¹ Inayabanna dagiti sangapulo ket dua ken inikkanna isuda iti pannakabalin ken turay nga mangpapanaw kadagiti amin nga demonio ken mangagas kadagiti saksakit. ² Imbaonna isuda nga rumuar a mangikasaba iti pagarian ti Dios ken mangpaimbag kadagiti masakit. ³ Kinunana kadakuada "Dikayo mangitugot iti uray ania iti panagdalyasatyo- awan iti sarukod, awan iti pitaka, awan iti tinapay, awan iti kuarta wenno pagan-anay. ⁴ Aniaman nga sumrekanyo a balay, agtalinaed kayo sadiay agingga pumanaw kayo iti dayta nga lugar. ⁵ No maipanggep kadagiti saan nga umawat kadakayo, inton pumanaw kayo iti dayta a siudad, pagpagenyo dagiti tapok iti saksakayo kas pammaneknek nga maibusor kadakuada." ⁶ Ket pimmanawda nga napan kadagiti il-ili, nga mangikaskasaba iti naimbag nga damag ken mangpapaimbag kadagiti tattao iti sadinnoman. ⁷ Itatta ni Herodes nga gobernador ket nangeganna amin dagitoy a mapaspasamak, ket nariribukan unay, gapu ta ibagbaga dagiti dadduma nga ni Juan a Mammuniag ket nagungar manipud ken ni patay, ⁸ ken dagiti dadduma nagparang kano ni Elias, ken dagiti dadduma ket maysa kano kadagiti propeta idi un-unana nga panawen ket nagbiag manen. ⁹ Kinuna ni Herodes, "Pinapugotak ni Juan, ngem siasino daytoy maipapan kenkuana mangmangngegak?" Ket pinadas ni Herodes nga biruken isuna. ¹⁰ Idi nagsublin dagiti apostoles ken ni Hesus, imbagada kenkuana iti amin nga inaramidda. Intugotna isuda, ket napanda a sililimed iti siudad nga maawagan Betsaida. ¹¹ Ngem idi nangngegan dagiti adu nga tattao daytoy, sinurotda isuna. Inawatna ida ken nagsao kadakuada maipanggep iti pagarian ti Dios, ken innagasanna dagiti agkasapulan iti pannakapaimbag. ¹² Ket idi mumalemen, napan kenkuana dagiti sangapulo ket dua ket kinunada, "Pagawidemon dagiti tattao tapno mapanda kadagiti il-ili ken barbarrio nga agsapul iti pagdagusan ken makanda gapu ta adda tayo iti lugar nga awan matagtagitao." ¹³ Ngem kinunana kadakuada, "Ikkanyo ida ti kanenda." Kinunada, "Ti adda kadatayo ket lima laeng a tinapay ken dua a lames, malaksid no mapan kami gumatang iti taraon para kadagitoy nagadu a tattao." ¹⁴ (Adda idi ti agarup nga lima ribu a lallaki.) Kinunana kadagiti adalanna, "Pagtugawenyo isuda nga nagrupo iti tiglilima pulo." ¹⁵ Kasta ngarud ti inaramidda, ken pinatugawda amin nga tattao. ¹⁶ Innalana ti lima a tinapay ken ti dua nga lames, ket timmangad sadi langit, benendisionanna ket pinispisina, ken intedna kadagiti adalanna tapno maiwaras kadagiti tattao. ¹⁷ Nanganda amin ken napnekda, ket dagiti nabati nga taraon ket naurnong- adda sangapulo ket dua a basket kadagiti napispisi. ¹⁸ Napasamak a kabayatan nga agkarkararag ni Hesus iti bukodna, kaduana dagiti adalanna. Sinaludsodna kadakuada, a kunana, "Siasinoak kano iti panagkuna dagiti tattao?" ¹⁹ Simmungbatda, ket kinunada, "Juan nga Mammuniag. Ngem kuna dagiti dadduma nga Elias, ken kuna dagiti dadduma nga maysa kadagiti propeta idi un-unana nga panawen ket nagbiag manen. ²⁰ Ket kinunana kadakuada, "Ngem siasinoak iti panagkunayo?" Simmungbat ni Pedro a kunana, "Ti