¹  Vani agorokiva itaharahe, Iesu raki Petero mati Iakobo au ḡoḡe Ioane ruta nisigei iavaḡu ḡadihi nimu ada. ²  Iau niḡahege uhura Iesu eravaḡe raki iau vaḡotoni nune ḡoinu, renu au nie raki vani abaga naḡate ḡoi, mati au ogona kaeve ḡaitage vani abaga naḡate. ³  Tutube viege Mose mati Elia iaberaki ḡaḡae ḡahanu, iauki Iesu ruta garaḡohege. ⁴  Gerege Petero raki Iesu ga ḡahi ronu, “Rohi bauge, no oroḡane ramu maḡe riaḡa vara; a maḡe roege, dana oi dubuka abigaḡa ḡosa, bera aie, bera Mose, mati bera Elia.” ⁵  Auka gavege uhura, va abaga ketake be raki iau ada ḡaruanu, mati eno be raki ori uhura hakivi ronu, “Ora di Moe riaḡa vara; di sorukera; dakamu heḡiri ḡahima; iama au gare ihisa!” ⁶  Au ḡamituhea vava seni eno e gavege ihine, iauki siḡo raḡohi iau nie vata ada ḡoru raḡohanu. ⁷  Eduge Iesu raki iau ḡasina oroḡare auki kamui gevare, roege, “Urihiahe renu ia negu siḡo raḡohime.” ⁸  Gerege iauka ni iagemi auhe niḡahi, iauka koita be erara veite eduge Iesu auvaḡu ge iauki eraḡanu. ⁹  Iauka nimu seni ugu raḡohege, Iesu raki ḡanito ḡahigei, “Ia negu ia iaḡa eraḡane koita be kirome ate Koita Ḡamika hoḡe uhura urimi ḡoiraḡare.” ¹⁰  Gerege au ḡamituhea iabaraki beraḡanu, “Gerege otavado beigena aena ḡahavaia roia Elia aukena uriḡoi oroḡisa?” ¹¹  Iesu raki kiro gevenu, “Riaḡa vara Elia raki uriḡoi oroḡisa mati aukena iaḡa inuhati ḡumava kiogeisa; ¹²  eduge daki ia kiro geima Elia ramu subuta gera auki oroḡonu, eduge koita iabara au toaḡe kiki veite, edube iauki au vaḡotoni iau ḡahara raḡege ḡumava kiogevege. Eige Koita Ḡamika tage ḡuma kobuḡa eige iauna huhu ḡahisa. ¹³  Gerege au ḡamituhea iau uhure raki bao raḡohanu auka Ioane Babatiso ḡare ra auki roege. ¹⁴  Iauki ḡoiraḡohi koita iau vaḡotoni, ata be raki au ḡasina otime, auki komuko daivi guramare, ¹⁵  auki kironu, “Rohi bauge, di moe vaḡahu ḡaha, auka omo daure viare mati huhu vara rahora; auka nega dadaḡa vara auki au mi vene uhura au kirai se eia uhura au kiraima. ¹⁶  Renu daki nisiḡami ai ḡamituhea iau ḡasina otinu, eduge iauka maḡe ḡahiḡa veitera.” ¹⁷  Iesu raki ronu, “Iakamu ihihi ḡamika mati tau berebe ḡahavaia, dana iai ḡasina gurami ate vaisu? Daka beta iai uhu berebe raḡare ate nega orei? Ḡami e mi di ḡasina oroḡiahe.” ¹⁸  Renu Iesu raki sua daure e ḡanito ḡahege, auki ḡami e ḡaremanu, gerege ḡami e raki inono veite maḡe ḡoinu. ¹⁹  Gerege Iesu ḡamituhea iabaraki iorena au ḡasina otime iauki beraḡanu, “Esemena no sua daure e oiahia veite?” ²⁰  Iesu raki boriti ḡahi gevenu, “Badivara iai ihihive ra raho veitera. Riaḡa vara daki ia kirogeima, iana iai ihihive na idi tahaka kusinaike naḡate ḡoiare, akamu nimu o ga ḡahi rosa, Oi vaḡava vi virei ote, auka rakaḡohi otito vara; eige iaḡa bera beta ai berebe ḡoiḡo vara.” ²¹  Edube a imimivi mati tamuta aena viege ana sua daure onaki koita bei oiahi hakivisa. ²²  Iesu mati au ḡamituhe iau bouge raki oroḡi Galileia bouraḡohi, eige auki boriti ḡahi gevenu. “Koita Ḡamika vara koita iau adahe ḡadimi iau aena derikehe ḡoiḡo vara, ²³  renu iaukena ḡamisa, eduge vani abigaḡa ḡahiḡahe auka urimi ḡoiraḡira vara.” Iauki iau bouge au gare ihinu iauki uhu huhu raḡohanu. ²⁴  Iesu mati au ḡamituhe ruga Kaperanamu hakiraḡi, eige dubu damu idiḡare ḡahava iabaraki roḡahi Petero ḡasina beraḡanu, “Iai biage na dubu damu mae mima?” ²⁵  Petero raki ronu, “Erege, aukamu kima.” Petero raki Iesu otine iagahe sirivi, gerege auki uriḡoi beraḡege, “Simona, ai uhu ananave na otavado anu? Oḡore iau gena vata ada rohiva iau damune mia? Iau ḡamuhe iau se ḡeahu koita be iau? ²⁶  Petero raki ronu, “Ḡeahu koita iau,” Iesu raki kironu, “Gerege ni ḡamuhe iabara beta dubu damu maema vara. ²⁷  Eige, noka beta namigei roro vara, eve oti karava iaḡova, ḡanai karava vara; a negu au avaḡe baovi, aka muni tahaka be behu behu vara; ama miare mi mohigeisa aḡore ni ihehe.”