1
Asie hatubua flaoana ariana, ladana lagau-hanai bina huguhu ḡoinu.
2
Ge aena koita mati itorena koita iauki gamiga ḡuma iagoanu, badiva iauka aru koita iau sigore raḡoha.
3
E negahe satani kiege Iuda Isakariota uhube hakira abu ata boloa.
4
Ge auki oti hahelaga koita mati dubu aena biavaia iaurua vahekinu, Iesu auna orena kiege mohigeisa.
5
Iauki bina hegiri raganu, iau gwau-hamata gahanu, moni iaune moimisa.
6
Auki roma, magera auki va narivanu aru koita veite au aune Iesu mohigei.
7
Iau begibe veite flaoava boua vaniva, lagau-hanai mamoe gahigeige vaniva kauanu.
8
Iesu raki Petero mati Iaone besugei roma oti lagau-hanai kiege inono-gadi gahisa ge none isa.
9
Iau abu roea orehe nona kiege hegae-gae gahisa?
10
Ge auki boritigahigei roma, ogo raho va ogi sirirai, ata be hodu ehea iama eraisa au gadimare iagahe iane gadihi.
11
Iane iaga bia gagahi, rosa, “hadiba ataroma dei daiutu na orenu, di ahediba rua lagau-hanai none isa?”
12
Auki auhe daiutu raho be ia gahino geisa vada e iravaia vaitani, ikehegena iane hegae-gahisa.
13
Ge iau abu oti, au urigatu rone iagadiva behugei; lagau-hanai iauki dabara ḡaha.
14
Negava bina kauanu, auka au apositolo atave rua eige diho.
15
Ge auki gaḡa gei, roma, daka gahara raho negu o lagau-hanai noka bourai isa, itarahe huhu dane isa.
16
Badiva daka ia boritigahigeima, daka beta lagau-hanai beta igoragarihe ototo maka koriko aune gagahe-goisa Dirava basileiave
17
Auki kebe be mi auki magegahi roma o miahe; iau bougei iahe.
18
Badiva daki ia boritigahigei; daka beta vine e ii goiragarihe ototo Dirava basileiave kauvi.
19
Bena flaoa atagana be mi, magegahi, bokoi mohigei, roma di ahatane monu, iai dainehe bina moimonu, onaki me iane kiege, da anaisa.
20
Tamuta rai dokari, auki kebe mati mi roma o kebe ora herohe-maino isaganigane di taokehe iai dainehe aune bohuragisa.
21
Di bive kine koitava adakava pata ada o di isinika.
22
Riagavara koita gamikava bina otitivara au rone gere-gereva, a biva kine atava madi ihabaina.
23
Bena iavagu berabe bebe iau unuhu na ena kisa.
24
Mati iavagu hepa-pahuahu iavagu iauna unuhu na herea.
25
Auki boritigahigei, roma bese nune-nune iau pavapave ia rohi gahigei mati ogo nune-nune koita iau rohi moteaha.
26
To iaka beta ena kikive, iai nomuaka ata baugera ata avie otisa mati hakau ata tage hesiai atava aune oti.
27
Hereavana otavado tamuta gabua gorurai atava se hesiai ata? Tamuta gabua edemi gorumane atava ani? Daka iai nomuaka hesiai atava hairanite.
28
A iaka da dibaganigu negahe di origi gurahi tarika-tarikava koitavaia.
29
Tauna-bunai di Mame au basileiave be daie bina rone gere-gereva da tage basileia be iaga ronu.
30
Ge di baseleiave uhurahe di patavehe iane tamuta raisa mati inuinu raisa mati teronava iane gurahi; Isaraela iduhu utube hakira abu iani hahemaoro henidia.
31
Simona e Simona e da boritigahigei satani kiege iai bougei bina ia roiage vanu, aune ia tapogei uit hairanite.
32
A daka iai guriguri, ia gabi dadamave beta darerevara, iai uhure aune goiraisa negahe ai ma tadikakamu ama hero gahigeisa.
33
Au roma rohiraho e, dana a bamoisa ototo vadibu iagava ototo hoḡe.
34
A Iesu roma Petero daki a boriti gahima, kokoruku so nina veite aka nega abigaḡa da gorei, rosa daka dibana veite au.
35
Mati roma, daki ia besugevene negahe iaka iago veite, iaka moda veite tamaka oḡinu, iana iaga bei gena ia daburaganu? Iauki roia veite.