Kristo a naggapu iti Dios." ²¹ Ngem binalaaganna ken binilinna ida nga awan ti pangibagaanda iti daytoy, ²² a kunana, "Ti Anak ti Tao ket masapul nga agsagaba iti adu a banbanag ken umsien dagiti panglakayen ken panguloen a papadi ken eskriba, ket mapapatay ngem mapagungar iti maikatlo nga aldaw. ²³ Kinunana kadakuada amin, "No siasinoman ti mayat nga umay kaniak, masapul ngarud nga lipatenna ti bagina ken baklayenna ti krusna iti inaldaw ket sumurot kaniak. ²⁴ Siasinoman ti mangpadas nga mangispal iti biagna ket mapukawna, ngem siasinoman nga mangpukaw iti biagna gapu kaniak, ket maispalna. ²⁵ Ania ti magunguna iti tao, no matagikuana ti intero a lubong, ngem mapukawna met wenno maawan kenkuana iti biagna? ²⁶ Siasinoman ti mangibain kaniak ken kadagiti sasaok, isu ibainto met ti Anak ti Tao inton umay isuna iti dayagna ken iti dayag ti Ama ken dagiti nasantoan nga angheles. ²⁷ Ngem sipupudno nga ibagak kadakayo, adda dagiti dadduma kadakayo nga agtaktakder ditoy a saandanto a maramanan ti patay sakbay a makitada ti pagarian ti Dios." ²⁸ Ket napasamak nga iti walo nga aldaw kalpasan nga sinarita ni Hesus dagitoy a sasao, inkuyog na ni Pedro, ni Juan, ken Santiago, ket simmang-atda iti bantay tapno agkararag. ²⁹ Kabayatan iti panagkararagna, nagbaliw ti langa ti rupana, ken dagiti kawesna ket nagbalin a puraw ken makasisirap. ³⁰ Pagammoan, adda dua nga lallaki a makisarsarita kenkuana, ni Moises ken Elias, ³¹ nga nadayag iti langada, nagsasaritaanda ti maipanggep iti ipapanawna, nga umadanin nga tungpalenna idiay Jerusalem. ³² Itatta, ni Pedro ken dagiti kakadduana ket adda nga matmaturogda, ngem idi nakariingdan, nakitada iti dayagna ken dagiti dua nga lallaki a makipagtaktakder kenkuana. ³³ Kabayatan nga umad-adayuda ken ni Hesus, kinuna ni Pedro kenkuana, "Apo, nasayaat ta adda kami ditoy. Mangaramid tayo iti tallo nga kalapaw, maysa kenka, maysa para ken ni Moises, ken maysa para ken ni Elias." (Di na ammo ti ibagbagana.) ³⁴ Kabayatan a sarsaritaenna dagitoy nga banbanag, ti ulep ket bimmaba a nanglinong kadakuada, ket nagbutengda kabayatan ti pananglawlaw ti ulep kadakuada. ³⁵ Adda timek nga naggapo iti ulep, a kunana, "Daytoy ti pinilik nga Anakko. Dumngegkayo kenkuana." ³⁶ Idi nalpas iti timek, nsakarakanda a maymaysan ni Hesus. Nagulimekda ket kadagidiay nga al-aldaw, awan ti nangibagaanda kadagiti banbanag a nakitada. ³⁷ Iti simmaruno nga aldaw, idi nakababadan manipud iti bantay, simmabat ti adu nga tattao kenkuana. ³⁸ Pagammoan, maysa a a tao manipud kadagiti bunggoy ti tattao ti nagpukkaw a kunana, "Manursuro, ipakpakaasik kenka nga kitaem kuma ti anak ko nga lalaki, ta maymaysana nga anak ko." ³⁹ Kitaem, parparigaten ti espiritu ken kella-at nga agikkis isuna; pagkissiwenna ken paglabutabenna ti ngiwatna. Saanna a panawan ket dangranna unay. ⁴⁰ Nagpakpakaasiak kadagiti adalam nga pilitenda nga papanawen kenkuana, ngem saanda met a kabaelan." ⁴¹ Simmungbat ni Hesus ket kinunana, "Dakayo nga saan a mamatpati ken managdakdakes a kaputotan, kasano pay kabayag