¹ Iaḡa o iau itaharahe, Iesu raki ḡaitana Tiberia gohu ḡaika au gamituhe iau ḡaḡae ḡoiraḡanu; renu avaḡu onakime auki horivanu. ² Eige iauki bouraḡane ḡamiva iabaramu Simona Petero, Toma ruta vara vane atava, Nataniela auka Kana Galileia koita vara, Sebedeo ḡamuhe, renu au ḡamituhe abu ḡaitage. ³ Simona Petero raki kirogevenu, “Dakamu eve ioa otito vara.” Iauki kironu, “No ḡainage a ruta ororo vara.” Iauki otime iauki eua ḡadihi, eduge vahi uhubaḡe iauka sine veite. ⁴ Va tahi oroḡege, Iesu raki eve ḡaika ramanu; eduge au gamituhe iabara dibana veite eramu Iesu ra. ⁵ Iesu raki kirogevenu, “Gamia, iana sine tenu?” Iauki kironu, “Veitera.” ⁶ Auki kirogevenu, “Reke mi eu vamaḡa kasihe kiraviahe, eige iana eragisa.” Gerege iauki au rone ei kiravane, iau rekeve ra karava raki tobo ḡahanu gerege iauka geregere veite mi iagemisa. ⁷ Iesu ḡahara vare ḡamiva raki Petero kironu, “O ramu Rohi Bauge era!” Simona Petero ihine era Rohi Bauge auki au ahata ogonave mi reḡunaki au ḡodomare, auki eve gerovanu. ⁸ Eduge ḡamituhe bamoduhe au ruta eua oroḡane, iauki reke karava tobo raḡane butui tana ḡamana veite oroḡege. ⁹ Iauki oroḡi tana hakiraḡi, iauki vene raḡiraḡe be eraḡi adahani gera karava be mati parao au ada. ¹⁰ Iesu raki kiro gevenu, “Ia karava idiḡane be idiḡi oroḡiahe.” ¹¹ Gerege Simona Petero raki eua ḡadimare auki reke karava ketake tobo raḡane butui tana ḡadimi, inuhati tinahu be utu-adakasiva hakira abigaḡa; renu karava dadaḡa eduge reke vara dariḡohiḡo veitera. ¹² Iesu raki kirogevenu, “Oroḡi tamuta raḡohiahe.” Ḡami bera mati berabe veitera, “Ana unuhuna?” Badiva iauka dibana auka Rohi Bauge era. ¹³ Iesu raki orogi parao miare mohi gevenu, mati karava tage ḡuma kobuḡa ei kinu. ¹⁴ Oramu nega abigaḡa ḡahiḡa auki au ḡamituhe iau ḡaḡae ḡoinu au hoḡe uhura urimane itaharahe. ¹⁵ Au tamuta ragohi itaharahe, Iesu raki Simona Petero beraḡanu, “Simona, Ioane moe, ana di gahara vima gami o iau tanahe?” Auki kironu, “Erege, di Rohite; aka dibanara dakamu ai gahara vima.” Iesu raki kironu, “Di mamoeve nitabata ḡahisa.” ¹⁶ Auki nega abu ḡahiḡava auki kironu, “Simona, Ioane moe, ana di gahara vima?“ Iesu raki beraḡanu, “Erege, di Rohite; aka dibanara dakamu ai ḡahara vima.” Iesu raki kironu, “Di mamoeve eragisa.” ¹⁷ Auki nega abigaḡa ḡahiḡava beraḡanu, “Simona, Ioane moe, ana di gahara vima? Petero uhure raki huhu naḡanu badiva auki nega abigaḡa ḡahiḡava beraḡanu , “Ana di gahara vima?” Eige auki kironu, “Di Rohite, aka iaḡa inuhati dibanara; aka dibana dakamu ai gahara vima.” Iesu raki kironu, “Di mamoeve nitabata ḡahisa. ¹⁸ Riaḡa vara, daki a boriti ḡahima, a so ai aviehe, amu avaḡu ai ogona maḡeva kiare, renu amu a gahara viare ioava otima. Eduge a iahu ḡoiege, amu ai ade inuḡi hakivi, gerege koita be ramu ai ogonave mi ai kiare renu a mi a besibe ḡahare gabuhe a mi otito vara.” ¹⁹ (Au enaki rone makava ramu au hoḡe ḡumaḡe ra Dirava maḡe ḡahiḡa vara.) Gerege Iesu enaki rone itaharahe auki kironu, “Di itahe orogo.” ²⁰ Petero raki aniḡoi Iesu ḡahara vare ḡami maḡeve eraḡege auki au itahe otege; auka Iesu ḡaika gurami au ruta tamuta viege renu beraḡege, “Di Rohite, unuhuna negu ai bive kisa vima?” ²¹ Petero raki eraḡare, auki Iesu kironu, “Di Rohite, ama auna?” ²² Iesu raki kironu, “Auka da negu rosa auka maḡurivi gurami ate da ḡoiraḡi oroḡare, esemena a gure e uhu korahiva vima? Di itahe oroḡo!” ²³ Eige gava raki oḡo uhura hakivanu gerege koita iau ananave negu au ḡamite era beta hoḡe raḡira vara. Eduge, Iesu ra beta enakime auki ronu auka beta hoḡe raḡisa, eduge, “Da rosa auka maḡurivi gurami ate da oroḡare, esemena a e uhu korahiva vima?” ²⁴ Ḡami oramu ga o riaḡa ḡahi geige vara eige iauki gava maemanu, renu noka dibana au gare ra riaḡa vara. ²⁵ Eduge iaḡa dadaḡa vara Iesu raki kiogevenu; eige iauna iaḡa o inuhati maemanu, da anavare mata ketake ora beta bukava o inuhati bougeige vara.