36
Auki kiro gevenu, “Eduge ana negubutu iago aviete ama misa, se iaḡa be. Renu unuhuna eḡi veitenu, auma au ogonave haevare mati be haevisa.
37
Badiva da ia boriti ḡahi geima onaki ga maemi makava dai aune varaia roma, auka kara havara-havara koitava rua dahigei bouvi. Riaḡa egera dai gen aune guguru visa.
38
Iauki roia Rohi Bauge e dare idi abu monu, auki roma bina gere-gerevara.
39
Bena auki ogi hakivanu, vaia au karave oliva nimua oti; au hadiba rua au itahe oḡinu.
40
Gabu ei kauvi; auki boritigahigei roma, iama guriguri, hedibagani ia butumui tao na garina.
41
Auki avagu ogi gaise, muni be kiravare nagate; auki hetuitui auki guriguri vanu,
42
roma Mama ai ihure geregere vare o kehere dai seni boma abia oho to beta di uravera, to ai urave hari.
43
Bena aneru be vava seni au kauanu goada gahiga dainehe.
44
A huhu raho herea kiege uhura guguba gahanu, ge auki guriguri goada goada vanu ototo vagotoniva vata morugohonu, taḡo komuta hairanite.
45
Guriguriva auki urimi hahediba iau ḡaika goirai oti, iagiahe behugeve darana auki dokoane dainehe.
46
Bena auki namigei, roma otavado be dainehe ia iagoha? Uriahe guriguri raiahe, hedibaganiva ese baine butumui tao na garina.
47
Au ga uhura, hutuma bina ginidae; Iuda, utube-hakira abu atava be auki urigatu gevenu; auki Iesu anoisa ro ogi hugahi otinu.
48
A Iesu roma Iuda e, koita ḡamika anoanova amo be revaia a?
49
Au ḡaika rahane koitaia iauki erai otadoana varai, au beragei roma Rohi Bauge dareva dane dapa-dapa ie?
50
Iau beki hahelaga ata raho au hesiai atava ihikoke vamagava dapai kokivanu.
51
A Iesu roma iakoso, bena ihikoke kamoi auki bina magoinu.
52
Bena Iesu kiege dabai-taona otine koitavaia hahelaga koitaia mati dubu aena biavadiva mati ogo ata rahoia ga gei roma, iaka erehuta dadidadi ata be idabai taona hairanite, mai daremui mati mai karevanui ie?
53
Vani aubougei dubu aena uhura no rahi bouraege, eseragohi mena beta da dabai tao gahanu to ora bina iai negavera; vadibu au hedoke negavara.
54
Ge iauki dabaia-tao, hahelaga ata raho au iagehe nisigami siri raḡoha. Petero tage au itahe ogi, to padate.
55
Beabeki maḡu uhura vene gomoi iauki gurahi origi; Petero tage iau itahe ḡaika guramanu.
56
Bena hesiai magibe vene abagava auki erai; auki hohoagahi, roma ata era au bamode bera.
57
To auki gore-gorevanu, roma maḡi e daka diabene veite au.
58
Vanaha veite be raki erai, roma a tage iau bamode be a Petero roma ata e daka veite.
59
Hora be geregereva bina otinu be raki ga goada goada, roma rigavara o ata o au bamode bera badiva auka Galileia atava.
60
A Petero roma ata e ai garera di uhure so baoragira veitera. Bena garehe kokorogu nivinu
61
Bena Rohi Bauge kiege Petero anigoi nigahi hohoagahi. E negahe Petero Rohi Bauge au are anai roma kokorogu beta so nivarehe ane da goreisa.
62
Bena Petero bina ogi hakivanu nina raho vanu.
63
Iesu kamoane koitaia kiege gonagona ḡaha.
64
Nika tage dabuave godomanu, pata berai roia a patavane koitava ro unuhu nu.
65
Mati ga daure mudago iauki boritigahanu.
66
Va sobosobo ogo ata rohia hebou, hahelaga koitaia mati itorena koita rua ben kanisolo vaḡotoni iauki nisigi oti, roia,
67
No boritigahigeve ana Keriso se? Auki roma daka ia boriti gahigeisa, to ia ihiveite;
68
mati da ia beragei, to ia haere.
69
A negubetu oti, koita gamikava Dirava hedoke mimi vamaga hakira au gurame.
70
Ge iau bougei roia ge ana Dirava moenu? Auki roma o ae roiarena.
71
Iauki roia otavado dainehe habade ga no iagova? O au avagu avaḡehe roiarena no iharena.