a masapul nga makipagtalinaedak kadakayo ken iti panaganusko kadakayo? "Iyegmo ditoy ti anak mo." ⁴² Iti iyaasideg ti ubing a lalaki, impurwak ti demonio isuna ken pinagkissiwna ti napalalo. Ngem tinubngar ni Hesus ti narugit nga espiritu ket pinaimbagna ti ubing a lalaki, ken insubli iti amana. ⁴³ Ket nasdaawda amin iti kinabileg ti Dios. Ngem kabayatan nga masmasdaawda kadagiti amin a banbanag nga inaramidna, kinunana kadagiti adalanna, ⁴⁴ "Bay-anyo nga dagitoy a balikas ket sumrek iti kaunggan ti lapayagyo:Ta iti Anak ti Tao ket maiyawat kadagiti ima dagiti tattao." ⁴⁵ Ngem saanda nga naawatan ti kayat a sawen daytoy a balikas. Ta nailimed kadakuada, isu nga saanda a maawatan ti kaipapanna, ngem mabuteng da a mangsaludsod iti daytoy nga balikas. ⁴⁶ Ket nangrugi ti maysa nga riri kadakuada no siasino ti katatan-okan. ⁴⁷ Ngem ni Hesus, gapu ta ammo na no ania ti kunkunaen iti puspusoda, nangayab iti bassit nga ubing, ket inyabayna kenkuana, ⁴⁸ ket kinunana kadakuada, "No adda umawat iti daytoy bassit nga ubing iti naganko, siak met laeng iti aw-awatenna; ket no adda umawat kaniak, aw-awatenna metlaeng ti nangibaon kaniak. Ta ti tao nga kababaan kadakayo amin ket isu iti katatan-okan." ⁴⁹ Simmungbat ni Juan, "Apo, adda ti nakitami nga mangpakpaksiat iti demonio babaen iti naganmo ket pinasardeng mi isuna, gapu ta saan met nga sumursurot kadatayo." ⁵⁰ Ngem kinuna ni Hesus kenkuana, "Saanyo nga pasardengen isuna, agsipud ta siasinoman nga saan a mangbusor kadakayo ket para kadakayo." ⁵¹ Bayat nga umas-asidegen ti al-aldaw nga yuulina sadiay langit, inkeddengna ti mapan idiay Jerusalem. ⁵² Nangibaon isuna iti mensahero nga immuna ngem isuna, ket napanda ken simrekda iti maysa a barrio idiay Samaria tapno isaganada amin para kenkuana. ⁵³ Ngem dagiti tattao sadiay ket saanda nga inawat isuna gapu ta inkeddengna a mapan idiay Jerusalem. ⁵⁴ Ket idi nakita daytoy dagiti adalan na nga ni Santiago ken Juan, kinunada, "Apo, kayat mo kadi nga mangbilin kami ti apoy nga bumaba manipud langit ket dadaelenna isuda?" ⁵⁵ Ngem ni Hesus timmalyaw ken tinubngar na isuda, ⁵⁶ ket napanda iti sabali nga barrio. ⁵⁷ Bayat nga magmagnada iti dalanda, adda ti nagkuna kenkuana, "Sumurutak kenka uray sadino ti papanam." ⁵⁸ Kinuna ni Hesus kenkuana, " Dagiti lobo ket adda abutda, ken dagiti billit iti tangatang ket adda ubongda, ngem iti Anak ti Tao ket awan ti sadinnoman a pangiiddaanna iti ulo na." ⁵⁹ Ket kinunana iti sabali a tao, "Sumurot ka kaniak." Ngem kinunana, "Apo, palubosannak pay nga umuna a mapan ipunpon ni tatangko." ⁶⁰ Ngem kinunana kenkuana, "Bay-am nga dagiti natay ti mangipunpon kadagiti bukodda a minatay. Ngem no maipapan kenka, mapanka ket ipakaammom iti amin a disso ti pagarian ti Dios." ⁶¹ Sabali manen nga tao ti nagkuna, "Sumurotak kenka, Apo, ngem ipalubos mo pay nga umuna a mapanak agpakada kadagiti kabbalayko." ⁶² Ngem kinuna ni Hesus kenkuana, "Awan ti siasinoman a kalpasan nga ingkabilna iti imana iti arado ket agtalyatalyaw iti malikudanna ti maikari iti Pagarian ti Dios."