¹ “Va Basileia vara erehuta mata bia be raki vagutu maḡa urimi otime auki koita be idigevege iauka au ḡeḡehe me misa. ² Auki gaḡagei aukena vani be me kiare damua mohigeisa, enaki kiroge vare auki besugei ḡeḡe iauki otinu. ³ Auki vani iaḡa igaḡu veite uhura hakivi otinu, ata be eragevege iauki ena rahira kava me veite. ⁴ Gerege auki gaḡagei, ‘Ia ḡainage oti ḡeḡe me miahe, dakena damu kobuḡa e ia mohigeisa.’ Iauki bina otinu. ⁵ Auki vani ububu kasiva mati vahiḡeta vani iaḡa abigaḡa otinu, ḡuma kobuḡa e kinu. ⁶ Nega tina kibe vani iaḡa adakasiva uhurahe auki mati hae kiare gabuhe otege ata be iabaraki rahege auki eragevenu; auki bera gevenu, ‘esemena ia vani o uhuḡati iaḡa be kiki veite?’ ⁷ Iauki boriti ḡahi ronu, ‘Bera no gaḡa geige veitera noka oti ḡeḡe me misa.’ Auki kiro gevenu, ‘Ia ḡaitage otiahe ḡeḡe me miahe.’ ⁸ Vani ugugua ge, ḡeḡe biava raki au ḡeḡe nitabata ḡahare atava ihiromi kironu, ‘Me ḡaha ihirogei iau damune mohigeve, ihie roḡahi me mane e iaue ana uriḡoi mohigeisa ihiege ana uriḡahi orogi me mane iauie kisa.’ ⁹ Negu vani iaḡa adakasiva me manu e iabaraki oroḡi, iau damune ra erehuta vani uhuḡatu me raḡara iau damune naḡate. ¹⁰ Eige uriḡahi me mohigevene ḡahava iabaraki iau damune misa ro oroḡonu, ge iau anavane iauka iau damune tinabe rahoḡahi mohigeisa; eduge iau ḡaitage damu kobuḡe iauki mohigevenu. ¹¹ Iauki iau damune mare itaharahe iauki ḡeḡe biava hoḡahi, ¹² roege, ‘Ata oia ihie me mohi gevene e iabara vani iaḡa kobuḡa kibera iauki me manu, eduge amu iau damune mohi gevene erehuta iauka vani uhuḡae no ruta me miage vani hedo uhura naḡate.’ ¹³ Eduge auki iau be kironu, ’Vasi, daka beta akera daki a daure ḡahanu; nona beta riaḡa ḡahanu noka vani be me miare damunava misa? ¹⁴ Negubutu ai damune mare bina ote; daka urai negubutu ata oreana ihie me manu e damune beta rahoḡahi moimisa ia mane ada. ¹⁵ Dana bina riaḡa davahu di moni vehe beta di urave be kikivanu? Se mama raḡohimena badivara di ade ra baobao vera koita iau. ¹⁶ Eige Iesu raki netu netua onaki ronu, oḡore iana ihie iaukena uri ḡahisa oḡore iana uriḡahanu iauka ihie gahisa.” ¹⁷ Iesu Ierusalema ḡadimi otine, auki au ḡamituhea utube abu nisigei ḡeahu otime, auki iau oḡiege uhura norena gaḡa gevenu, ¹⁸ “Ihiahe, noka Ierusalema ge noki ḡadihi ota, renu Koita Ḡamika varamu eige iauna mi aena kiare ḡahava mohigeisa. Iaukena au hoḡe ḡumaḡe riaḡa ḡahege iauna hoekisa; ¹⁹ oige iauna mi ḡeahu ḡaha mohigevege iauna eha iahia ḡahi mati hodivi atete iauna satauro ḡahisa; eduge vani abigaḡa itaharahe auna urimi maḡuri vi ḡoiraḡisa.” ²⁰ Oige Sebedaio mabare raki Iesu ḡasina otinu au ḡamuhe abu ruḡa tage, gerege auki uriḡoi ḡorumi maḡe ḡahare auki imiḡanu. ²¹ Iesu raki beraḡanu, “Otavado ḡahara gena a vima?” Auki kironu, “Ana beta riaḡa ḡahi roroanu di ḡamuhe abu ruḡa bera ai vamaḡahe bera ai vagadahe iauna gurahisa. ²² Eduge Iesu raki ronu, “Iaka dibana veite otavado ḡahara gena ia raḡoha. Da huhu evia isa roiare iana riaḡahe ivanu?” Iauki kironu, “No tagera ivara.” ²³ Iesu raki kiro gevenu, “Iaka riaḡahe ivara di kapusihe, kobuḡa berege unuhuna di vamaḡahe se di vagadahe guramisa, era beta daki rosa vima, eduge oḡore iana di Mame riaḡa ḡahigeima e iau iera.” ²⁴ Iau ate utube ga o ihire, iauki ḡami aburuḡa ho ḡahi gevenu. ²⁵ Eige Iesu raki iau bouge ihirogei bougeime auki kirogevenu, “Iaka dibana daure iau hedoke raki idigeima mati urigatu gevare ḡahava tage hedo inuhati iaugera. ²⁶ Eduge era beta ḡuma vara; ia negu iai e anaime Iai be aukai urai ihi rahote ḡoisa auka iai besu besu koitave ḡoigoara, ²⁷ mati bena urai aukai uriḡatuḡa koita ḡoisa era auka ḡoiraḡi iai bouge iai besu besu meve ena kiogeige koitava ḡoiḡoara; ²⁸ erehuta Koita Ḡamika oroḡone naḡate auka beta koita be iabara au meve kiogeisa eduge aukena bunu iau besu besu meve oḡiḡiva viogeisa, mati au maḡurive mi maiamisa koita inuhati iau dainehe.” ²⁹ Iesu mati au ḡamituhea ruḡa Ieriko ḡarehane, koita dadaḡava raki iau itahe otinu. ³⁰ Ata abu ni veite iabaraki ḡuma ḡaika gurahege uhura iauki ihinu Iesu raki oḡi hanevege, iauki bara raḡohi, “Ni Rohite, Davida Moe, no uhudau ḡahigeve!” ³¹ Koita iabaraki namigei roege keri ḡahiahe; eduge iauki ḡaitana bara raḡi roege, “No uhudau ḡahigeve, ni Rohite, Davida Moe!” ³² Iesu raki ramare auki ihirogei, roege, “Iana otavado ia ḡaharahe raḡoha dakai iai kisa?” ³³ Iauki kironu, “Ni Rohite, nokamu uraraḡi akai ni nie baogeisa.” ³⁴ Gerege Iesu raki uhudau ḡahigei iau nie kamugei. Tutube viege iauki niḡa niḡa raḡohare iauki au itahe oḡinu.