¹ Opo lyapitire liyuva lya Sabbatha, Maria Magdalena, Maria vawina va Yakobusi naSarome kwaghulire shidumba ashi vavure kuya nakuyawaveka shimpu shaYesusa. ² Ngura-ngura yayinene muliyuva lyakuhovera mushivike, avayendi kuntoko(mbira) opo lyapumine liyuva. ³ Vaghambire kumwe naghunyendi, ''Are akatughandumwino ko liwe likatunde kulivero lya ntoko?'' ⁴ Opo vakengire kuwiru, ava mono ashi liwe vanalighandumunako, linene ngudu lyakaliro. ⁵ Ava ngene muntoko nakumona mukafumu wamwanuke ana dwato mulirwakani lyalikenu, ana shungiri kuruha rwa rulyo ntani vavo avatoromoka. ⁶ Ava tantere ''Mwashatoromoka, anwe kunakushana Yesus, waku Nazareta, ogho vapmpalire. Anavumbuka! Ghuye munderemo muno. Kengenu palivango opo vamu rangekire. ⁷ Ano yendenu, katanterenu varongwa vendi naPeturusi , ghuye kunakuyenda kumeho yenu ku Galileya. Okunya nko ngamukamumona, yira momo tupu amutantelire.'' ⁸ Ava rupuka mo nakuduka vatunde kuntoko, vavo kwankamine nakutetuka. Kundereko vaghambire kwakeheghuno mukonda ashi vakalire naghoma unene. ⁹ Ngura-ngura yayinene muliyuva lyakuhova kushivike, muruku opo avumbukire, pamuntango amonekire kwa Maria Magdalena, mogho avulire kutjida demone nta-mbiri. ¹⁰ Ayendi nakuka katantera ovo vakaliro kumwe naye nda vahokwera kuguva nakulira. ¹¹ Vayuvire ashi muyumi ntani ashi kamumona ghuye, ene ngoli kapivavipulire. ¹² Muruku rwavininke evi amoneke murupe rwakukushuva-shuva kukwavo vaviri vavo kunakuyenda varupuke mushirongo. ¹³ Ava yendi nakukatantera varongwa navantje vakuhupako, ano ngoli kapi vavipulire. ¹⁴ Yesusa muruku amonekere kovanya murongo naghumwe vavo vananyongamene pashitafura, avatughumukiri mughuhapuli wavo naghukukutu wadimutjima, morwa kapi vapulire ovo vamumonino muruku rwa po avumbukire kughufe. ¹⁵ Ava tantere, ''Yendenu mughudjuni naghuntje, nakukayuvita mbudi yaruhafo mughudjuni naghuntje. ¹⁶ Kehe ghuno wakupura nakumuyogha ngaparuka, ntani kehe ghuno wakupira kupura ngavamupangura. ¹⁷ Ovino viyivito ngaviyenda novo vakupura: Mulidina lyande ngava tjida demone. Ngava ghamba mumaraka ghamape. ¹⁸ Ngavadamuna mayoka namaghoko ghavo, ntani nange ngavanwwe vya ushungu, kapi ngaviva djona ghura. Ngava kamabeka maghoko ghavo pavaveli, ngavaveruka.'' ¹⁹ Muruku opo amanine kughamba navo Hompa, avamudamuna vamutware kuliwiru ntani akashungira kulighoko lya rulyo lya Karunga. ²⁰ Varongwa avakayenda nakuyuvita kehe kuno, shirugho ntjosho hompa kunakuyenda navo nakunkondopeka nkango muviyivito ovyo vayendire kumwe navo.