¹ Iesu raki Dubu uhura hakivi itahe otege, au ḡamituhea iabaraki au ḡasina oroḡime iauki uhuḡatu aukai otavado iau Dubu kiogevene e erageisa. ² Gerege Iesu raki bera gevenu, “Iana iaḡa inuhati erageva se veitenu? Riaḡa vara daki ia kirogeima, muni kobuḡa be tagera beta uara au gabunehe; iauka inuhati dede raḡohira vara.” ³ Iesu Oliva nimu ada ḡuramane uhura, au ḡamituhe iabaraki ḡoḡohu au ḡasina otinu, iauki beraḡi ronu, “No boriti ḡahigeve, a rogevene o inuhati gena vaisu ḡaḡae ḡahiḡa vanu, mati otavado toavana ḡaḡae ḡoiḡoanu a ḡoiraḡi oroḡare renu vata ketake o netunetua?” ⁴ Iesu raki boriti ḡahigei roma, “Iama iavahu iai ḡabide reḡugeisa bea negu ia tarageime. ⁵ Badivara koita dadaḡa iabara di ihehe oroḡi roroara, ‘daka Keriso ra!’ mati iauka koita dadaḡa tarageige vara. ⁶ Eduge iaka ḡarara kerike ihigei gevara mati ḡarara badia; eduge ia negu anana momo raḡohime; onaki o iabara ḡaḡae ḡahiḡa vara, eduge beta netu netua raki kauanu. ⁷ Iaka ihege mata be iaugera iaukame bebe ḡoḡai ḡahigei mati ḡarahi, mata au bouḡige ramu ḡubu raḡohi mati vata vaḡava ia kauka vara: ⁸ Iaḡa o inuhati geramu erehuta ḡami karuka ḡaneganei ḡuruare huhua naḡatera. ⁹ “Eige iauna ia idigevare ia daure ḡahigei mati ia ḡahigei hoeki geisa, renu mata o koitava inuhati gena ia betia ḡahi geisa di dainehe. ¹⁰ Renu koita dadaḡa iabaramu negu iau ihihive ḡaregei, bebe daure ḡahigei gevara renu bebe betia ḡahigei gevara. ¹¹ Gerege koita iabara roḡahi peroveta avanaḡe raḡisa mati ia taragei ḡeahu ota. ¹² Badivara ḡuma daure tage ramu iau hakiraḡi, koita maḡe iau ihihive renu iau bebe ḡaharahe raḡohare ḡainage ribiribe ḡahiḡa vara. ¹³ Eduge unuhuna uhu berebe vima auka netu netua maḡuri mimi vara. ¹⁴ Gerege badi maḡe o koita iabaramu vata ketake o ada ro ioa raḡisa, Dirava gare noma ni bouge ihisa mati riaḡahisa; ihiege netu netuana kauisa. ¹⁵ “Iaka negu dubu aenava iaḡa daure be ramare erara vara, peroveta koita Daniela raki badiva ronu (ga o dahare ḡahavaia makava na otavado vanu), ¹⁶ gerege oḡore iana Iudea uhura iama siviḡoro raḡi nimu otisa; ¹⁷ koita bena iaga ada gena auma ḡoromi oti iaga uhura au kohue idigeisa; ¹⁸ unuhuna itahe me mimare au negu au ogonave mimiva ḡoiraḡime. ¹⁹ Kava uhudau veitenu vana vani ei maḡi oreana detu mati oreana ḡami karukate ianu! ²⁰ Iama ḡuriḡuri kisa Dirava ḡasina iaka beta riaḡahe siviḡoro raḡira vara au veni se ribiri negava se sabadi vaniva tage. ²¹ Badivara nega ei huhu raho iabara ḡagae ḡahiḡa vara, huhu ona kikivera vata ketake o kine negahe ḡaḡae ḡahiḡa veite atete negu, eduge negahie huhu o naḡate bera mati beta ḡaḡae ḡoiḡoara. ²² Eduge Dirava ramu subuta vani tua ḡahi gevenu, au kiki veite goinebe bera beta maḡuri vane; eduge koita be iau ḡutiḡuti gera Dirava na vani e tua ḡahigeisa. ²³ Gerege koita be aki roare, ‘Eraḡa! Oramu Keriso ra!’ se ‘Vieramu aukaki!’