¹ Ia e roha isi, taga koita eragevenu iau boubou monive maua uhura udagei. ² Gobu ogogami be erai, au monive kusi kusike abu uda gevenu. ³ Ge auki roma, daki ia boritigahigei riaḡa, o gobu udavane iagadiva kiege iau bougei iaue here gahigevenu. ⁴ Badiva iauka iau taga uhura tina kibe boubou mauava iauki udageve; to auka au ogogami uhura au iagane uhuḡatu au maḡurive iagane auki udavanu. ⁵ Beaberaki kiege deubu aena gavarai munimuni maḡe mate herahia iaga aena gava kinu a auki roma, ⁶ nega ia eraḡi iagadiva aubougei va ihiehe auni roho rai; muni be muni ada aukabeta uiarihe. ⁷ Ge iauki berai roia, Hadiba koita, va orei iaga ena varai? Mai au varavare negava toavana otadoanu? ⁸ Auki roma iai nahuave iama tohoi, iau ia taragevare sigovara badinava hutuma di ihie, oroi rosa “atava o da” mati negavara bina hugu-hugu to iau itahe iama otisa garehi. ⁹ Tuari mati helogo-helogo hariva iane ihisa, iama siḡo raisagarehi badiva o iaga so urigatu varai, a dokonava so vairava. ¹⁰ Mati roma, bese be bese iaurua iaune heala-ala heheni mati basileia be basileia be ruta tuari raisa. ¹¹ Gabu nune nune au vatana laga; dove mati dai-hanai dikavana varai, siḡo iaga mati va toavaia rahova vararai. ¹² A iaga e iabera so varaiava. Iau ia dabaimui tao iaune ia huhugahigei dubua mati vadibu iagava iaune ia dorigei siriraisa; pavapava mati gavana vaḡotoni iaune nisigei oti di ihe dainehe. ¹³ A unu iaga e iai riagagahigeva iaganiva aune otisa. ¹⁴ Ai uhure hadai iai itoto gavadiva amaso urigatu anaisa, ¹⁵ badiva daka roma ga mati aonega dane iamohigei, iai inaive aubougei iaune gwau-tubumui mati laoahumui iauka beta goadava. ¹⁶ A iaimame, neine, nanuhe, vara varatuhe, vasiruhe iau bive torei ia begaita iaune iagahigei hoekigeisa. ¹⁷ Koita aubougei iaune ia inai gahigei ¹⁸ to iai omote hanakava kobua bera beta daure goiarihe. ¹⁹ Iai berebe dainehe iai suare na maguri visa ²⁰ Tuari oreava Ierusalema aune kouvi origi ane erai, ane dibanavisa au dokone bina hugu-hugoi. ²¹ E negahe iane Iudea iaune gurami koitava ia nimua rururai oti, mati ogo uhura iaune gurahi koitaia iaune rururai hakiragohisa, mati urada iaune gurahi koita vana ogo beta ogi vareaivarihe. ²² Badinava damu kiki negavara menu; torei subuta gavadiva aubougei riagagahiga vanivara menu. ²³ E negahe detu magia mati mara roto magia madi ihabaidia badiva huhu raho o vata aune varai mati ho bese koita ada aune kauvi. ²⁴ Beabera dove negava iaune hogeragohi, beabera iauna idigei maguri gahigei ogo nunebe ogo nunebe iaune idegei otisa. Idau bese koitaia Ierusalema duhai gurahi ototo bese nune iau negahe aune kosaisa. ²⁵ Vani, bata, hisiu toana varaisa; mati tanobada besevaia huhu i soru hiroro na butudia tao eve enoga mati hurehure tage raho ḡoisa. ²⁶ Koita sorukavana hirorovisa, daravaia iaune dokorai; iau vara iaganiva sigova iaune sigorai dainehe badiva va hedokava na marere marere visa. ²⁷ Iaune koita ḡamika iaune eraisa ori ada aune oroisa hedo raho ruta mati haira ruta. ²⁸ Iaḡa o iabara ḡaḡae ḡahi, urimi ramare ai omote mi iagemi, badiva iai maḡuri ḡahiḡa vera huguro gera. ²⁹ Gerege auki badigomu be boriti ḡahi gevenu, “Idi o eraḡiahe mati idi o inuhati; ³⁰ koboka ḡadimi a eraganu ama dibana iaha bina hugu-huguvima. ³¹ Aukamenu, ia gaita iaga o varavare iama eraisa, iama dibana gahisa, Dirava basileiave bina hugu-hugugoima. ³² Da boritigahigeima riaḡa, o uru oia iauka beta koisaia, iaga oaubougei so vararai ihie. ³³ Va mati tanobada iaune pukirai a di garera beta pukivarihe. ³⁴ Iai nahuave iama tohoisa, tamuta mudago mati kekero gadiki mati tanobada au lalo hagui iagadiva na au uhure isuka isuka gahiga siḡo vara, ge vani ena a ragadiga gahisa, idoa hairanite. ³⁵ Badiva vani ena tanobada guragu koita iaubougei iau aune kauvisa. ³⁶ Taunabunai ama gimaisa, va aubougei ama gurigurivisa, ga negu daure uhura ane magurivisa koita ḡamika vaḡotoni ane ramisa. ³⁷ Huivie vahe ane Iesu au avanivi auka vani dubu aenava hadibavi a vahi aubougei auka hakivi, oliva nimua auki guramige. ³⁸ Va sobosobova iaubougei dubu aenava hebouraege, au gare ihihi.