¹ Kinuna pay ni Hesus kadagiti adalanna, "Adda maysa a baknang nga addaan iti mangimatmaton, ket naipadamag kenkuana nga busbusbosen ti mangimatmaton dagiti kinabaknangna. ² Inayaban ngarud ti baknang ti mangimatmaton ket kinunana, 'Ania daytoy a madamdamag ko maipanggep kenka? Itedmo kaniak ti listaan dagiti amin nga naaramidam, ta saan kan a mangimaton.' ³ Kinuna ti mangimatmaton iti bagina, 'Ania ti nasken nga aramidek, agsipud ta alaenen ti amongko iti trabahok nga mangimaton? Saanko met nga kabaelan ti agkali, ken mabainak met nga agpakaasi. ⁴ Ammokon ti aramidek, tapno inton maikkatak iti trabahok, awatendakto dagiti tattao iti balbalayda.' ⁵ Inayaban ngarud ti mangimatmaton ti tunggal maysa kadagiti nakabulod iti amongna ket dinamagna iti immuna, 'Mano ti binulodmo iti amongko?' ⁶ Ket kinunana, 'Sangagasut a rukod iti lana ti olibo,' Ket kinunana kenkuana, 'Alaem ti listaan, agtugawka nga dagus ket isuratmo iti limapulo.' ⁷ Ket kinuna ti mangimatmaton iti maysa, 'Ket mano ti utangmo?' Kinunana, 'Sangagasut a rukod iti trigo.' Kinunana kenkuana, 'Alaem ti listaam, ket isuratmo ti walopulo.' ⁸ Dinayaw ngarud ti baknang ti saan nga nalinteg a mangimatmaton gapu iti inaramidna a kinasikap. Ta dagiti annak daytoy a lubong ket ad-adda iti kinasikapda no maipanggep kadagiti tattaoda ngem dagiti annak iti lawag. ⁹ Ibagak daytoy kadakayo, makigayyemkayo babaen kadagiti kinabaknang ditoy lubong tapno inton awanen, mabalin a pasangbayen dakayo idiay agnanayon a pagtaengan. ¹⁰ Siasinoman a mapagtalkan iti bassit ket mapagtalkan met iti adu, ken siasinoman ti saan nga mapagtalkan iti bassit ket saan met a mapagtalkan iti adu. ¹¹ No saankayo a mapagtalkan iti panangusaryo iti kinabaknang ditoy lubong, siasino ti mangitalek kadakayo iti pudno a kinabaknang? ¹² Kastamet no saankayo a mapagtalkan iti banag a kukua ti sabali, siasino ti mangted iti kuarta iti bukodyo? ¹³ Awan adipen a mabalinna ti agserbi iti duwa nga amo, ta masapul nga guraenna ti maysa ket ipategna ti maysa, wenno agbalin a napasnek iti maysa ket liklikanna ti maysa. Saankayo nga makapagserbi iti Dios ken iti kinabaknang." ¹⁴ Ita dagiti Fariseo, a mangay-ayat iti kuarta, nanggegda dagitoy, ket pinabpabainanda isuna. ¹⁵ Ket imbagana kadakuada, "Palintegenyo dagiti bagbagiyo iti imatang dagiti tattao, ngem ammo ti Dios ti puspusoyo. Agsipud ta ti nangato iti imatang dagiti tattao ket makaparurod iti imatang ti Dios. ¹⁶ Maar-aramat ti linteg ken dagiti propeta agingga nga immay ni Juan. Manipud idi, ti naimbag a damag maipapan iti pagarian ti Dios ket naikasaba, ken tunggal maysa ket padpadasenda nga ipilit ti wagas da iti daytoy. ¹⁷ Ngem nalaklaka a mapukaw ti langit ken daga ngem iti pannakaawan-serbi ti maysa a letra iti linteg. ¹⁸ Tunggal maysa a mangisina iti asawana a babai ken mangasawa iti sabali ket nakikamalala, ken siasinoman a mangasawa iti babai nga naisina iti asawana ket nakikamalala. ¹⁹ Itatta adda maysa a baknang a nakakawes iti maris-lila ken pino a lino ken inaldaw a ragragsakenna iti kinabaknangna. ²⁰ Adda met maysa nga agpalpalama a managan Lazaro nga nakatugaw iti ruanganna, ken napunno iti gaddil, ²¹ ket kanayon nga tartarigagayanna a mangan iti aniaman nga matinnag iti lamisaan ti baknang. Uray pay dagiti aso ken umayda mangdilpat kadagiti gaddilna. ²² Ti napasamak ket natay ti agpalpalama ket impan dagiti anghel iti abay ni Abraham. Natay met ti baknang ket naitabon, ²³ ket idiay Hades, idi madama nga agsagsagaba, inngatona iti panagkitana ket nakitana iti adayo ni Lasaro a nakasanggir iti abay ni Abraham. ²⁴ Ket insangitna a kuna, 'Ama Abraham, kaasiannak koma ket ibaonmo ni Lazaro, ta basaenna ti murdong iti ramayna ti danom ket umayna palamiisen daytoy dilak, ta agsagsagabaak unay ditoy iti apuy.' ²⁵ Ngem insungbat ni Abraham, 'Anak, laglagipem nga inawatmo dagiti agkakaimbag a banbanag iti unos ti panagbiagmo, ket inawat met ni Lazaro dagiti agkakadakes a banbanag. Ngem ita ket adda ditoy a maliwliwa, ²⁶ ket addaka iti nakaro a panagrigat. Ken malaksid kadagitoy, adda dakkel a nagbabaetan ti lugar, tapno dagiti adda ditoy a kayatna ti bumallasiw ket saan a makapan dita, ken awan makaumay ditoy nga aggapu dita.' ²⁷ Kinuna ti baknang, 'Agpakpakaasiak kenka, Ama Abraham, nga ibaonmo isuna idiay balay ni amak - ²⁸ ta adda lima nga kakabsat ko a lallaki - tapno maballaaganna isuda, tapno saanda met nga umay iti daytoy a lugar nga pagtutuokan.' ²⁹ Ngem kinuna ni Abraham, 'Adda kadakuada ni Moises ken dagiti propeta; bay-am nga dumngegda kadakuada.' ³⁰ Insungbat ti baknang, 'Saan, Ama Abraham, ngem no adda maysa a mapan kadakuada manipud kadagiti natay, agbabawida.' ³¹ Ngem imbaga ni Abraham kenkuana, 'No saanda nga dumngeg kenni Moises ken kadagiti propeta, saanda met laeng nga makumbinsi uray adda agbiag manipud ken patay.'