena au kinu?” Eduge iauki bara raḡohi roege, “Mi satauro ḡaha.” ²⁴ Pilato raki eraḡege maḡe bera veitera, eduge ḡoḡai dudu vara hakivege, gerage auki koita iau vaḡotoni eia mime auki au ade ketoare, roma, “Daka ata o hoḡeve beta di kiki vera; edube era ia iavahu iai gera.” ²⁵ Koita iabaraki iau bouge roege, “Hoḡe ora isukava inuhati ni ada mati ni ḡamuhea iau ada gera!” ²⁶ Gerege Pilato raki Barabasi vaheḡare, renu iauki Iesu hodivare, auki mi mohigevenu iauka satauro ḡahisa. ²⁷ Gerege gavana ḡarara ḡahatuhe iabaraki Iesu mare iauki mi au gabunehe otinu, eige au ḡarara ḡahatuhe inuhati raki bouraḡohi. ²⁸ Iauki au ogonade kokivare iauki ogona kerekare be mi au kinu, ²⁹ gerege iauki ḡati garanate mi au omotehe maemanu, mati idi be mi au ada vamaḡahe maemanu. Iauki ehaiahia ḡahi ḡoru raḡi renu komuko dairaḡare, kiroege, “Maḡuri, Iuda iau Rohive!” ³⁰ Iauki sabaki ḡahare, mati idi mi omotova hodivanu. ³¹ Iau ehaiahia ḡahi itaharahe ge, iauki au ogonave darivi kokivare iauki au ogona riaḡava mi au kinu, gerege iauki nisiḡami satauro ḡahisa ro mi otinu. ³² Iau hakiraḡi otine, eige iauki Kurene atabe eraḡanu, ihivara Simona; gerege ḡarara ḡami iabaraki kiroege auki Iesu satauro ve agohanu. ³³ Iauki oti gabu be ihiva Golgota (makava ramu Omo kouka mata vara), ³⁴ iauki vine muraka mi eia ruta kobua ḡahi; mi moimi auki tohoḡare besibe ḡahanu. ³⁵ Iauki mi satauro koko ḡahare, au ogonade idigei iau vaḡahe harivege; ³⁶ gerege iauki ei gurahare gure ḡaru ḡahege. ³⁷ Au omote variada ge iauki torei onaki ronu, “Ora Iesu ra, Iuda ḡaha iau Rohivera.” ³⁸ Gerege vaho koita abu ḡainage Iesu ruta iauki satauro ḡahi gevenu, bera au vamaḡa kasihe mati bera au vaḡa kasihe. ³⁹ Koita oti oroḡege e iabaraki iau omote davegei ⁴⁰ mati roege, “Aka vani abigaḡa uhura dubu seboḡare mati kiege ḡoiraḡira vara, avahu a maḡuri ḡaha! A Dirava Moe ḡoege, menugena satauro ei ḡoroma.” ⁴¹ Ḡuma kobuḡa ei haroro baugea, renu aena kiki ḡahaia mati ata baugea, iabaraki ehaiahia ḡahege, roege, ⁴² Auka be iabara auki maḡuri ḡahi gevege; menugena au beta auvahu au maḡuri ḡahima? Auna Isaraela Rohivanu; eramu au satauro ada ḡoromege nona au riaḡa ḡahisa. ⁴³ Aukamu Dirava riaḡa ḡahima; edumena Dirava urai negubutu maḡuri ḡahare, mati roma, ‘daka Dirava Moe ra.’ ” ⁴⁴ Vaho ḡahaia au ruta satauro ḡahi gevene e ḡaitage ramu enakime iauki ḡuma kobuḡa ei ga ḡahege. ⁴⁵ Vani omo ada roḡone uhura ge vadibua raki vata ketake inuhati bakuanu atete vahiḡeta vani iaḡa abigaḡa. ⁴⁶ Vani iaḡa abigaḡa uhura Iesu raki nivi baravanu, “Eloi, Eloi, lama sabatani?” makava ramu, “Di Diravate, di Diravate, esemena a da ḡare manu?” ⁴⁷ Koita be ei rahi gevene iabaraki iahare, iauki ronu, “Ata ora Elia auki ihiromima.” ⁴⁸ Iau be raki rurui otime auki dabua tinabe mare, vine uhura taḡoare, auki mi idiva raroanu, gerege auki mi au susutemenu auka isa. ⁴⁹ Eduge be iabaraki onaki ronu, “Soso, noso eraḡa edumena Elia roḡi maḡuri ḡahare.” ⁵⁰ Gerege Iesu raki ḡaitana nivi bara vare auki hoḡe raḡanu. ⁵¹ Gerege iau dubu uhura dabuava raki dariḡohi abu ḡoinu, auhe uguhi derihe tinu. Vata vaḡava vi, mati munio ḡaitage reha raḡohi gevenu. ⁵² Hoḡe aba bao raḡohi, mati Dirava koita tuhea hoḡe ragohane e iabaraki urihi maḡuri raḡohi ḡoiraḡohanu hanu. ⁵³ Iesu hoḡe uhura urimi ḡoiraḡane itaharahe iauki midava ḡarehi oḡo aena ei otege koita dadaḡa iau ḡaḡae ḡoige. ⁵⁴ Ḡarara ḡaha bea iau biage ruta gera, iauki Iesu eraḡege iabaraki vata vaḡava viege eraḡi mati iaḡa inuhati vara raḡane erageime, iauki siḡo raḡohi mati onaki ronu, “Riaḡa vara ata oramu Dirava Moera!” ⁵⁵ Ḡaru maḡi dadaḡava raki ḡamanahu rahi niḡahege; iauka Galileia ge iauki Iesu itahe oroḡege mati iaheḡege maḡiva iabara. ⁵⁶ Iau uhura gera Maria Magadala, renu Maria, Iakobo mati Iosepa iau neine, renu Sebedeo mabare ⁵⁷ Vahigeta ḡoine eige, ada bubu ata be raki Arimatea seni oroḡonu, au iheramu Iosepa, au tage Iesu gamite bera. ⁵⁸ Auki urimi oti Pilato ḡasina Iesu ahata make imimiva vanu; gerege Pilato raki hedo mohi gevege iauki mi moimanu. ⁵⁹ Gerege Iosepa raki mare ogona isaḡe maḡe bei ḡodomanu ⁶⁰ mati auki au avahu muni uhura aba rohone ei maemanu. Gerege auki muni abata be kureime auki aba udua kouare bina otinu. ⁶¹ Maria Magadala mati Maria be iau ḡainage ei, aba hakirahe gurahege. ⁶² Va tahi ḡoiraḡane ei, Sabadi vani vara, haroro baugea mati Farasea ḡaha iabaraki Pilato ḡasina bouraḡanu ⁶³ mati ronu, “Rohi bauge, noka tarata koita e au maḡuri vehe au gare rone, ‘Daka vani abigaḡa itaharahe maḡuri vi ḡoiraḡira vara.’ ⁶⁴ Eige ama roege au abave iauma nitabata ḡahi atete vani abigaḡa rone ei; veite ḡoiege au ḡamituhea negu oti au ahata make vahoro mime, mati koita boriti ḡahi rosa, ‘Aukamu maḡuri vi ḡoiraḡanu,’ mati nega ihie tarata ḡuma oramu uriḡoi tarata iaḡaniva soiso vara.” ⁶⁵ Pilato raki boriti ḡahigei roma, “Iaka nitabata ḡahate iabaraki; otiahe, midava vire iai herohe iama nitabata ḡahisa.” ⁶⁶ Gerege iauki oti midava kouko muniva reḡunaki maemi berebe ḡahanu.