¹ Immay iti maysa nga aldaw kabayatan nga agisursuro ni Hesus kadagiti tattao nga adda iti templo ken ikaskasabana ti ebanghelio ket immay kenkuana dagiti panguloen a papadi ken dagiti eskriba nga kaduada dagiti panglakayen. ² Nagsaritada, a kunada kenkuana, "Ibagam kadakami no ania ti kalintegam a mangaramid kadagitoy a banbanag? Wenno siasino ti nangted iti daytoy a kalintegan kenka?" ³ Simmungbat isuna ket kinunana kadakuada, "Uray siak adda met saludsodko kadakayo ket ibagayo kaniak. ⁴ Ti panangbautisar ni Juan: naggapu kadi sadi langit wenno naggapu iti tattao?" ⁵ Inkalinteganda iti tunggal maysa, a kunada, "No ibagatayo nga, 'Naggapu sadi langit,' ibagana nga, 'Apay ngarud a dikayo namati kenkuana?' ⁶ Ngem no ibagatayo nga, 'Naggapu iti tao,' batoen datayo dagiti tattao, gapu ta naallukoyda nga ni Juan ket maysa a propeta." ⁷ Isu nga insungbatda a dida ammo ti naggapuanna. ⁸ Kinuna ni Hesus kadakuada, "No kasta ngarud saanko met nga ibaga no naggapuan ti kalintegak a mangaramid kadagitoy a banbanag." ⁹ Imbagana kadagiti tattao daytoy a pangngarig, "Adda maysa a tao a nagmula iti kaubasan, impaupana iti agu-ubas, ket napan ti sabali a pagillian iti nabayag a tiempo. ¹⁰ Iti naituding a tiempo ket nangibaon isuna iti adipen nga mapan idiay agu-ubas, a masapul nga itedda kenkuana ti bunga iti kaubasan. Ngem kinabkabilda isuna, ken pinapanawda nga ima-ima. ¹¹ Nangibaon ngarud isuna iti sabali pay nga adipen ket kinabkabilda manen, imbabainda, ken pinapanawda isuna nga ima-ima. ¹² Nangibaon manen isuna iti maikatlo pay ngem sinugsugatanda laeng, sadanto impuruak isuna iti ruar. ¹³ Isu nga kinuna ti akinkukua iti kaubasan, 'Ania ti aramidek? Ibaonko laengen ti patpatgek nga anak. Nalabit a padayawanda isuna.' ¹⁴ Ngem idi nakita isuna dagiti mangay-aywan ti ubas, nagtutulagda a kunada, 'Daytoy ti agtawid. Papatayentayo isuna, tapno ti tawid ket matagikuatayo.' ¹⁵ Impuruakda isuna iti ruar ti kaubasan ken pinapatayda isuna. Ania ngarud ti aramiden ti akinkukua ti kaubasan kadakuada? ¹⁶ Umay ket dadaelenna dagitoy nga mangay-aywan iti ubas, ken itedna ti kaubasan iti sabali."Ket idi nangngegda dayta, kinunada,"Saan nga ipalubos ti Dios!" ¹⁷ Ngem ni Hesus kinitana ida, ket kinunana, "Ania ti kayat a sawen dayta a nakasurat: 'Ti bato nga imbelleng dagiti nagpatakder iti balay ket nagbalin a pasuli'? ¹⁸ Siasinoman a matinnag iti dayta a bato ket maburak, ngem siasinoman a pakaitupakanna, ket marumek." ¹⁹ Isu nga dagiti eskriba ken dagiti panguloen a papadi ket nagsiim tapno tiliwenda isuna iti dayta nga oras, ta ammoda nga imbagana daytoy a pangngarig a maibusor kadakuada. Ngem nagbutengda kadagiti tattao. ²⁰ Pinaliiwda isuna a naimbag, nangibaonda iti tattao nga agsiim a nagpammarang a nalinteg, tapno makabirokda iti kammalina babaen iti panagsaona, nga panggapuanda kenkuana a mangiyawat iti pannangituray ken paglintegan iti gobernador. ²¹ Nagdamagda kenkuana a kunada, "Maestro, ammomi nga ti ibagbaga ken isursurom