¹ Iti dayta a tiempo, adda dagiti tattao sadiay nga nangibaga kenkuana ti maipanggep kadagiti taga-Galilea nga ti darada ket inlaok ni Pilato kadagiti mismo a datonda. ² Simmungbat ni Hesus ket kinunana kadakuada, "Ipagarupyo kadi nga dagitoy nga taga- Galilea ket ad-adda nga managbasol ngem dagiti dadduma a taga-Galilea gapu ta nagsagabada iti kastoy a wagas? ³ Saan, ibagak kadakayo. Ngem no dikay agbabawi, aminkayo ket mapukaw a kas kadakuada. ⁴ Wenno dagidiay sangapulo ket walo a tattao idiay Siloam nga nagaburan idi narba ti torre ket isu iti nakatayanda, ipagarupyo kadi a nadakdakesda ngem kadagiti dadduma a tattao idiay Jerusalem? ⁵ Saan, kunak. Ngem no dikay nga agbabawi, mapukawkayto met amin." ⁶ Imbaga ni Hesus daytoy a pangngarig, "Adda iti maysa a tao nga nagmula iti igos idiay kaubasanna ket nagbiruk iti bungana ngem awan nasarakanna. ⁷ Kinuna ti lalaki iti hardinero, 'Kitaem, tallo a tawenen nga um-umayak tapno agbirukak iti bunga daytoy a kayo ti igos ngem awan masarakak. Pukanemon. Apay nga ipalubos a sayangenna ti daga?' ⁸ Simmungbat iti hardinero ket kinunana, 'Bay-am pay laeng iti daytoy a tawen ta kaliak iti aglawlawna sakunto abunoan iti rugit. ⁹ No agbunga iti daytoy sumaruno nga tawen, nasayaat; ngem no saan, pukanemton!'" ¹⁰ Itatta mangisursuro ni Hesus iti maysa kadagiti sinagoga iti Aldaw ti Panaginana. ¹¹ Pagammoan, adda iti babai sadiay a sangapulo ket walo a tawenen nga lugluganan iti dakes nga espiritu iti panagkapsut. Nagbalin a kubbo ket saan a pulos nga makatakder iti nasayaat. ¹² Idi nakita ni Hesus ti babai, inayabanna ket kinunana, "Nawaya-wayaankan iti pagkapuyam." ¹³ Impatayna dagiti imana iti babai, ket dagus a timmakder iti nasayaat ket indaydayawna iti Dios. ¹⁴ Ngem nakapungtot ti agturturay iti sinagoga gapu ta nangpaimbag ni Jesus iti Aldaw ti Panaginana. Isu nga simmungbat ti mangiturturay ket kinunana kadagiti adu a tattao, "Adda iti innem nga aldaw a masapul nga agtrabaho. Umaykayo ken mapaimbag kayo kadagita, saan ketdi nga iti Aldaw ti Panaginana." ¹⁵ Simmungbat ti Apo kenkuana ket kinunana, "Managinsisingpet! Diyo kadi aya warwaran dagiti asno wenno bakayo iti naikulunganda iti Aldaw ti Panaginana tapno painumenyo ida? ¹⁶ Kasta met iti daytoy a babai nga anak ni Abraham, nga inbalud ni Satanas ti babai iti sangapulo ket walo a tawen, saan kadi aya nga mabalin a mawayawayaan iti pannakabaludna iti Aldaw ti Panaginana?" ¹⁷ Idi kinunana dagitoy a banbanag, amin nga nangbabalaw kenkuana ket nabainan, ngem nagragragsak dagiti tattao maipanggep kadagiti amin a nakaskasdaaw nga banbanag nga inaramidna. ¹⁸ Ket Kinuna ni Hesus, "Ania ti kalanglanga iti pagarian ti Dios, ken ania iti mabalinko a pangiyarigan? ¹⁹ Daytoy ket kasla bukel iti mustasa nga innala iti maysa a lalaki ket impurwakna idiay hardinna, ket dimmakkel daytoy a nagbalin iti dakkel nga kayo, ken dagiti bilbillit sadi langit ket nagnaedda iti sangsangana." ²⁰ Kinunana manen, "Ania ti pangiyarigak iti pagarian ti Dios? ²¹ Daytoy ket kasla iti lebadura nga innala iti maysa a babai ket inlaokna iti tallo a takal nga arina aginggana a nalebaduraan daytoy." ²² Bimmisita ni Hesus iti tunggal ili ken barrio, nangisursuro ken nagturong iti dalan a mapan Jerusalem. ²³ Adda nagkuna kenkuana, "Apo, manmano laeng kadi a tattao iti maisalakan?" Isu a kinunana kadakuada, ²⁴ "Ikarigatanyo ti sumrek iti nailet a ruangan, gapu, ta ibagak kadakayo, adunto iti mangpadas a sumrek, ngem saandanto a kabaelan nga makastrek. ²⁵ Inton tummakderen ti makinkukua ti balay ken irikepna ti ruangan, agtakderkayonto iti ruar ket agtuktokkayo iti ridaw ken ibagayo, 'Apo, Apo, pastrekennakami.' Sumungbatto ket ibagana kadakayo, 'Saankayo nga am-ammo wenno sadinno ti naggapuanyo.' ²⁶ Ket ibagayonto, 'Nangankami ken imminom iti sangngoanam ken nangisuroka kadagiti kalkalsadami. ²⁷ Ngem isungbatnanto, 'Ibagak kadakayo, saanko nga ammo no sadinno iti naggapuanyo. Umadayokayo kaniak, dakayo nga agar-aramid iti dakes!' ²⁸ Addanto iti panagsasangit ken panagngaretnget iti ngipen inton makitayo da Abraham, Isaac, Jacob ken dagiti amin nga propeta idiay pagarian ti Dios, ngem dakayo ket naitapuakkayo iti ruar. ²⁹ Sumangpetdanto manipud daya, laud, amianan ken abagatan ket agragragsakdanto iti pagarian ti Dios. ³⁰ Ammoenyo daytoy, dagiti saan unay a napateg ket isuda ti umuna, ken dagiti kapapatgan ket isu iti maudinto." ³¹ Iti dayta, adda dagiti Pariseo nga immay ket kinunada kenkuana, "Mapanka ket pumanawka ditoy ta ni Herodes ket kayatnaka a papatayen." ³² Kinuna ni Hesus, "Mapankayo ket ibagayo iti dayta mauyong nga aso, 'Kitaem, paksiatek dagiti demonio ken mangpapaimbagak itatta ken inton bigat, ket iti maikatlo nga aldaw malpas konto iti panggepko.' ³³ Iti aniaman a mapasamak, masapul nga itultuloyko latta iti ar-aramidek ita ken inton bigat ken iti sumarsaruno nga aldaw, gapu ta saan nga rumbeng a mapapatay ti propeta iti ruar ti Jerusalem. ³⁴ Jerusalem, Jerusalem, nga nangpapatay kadagiti propeta ken nangbatbato kadagiti naibaon kenka. Namin-ano nga tinarigagayak nga ummongen dagiti an-annakmo a kas iti panagurnong ti upa kadagiti piyekna iti siruk dagiti payyakna, ngem saanyo nga kinayat daytoy. ³⁵ Kitaenyo, nabaybay-an ta balayyo. Ibagak kadakayo, saandakto a makita aginggana nga ibagayo, 'Nabendisionan ti tao nga umay iti nagan ti Apo.'"