¹ Ata be ihivara Nikodemo auka Faresia koita vara mati Iudea ḡaha iau ata baugeve bera. ² Auki vahi bei Iesu ḡasina otare ga ḡahi kironu, “Di Biage, noka dibana aka Dirava raki a besuḡanu; koita bera mati beta a kiare meva riaḡahe kiogei gevara, au Dirava ruta ḡoiege auna kisa.” ³ Iesu raki kironu, “Riaḡa vara, daki a boriti ḡahima, koita be varai ḡoiraḡira veite ḡoiare auka beta Dirava Basileiave erara vara. ⁴ Nikodemo raki beraḡanu, “Koita ketane be na orenaki au neine vaḡatanehe sirivi ḡoiraḡare mati nega abu ḡahiḡava varai ḡoiraḡira vanu? ⁵ Iesu raki kironu , “Riaḡa vara daki a boriti ḡahima, koita be eia mati Horu Aenava varava veite ḡoiare auka beta Dirava Basileiave sirisi vara. ⁶ Unuhuna ahata makava varavare era ahata maka iera, unuhuna Horu Aenava varavare era Horu iera. ⁷ A negu ḡaḡu raḡime da negu aki rosa, Ama varai ḡoiraḡisa. ⁸ Nono ḡugui oroḡare mati otare akamu mamina kima, eduge au oroḡare mati otare aka dibana veitera. Gerege o ramu oḡoreana Horu Aenava vara raḡare iabera.” ⁹ Nikodemo raki beraḡanu, “Iaḡa o makava iana orena kikivenu?” ¹⁰ Iesu raki kironu, “Akamu Isaraela uhura koita bauge bera, eduge akamu iaḡa o iau ai uhure ramu so bao raḡira veitera? ¹¹ “Riaḡa vara, daki a boriti ḡahima, noka no dibana ḡahare iaḡaniva noki gava raḡa, mati no era gevene era noki ia boriti ḡahigeva. Edube iaka ni gare riaḡa ḡahiḡa veitera. ¹² Aka da vata ketane o ahata maka iaḡaniva gava kiare akamu beta riaḡa ḡahima, gerege da va iaḡa gava viare ana orenaki da riaḡa ḡahiḡa vanu? ¹³ Bera so vava ḡadiḡa veitera edube vava seni uguhane eḡu, Koita Ḡamika avaḡu gera. ¹⁴ Mati Mose mata ḡaḡaeva inuhu piuvi iagemane naḡate, Koita Ḡamika tage enaki ḡuma eige iauna iagemisa, ¹⁵ eige ana unuhuna a riaḡa ḡahima aka maḡuri behi-behive mimi vara. ¹⁶ “ Dirava mageve au koitatuhe yau ada dainehege auki au Moe kobuga matava besui oroganu, unuhuna riaga gahima auka beta Hoge ragiravara eduge auka maguri behi behive mimivara. ¹⁷ “Riaḡa, Dirava au moe besuḡi vata ada oroḡane ra beta ḡahava daure ḡahigei gevara, edube auge iauna maḡuri raḡisa. ¹⁸ Dirava ra beta koita be daure ḡahiḡa vara oḡoreana au Moe kobuḡava riaḡa ḡahare: edube Dirava ra iau daure damune mohigei gevara oḡoreana au Moe kobuḡava riaḡa ḡahiḡa veitenu. ¹⁹ Eige daure ḡuma damuna ramu onaki kikive: abaga ramu vata ada oroḡanu, eduge koita iabara vadibu iauki ḡahara raḡa beta abaga, badivara iau ḡumaḡe iabera maḡe veitera. ²⁰ Unuhuna ḡuma daure kiare renu abaga besibe ḡahima, mati abagahu ororo veite, badiva iau ḡuma daureve negu ḡaḡae ḡahime. ²¹ Eduge oḡoreana ḡuma riaḡa kiare iaberamu abagahu oroḡa, eige iau Dirava ḡuma maḡeve kine iauma abagahu eraḡisa.” ²² O itaharahe Iesu mati au ḡamituhe ruḡa ge Iudea matahe otinu; eige iauki vani rorebe uiare babatiso me kiege. ²³ Ioane tage babatiso Aenonu matahe kiege Salima ḡaika badiva eigera tinavai ketake eigera koita dadaḡa iabera oti iauki babatiso ḡahi gevege. ²⁴ (Nega mane iaukamu Ioane ramu so vadibu iagava veitera.) ²⁵ Nega oige Ioane ḡamituhea mati Iudea be ruḡa ge raki enana raḡi iauna orenaki daure ḡuma ketogeisa. ²⁶ Iauki Ioane ḡasina otare kironu, “Ni Biage, atabe a ruta Ioridana kasihe otine, aki au gare viege, aukamu oige auki koita babatiso ḡahi geima, renu koita dadaḡava ramu au ḡasina ge iauki ota.” ²⁷ Ioane raki ronu, Koita bera beta iaḡa be mimi kava vivi vara, eduge Dirava au seni vava oroḡare era auna misa. ²⁸ Iakamu di gare riaḡa ḡahiḡave iabera da roege, daka beta Keriso ra, eduge daka au uriḡatu ge Dirava raki da besuḡanu. ²⁹ Ata be maḡi be mi au mabare kiare, mati ata e vasire ramu rami au ominue roiare gava ihi heḡiri vima. Eige, di heḡirive augera raho ketakera. ³⁰ Auma raho ketake ḡoisa, edube daka avie ḡoisa. ³¹ Vava seni oroḡane koitava ramu iaḡa iau bouge iau variada gera. A vata ada oi oroḡane koitava ra vata o iera renu auka ahata maka gava auki vima. Vava seni oroḡane koitava ra iaḡa inuhati iau variada gera. ³² Auka au era gevene mati ihi gevene gava iabera auki vima, eduge koita bera au gare ihi riaḡa ḡahiḡa veite. ³³ A unuhuna au gare mare mati taua kima, roma, Dirava ramu riaḡa vara. ³⁴ Dirava besuḡi oroḡane koitava ramu Dirava gare auki roma, badiva au Horuve moimare era avie veitera. ³⁵ Dirava au Moe au sorukehe eige auki iaḡa iau bouḡi au ada uhura maemanu. ³⁶ Unuhuna Dirava Moe riaḡa ḡahima auka maḡuri behi-behive mimi vara; unuhuna au Moe riaḡa ḡahiḡa veite auka beta maḡuri riaḡa erara vara, eduge auka Dirava hore uhura ge auna guramisa.