ket umiso, ken awan pabpaboram a siasinoman, ngem isurom ti pudno maipanggep ti wagas ti Dios. ²² Maiparit kadi nga agbayad kami iti buis ken ni Cesar, wenno saan?" ²³ Ngem naawatan ni Hesus ti kinasikapda, ket kinunana kadakuada, ²⁴ "Mangiparangkayo kaniak iti denario. Siasino ti akin ladawan ken akinnagan iti daytoy?" Insungbatda, "Cesar." ²⁵ Kinunana kadakuada, "Itedyo ken ni Cesar dagiti banag a kukua ni Cesar, ken iti Dios, dagiti banag a kukua ti Dios." ²⁶ Awanen nabalinanda nga nakabirok iti kamalina kadagiti imbagana iti sangoanan dagiti tattao, ngem masmasdaawda iti insungbatna, ket timmalnada. ²⁷ Immasideg kenkuana dagiti sumagmamano nga Saduseo, isuda dagiti mangibagbaga nga awan ti panagungar, ²⁸ ket dinamagda kenkuana, a kunada, "Maestro, insurat ni Moses kadatayo a no ti maysa a lalaki ket natay ti kabsatna a lalaki, ket addaan asawa, ngem awanan anak, nasken nga asawaen ti lalaki ti asawa iti kabsatna, ken tapno aganakda para iti kabsatna a lalaki. ²⁹ Adda pito nga lallaki nga agkakabsat ket ti inauna nangasawa, ngem natay nga awan putotna, ³⁰ kasta met ti maikadua. ³¹ Ti maikatlo innalana isuna, ket kasta metlaeng nga dagiti pito ket natayda nga awan inbatida nga annak. ³² Saan nga nagbayag ket natay diay babai. ³³ Inton panagungar, siasino ti akin asawa kenkuana? Ta aminda nga pito ket nagbalinda nga asawana." ³⁴ Kinuna ni Hesus kadakuada, "Dagiti annak ditoy lubong ket agaassawa ken maitedda a maasawa. ³⁵ Ngem dagiti napili a maikari nga mangawat iti panagungar manipud iti patay ket saanen nga agasawa wenno maited a maasawa. ³⁶ Ket saandan nga matay, gapu ta kasla da kadagiti angheles ken kadagiti an-annak ti Dios, nagbalinda nga annak iti panagungar. ³⁷ Ngem gapu ta dagiti natay ket mapagungar, uray ni Moses ket impakitana, iti lugar maipapan iti sumsumged a kayo, nga sadiay ket inawaganna ti Apo nga Dios ni Abraham ken Dios ni Isaac ken Dios ni Jacob. ³⁸ Isuna ita ket saan nga Dios dagiti natay, ngem Dios dagiti sibibiag, gapu ta amin ket agbiag kenkuana." ³⁹ Simmungbat dagiti dadduma nga eskriba, "Maestro, nasayaat unay ti sungbatmo." ⁴⁰ Ta saandan a maitured ti agdamag kenkuana iti dadduma pay a salsaludsod. ⁴¹ Kinuna ni Hesus kadakuada, "Kasano nga naibagada a ti Kristo ket anak ni David? ⁴² Ta ni David nga mismo ket imbagana iti libro dagiti Salmo, Kinuna ti Apo iti Apok, 'Agtugawka iti makannawanko, ⁴³ aginggana a mapagbalinko ti kabusormo a pagbatayan dagiti sakam.' ⁴⁴ Inawagan ngarud ni David ni Kristo nga 'Apo', kasano ngarud nga nagbalin isuna nga anak ni David?" ⁴⁵ Iti panagdengngeg dagiti amin nga tattao kinunana kadagiti adalanna, ⁴⁶ "Agalwadkayo kadagiti eskriba, nga pagaayatda ti agbadbado iti atiddug nga pagan-anay, ken pagaayatda ti madaydayaw iti kaaduan ti tattao, ken kangatoan a tugtugaw iti sinagoga, ken kangatoan nga lugar iti piesta. ⁴⁷ Gamgamenda dagiti babbalay dagiti balo, ken agpampammarangda nga atiddog ti kararagda. Dagitoy ket umawat iti nadagdagsen a pannusa."