---a negu riaḡa ḡahime. ²⁴ Badivara Keriso tarata raḡare mati peroveta tarata raḡare ḡahava iabara urihi toa bea mati ḡaḡu raḡira iaḡa be ḡaḡae kiogeige vara. Mati Dirava genenge idigevene e ḡainagera iauki daure ḡahi geisa roia. ²⁵ Ihiahe, iakera daki uriḡoi ia boriti ḡahigeima. ²⁶ Se, iana aki roege, ‘Eraḡiahe! Aukame mata ḡaḡaeva gera,’ a negu ei otime. Eduge iau rosa, ‘Eraḡiahe! Aukame iaga uhura hataima,’ ia negu riaḡa ḡahime. ²⁷ Badivara Koita Ḡamika orogarera, erehuta va gibaruvi vani ḡadiḡa kasihe oti vani uguhare ei. ²⁸ Hoḡe ḡaha iau ahata make iaḡohare gabuhe gera, gaioka iabaramu ei bouraḡoha. ²⁹ “Negu nega daure e itaharahe vani ramu vadibu ḡoiḡoara, mati bata tage beta abaga ḡoiḡoara; hisiu iabara vava desuraḡohisa, mati hedo vava uiogevare e iabaramu vaḡava vaḡava raḡira vara. ³⁰ Gerege koita iabaramu vava Koita Ḡamika toaḡe ḡaḡae ḡoiare eraḡi, renu vata ada o koitava inuhati geramu siḡoraḡohi niḡoraḡi, iauki ‘Koita Ḡamika vava ori uhura uguhi oroḡare’ au Dirava hedoke mati au erara vaḡa maḡeve erara vara. ³¹ Gerege auna au aneruve besugei bitivakava ruta, iauna au koitatuhe vata ada o ihinahe oti ihinahe au gene gevene ḡahavaia inuhati bougeisa. ³² ‘‘Noma dibana ḡahisa idi oi: au adakehe kobokava hakiraḡohe hanaka kiege, iama dibana ḡahisa iaha nega vara kahikarera. ³³ Ḡuma kobuḡa ei a iaḡa o inuhati eragevare, ama dibana ḡoiḡoara negara hugurera, ḡaḡae ḡoisage auki. ³⁴ Riaḡava daki roma, iaḡa o inuhati negu tau oi uriḡahi ḡaḡae ḡahigevara iauna erageisa. ³⁵ Va mati vata ketake oiana dauraḡohisa, edube di garera beta dauraḡira vara. ³⁶ ‘‘Edube vaniva mati negava bera dibana veitera, renu va aneru mati Koita Ḡamika tage dibana veitera, edube Mamakava raki auvahu dibana. ³⁷ Koita Ḡamika oroḡare toaḡava ramu erehuta, Noa negahe otavado ana ḡaḡae goine e naḡatera. ³⁸ Subuta vani e iau etaḡo so roḡiro veitehe koita iaba ramu tamuta raḡohi mati eia daure iogevege, heḡiri raḡohi ata maḡi headava raḡohege, atete vani rone kauane Noa ramu iagatoiva guivanu, ³⁹ eduge koita iau uhure iabara bao raḡohira veite eige etaḡoa ramu hoeki gevenu, gerege Koita Ḡamika oroḡare ḡumava ramu enaki ḡoiḡoara. ⁴⁰ Gerege nega e kauege ata abu ḡeḡe me miege; bera iaumu mi ḡeahu ota a bera iaumu ḡareha. ⁴¹ Maḡi abu ḡaitage iau abu parao kiare ḡabuhe, bera iaumu mi ḡeahu ota a bera iaumu ḡareha. ⁴² Ia negu vagua guragu raḡohime badivara iaka dibana veite Rohi bauge ena vani orei ororoanu. ⁴³ Eduge iama uhu maemisa: iaga bia dibana ḡoiare vaho koita vahi oroḡare negava, auka beta iaḡia vara gerege vaho koita era beta oroḡi au iage hosa hosa vara. ⁴⁴ Gerege ia ḡainage ia negu vagua raḡohime, badivara Koita Ḡamika oroḡare negava iaka beta dibana ḡahiḡa vara. ⁴⁵ “Besubesu koita orena ihihi te mati uhu vakate, unuhuna au mi biava maemanu, au besubesu ḡamituhea iau demaka damune kiogevare negahe? ⁴⁶ Kava heḡiri vana besubesu koita e visa vima au biage ḡoiraḡi roḡi behuḡi au me o gure kiogevare. ⁴⁷ Riaḡa vara iakera daki ia boriti ḡahigeima, au biage raki mi au kohue inuhati nitabata ḡahi geige biava maiamisa vima. ⁴⁸ Eduge au besubesu koita daure be ḡoinebe auka auvahu rone, ‘Di biagera negu nega ḡamana tinabe beta ḡoiraḡi ororoara,’ ⁴⁹ mati auki urimi au besubesu sokuhea hodigei ḡahigei, renu eia daure iogevare ḡahava ruḡa gurami muraka isa mati tamuta raḡisa, ⁵⁰ gerege negu besubesu koita e biage ra vani bei ḡoiraḡira vara auka dibana veite vaniva mati negava tage. ⁵¹ Gerega au biagena dodoi tina tina ḡahisa renu mi tarata ḡaha iau vaḡotoni maiamisa, eige auna nivi au eḡie iana gi raḡohisa.