¹ Vani bei, auka gure dubu badi maḡe koita boriti ḡahi gevege, gerege dubu biava renu aena ḡaha iabeki koita bauge ruḡa au ḡasina otinu ² renu beraḡanu, “No kirogeve, unuhu hedokehe gena a me o kima? Unuhui gena a hedo manu?” ³ Iesu raki kiro gevenu, “Da tage ia beragei gevara, renu iama da boriti ḡahisa: ⁴ Ioane babatiso mane na vava seni ge au oroḡanu, se koita iau seni?” ⁵ Iauki iavaḡu bebe gaḡagei, roege, “No negu rosa, ‘Vava seni,’ auka roro vara, ‘Esemena ia riaḡa ḡahiḡa veite?’ ⁶ Eduge no negu rosa, ‘Koita iau seni,’ koita iabera muniva no ḡahigei hoekigei gevara; badiva iauka onakime iauki roia Ioane ra peroveta koita vara.” ⁷ Gerege iauki kironu iauka dibana veite oreigenu au oroḡonu. ⁸ Gerege Iesu raki kiro gevenu, “Da tage beta ia boriti ḡahigei gevara unuhu hedokehe gena da me o kima.” ⁹ Gerege auki badigomu be koita boriti ḡahi gevege: “Ata be raki demaka ḡeḡe be kiare, auki koita be idigei iauka ni tabata ḡahisa, auka so mata nune bei nega tinabe ḡamana ioa otisa. ¹⁰ Rohirohi nega miege, auki au ḡamite be besuḡi au ḡeḡe ni tabata koitava iau ḡasina au ḡeḡe makava misa; eduge ni tabata ḡaheva iabeki ḡami oiahi auki adaunaḡe ḡoiraḡanu. ¹¹ Auki ḡaitana be besuḡanu; au tage iauki ḡami oiahi mati adaunaḡe besuḡanu. ¹² Auki mati ḡaitana abigaḡa ḡahiḡava besuḡanu, iauki ḡami daure ḡahi mi itahe kirai haki raḡanu. ¹³ Gerege ḡeḡe biava raki onaki ronu, ‘Dana otavado kisa? Daka di moe kobuḡava dana besuḡisa; iauka mena beta iaḡa be au kiki vara.’ ¹⁴ Eduge negu ni tabata ḡahe iabeki iavaḡu gaga raḡi ronu, ‘Oramu kohu biava moera; noma ḡami hoekare gerege noma ḡeḡe o noni misa.’ ¹⁵ Iauki mi ḡeḡe itahe butui haki raḡare iauki ḡami hoekanu. Eige ḡeḡe biava negu orenaki kiogeige vanu? ¹⁶ Aukamu negu oroḡare ni tabata koitava ḡahigei hoeki gevare auna ḡeḡe mi koita be mohi geisa.” Ihine ḡahava iabeki onaki ronu, “Veite! beta enaki ḡoiḡo vara!” ¹⁷ Eduge Iesu raki era gevare ronu, “Gerege bukava maemane makava na otavado: ‘Iaga ḡoḡo koitavaia besibe ḡahane muniva eramu iaga kamui berebe ḡahare muni vara’? ¹⁸ Muni vire ada moruḡohare ḡahava iabera mumu raḡohira vara, mati koita be ada moruḡohare koita era mumu raḡira vara.” ¹⁹ Negu aena gaha mati dubu biavaia iabeki dibana ḡahanu badigomu ora iauge auki roma, eige iauka ḡamiḡa ronu, eduge iauki koita iau siḡore raḡohanu. ²⁰ Eige iauki eraḡanu mati avanaḡe niḡa niḡa koita besugei, au gare dainehe iauka kamuisa, gerege iauka mi oti gavana aenava renu au hedoke derikehe. ²¹ Eige iauki beraḡi ronu, “Ni Biage, noka dibana ai gare renu ai uhuvake, renu aka koita be ga nune ḡahiḡa veitera, eduge Dirava uhuvaka garehege aki gaḡa geima. ²² Kaisara taks monive no moimare se veitenu, aena vanu?” ²³ Auka iau taratave dibana dainehe, auki kiro gevenu, ²⁴ “Moni be mi da moima. Unuhu omote renu unuhu ihena adahe?” Iauki ronu, “Kaisara ihera.” ²⁵ Auki roma Kaisara aue Kaisara iama moimi, Diravaie, Dirava iama moimisa. ²⁶ Aru koitaiau vairanea au gare ehe iauka idoa gahiga veite, au gare ragadiha, iauka ga veite. ²⁷ E itarahe Sadukea koita beabe au ḡaika oti; orea earoia hogera beta irimi goiragarihe; iauki berai, roia, ²⁸ Hadiba koita, Mose ni taravatu no mohigei, roma, ata be hogerai mati gobua gurami gami veite, gobua sibakava na mati mabakisa, gamikava aune havaragahigei hoḡe atavaie. ²⁹ Benaini ogo nama iatiriava gura gurave, ata bauge kiege maḡi be maba kinu to auka gami veite auki hogeraganu. ³⁰ Abu gahigava mati abigaḡa ḡahiḡava iauki negu maḡi e mabakinu ³¹ ototo iatiriaga iauki manu, to iau bougei hoḡe ragohanu iauki gami veite ³² ihie maḡi tage hogeraganu. ³³ Uriri ḡoiraḡira negavahe maḡi ena unuhu mabarenu? Badiva iatiriaga iauki mabakinu. ³⁴ Iesu ito roma, o tanobada koita iau maḡi idigeve, mati mabakiogevene ³⁵ a au orogare basileiave kara ieriri koita iaune urihi goiragohi; iauka beta hadava ragohiava, ³⁶ mati iauka beta hogerai goiragahui iauka aneru rua geregere rairaivara mati Dirava moteahi, badiva iauka toreisi-lou koitaia. ³⁷ Hogeva urihi goiraga ga vara Mose kiege idi garanate uhura no boritigahigevenu rohi bauge bina ronu Aberahamo Diravave, Isako Diravave, Iakobo Diravave. ³⁸ Ena ronu auka beta hoḡe koita iau Diravave, to maguri koita iauie, badinava koita aubougei iau dainehe iauki maguriragaha. ³⁹ Itorena koita beabeki roia, Hadiba koita ga riaḡa menu. ⁴⁰ E dainehe iauka berai goiragira veite; bina sigoragianu. ⁴¹ A auki beragei roma, badiva na otavado koitaia roia Keriso ra Davida moe ie? ⁴² Davida Salamo uhura roma Rohi Bauge kiege di rohi kiege boritigahi roma daka vamaḡahe dane gurai ⁴³ ototo inai tuhea aubougei ai vase vatava iaganiva aune otigei. ⁴⁴ Davida avagu roma ? Rohi Bauge roia orena kikivanu, auka au moe. ⁴⁵ Koita aubougei vagatoni auki au hadiba tuhe boritigahigei roma, ⁴⁶ Taravatu toreto diba koitavaia nahuava iam tohogei. Iauka urarai dabua eige getegei, iauka ioaioa, hae gabua koita iabeta maḡe gahigeisa mati dubua mati anibouva gabu maḡeva iauka gurahi. ⁴⁷ A iauka gobu iau iagehe ogogami gahigei: iau gurigurive gamanagahi koita taragei. Iaka damu isukate iaune so misa.