¹ Itatta, kalpasan dagitoy a banbanag, nangdutok ti Apo iti pitopulo a dadduma pay, ket imbaonna ida a sagdudua nga umuna kenkunana iti tunggal siudad ken lugar nga panggepna mismo a papanan. ² Kinunana kadakuada, "Nagadu iti maapit, ngem bassit dagiti trabahador. Ngarud, dawatenyo iti Apo ti panagapit tapno mangibaon iti adu nga trabahador iti panagapitna. ³ Mapankayon iti dalanyo. Kitaenyo, ibaonkayo a kas kadagiti kordero iti nagtetengngaan dagiti lobo. ⁴ Saan kayo nga mangitugot iti kuarta, wenno bag, wenno sandalyas, ken saan kayo nga kumablaaw iti siasinoman iti dalan. ⁵ Iti sadinoman nga balay a sumrekanyo, ibagayo nga umuna, 'Kapia koma ti maadda iti daytoy nga balay!' ⁶ No adda ti tao a makikapia sadiay, mapan kenkuana dayta nga kapiayo, ngem no awan, agsubli kadakayo. ⁷ Agtalinaed kayo iti dayta nga balay, makipangan ken makiinum iti aniaman nga idasarda, agsipud ta iti trabahador ket adda karbenganna iti tangdanna. Saan kayo nga agalis alis ti balay. ⁸ Sadinoman nga siudad a sumrekanyo, ket awaten dakayo, kanenyo no ania iti maidasar kadakayo, ⁹ ken paimbagenyo dagiti masakit nga adda sadiay. Ibagayo kadakuada, 'Ti pagarian ti Dios ket immasidegen kadakayo.' ¹⁰ Ngem sadinoman nga siudad a sumrekanyo, ket saan dakayo nga awaten, rumuar kayo kadagiti kalkalsadana ket ibagayo, ¹¹ 'Uray pay dagiti tapok nga nagtaud iti siudadyo nga dimket kadagiti saksakami ket punasenmi a maibusor kadakayo! Ngem ammuenyo daytoy: Ti pagarian ti Dios ket immasidegen.' ¹² Ibagak kadakayo nga inton dumteng ti aldaw ti panagukom ket ad-adda nga maibturan para kadagiti Sodoma ngem para iti dayta nga siudad. ¹³ Asika pay, Corazin! Asika pay, Betsaida! No dagiti nakaskasdaaw nga aramid a napasamak kadakayo ket naaramid sadiay Tiro ken Sidon, nagbabawida koman idi pay laeng, a nakatugaw iti sako ken dapdapo. ¹⁴ Ngem ad-adda nga maibturan dagiti Tiro ken Sidon inton pannakaukom ngem kadakayo. ¹⁵ Sika, Capernaum, panpanunotem kadi nga maitan-okka idiay langit? Saan, maipababa kanto nga maipan idiay hades. ¹⁶ Iti dumdumngeg kadakayo ket dumdumngeg met kaniak, ket iti manglaksid kadakayo ket linaksiddak met, ken iti manglaksid kaniak ket linaksidna ti nangibaon kaniak." ¹⁷ Dagiti pitopulo ket nagsubli a siraragsak, kunada, "Apo, uray dagiti demonio ket nagpaituray kadakami babaen iti naganmo." ¹⁸ Kinuna ni Hesus kadakuada, "Binuybuyak ti pannakatinnag ni Satanas a kas kimat a naggapo idiay langit. ¹⁹ Kitaenyo, intedko kadakayo iti turay nga mangbaddek kadagiti uleg ken manggagama, ken mangituray kadagiti amin nga pannakabalin ti kabusor, ket awan ti makadangran kadakayo iti uray aniaman a wagas. ²⁰ No pay kasta ket saan kayo nga agragsak laeng iti daytoy, nga dagiti espiritu ket nagpaituray kadakayo, ngem ad-adda pay nga agragsak kayo ta naikitikiten dagiti nagnaganyo sadi langit." ²¹ Iti dayta met laeng nga oras ket kasta launay ti ragsakna iti Espiritu Santo, ket kinunana, "Daydayawen ka, O Ama, Apo iti langit ken daga, gapu ta inlimed mo dagitoy a banbanag kadagiti nasirib ken addaan pannakaawat, ket impakaammom dagitoy kadagiti saan nga nasuruan, kas kadagiti ubbing nga babassit. Wen, Ama, ta daytoy ket makaay-ayo iti imatang mo." ²² "Amin nga banbanag ket naitalek kaniak manipud ken ni Amak, ket awan makaammo no siasino ti Anak no di laeng ti Ama, ken awan makaammo no siasino ti Ama no di laeng ti Anak ken iti siasinoman nga pilien ti Anak nga pangipakaammoan kenkuana." ²³ Simmango kadagiti adalanna ket kinunana iti nalimed, "Nabendisionan dagiti makakita kadagiti banbanag a nakitayo. ²⁴ Ibagak kadakayo, nga adu a propeta ken ar-ari ti nangtarigagay nga makakita kadagiti banbanag nga makitkitayo, ngem saanda nga nakita dagidiay, ken mangngegan dagiti banbanag nga mangmangngegyo, ngem saanda nga nangngegan dagidiay." ²⁵ Pagammoan, maysa nga eksperto iti linlinteg dagiti Hudio ti timmakder ket pinadasna isuna, kinunana, "Manursuro, ania ti aramidek tapno matawidko ti biag nga agnanayon?" ²⁶ Kinuna ni Hesus kenkuana, "Ania ti naisurat iti linteg? Kasanu ti panangbasam iti dayta?" ²⁷ Simmungbat, ket kinunana, "Masapul nga ayatem ti Apo a Diosmo iti amin a pusom, iti amin a kararuam, iti amin a pigsam, ken iti amin a panunot mo, ken ti kaarrubam a kas iti bagim." ²⁸ Ket kinuna ni Hesus kenkuana, "Kusto dayta insungbatmo. Aramidem daytoy, ket agbiagka." ²⁹ Ngem ni isuna, iti panangtarigagayna nga ikalintegan iti bagina, kinunana ken ni Hesus, "Siasino ti kaarrubak?" ³⁰ Simmungbat ni Hesus a kunana, "Adda tao nga sumalsalog manipud Jerusalem nga mapan idiay Jerico. Nasabatna dagiti agtatakaw, nga isu iti nangala kadagiti amin nga adda kenkuana, ken kinabkabilda, ken imbatida nga matmatayen. ³¹ Nairanrana met a sumalsalog iti dayta nga dalan ti maysa a padi, ket idi nakitana isuna, linabasanna a nagna iti bangir ti dalan. ³² Kasta met ti maysa a Levita, idi nakadanun iti dayta a lugar ket nakitana ti lalaki, linabasanna a nagna iti bangir ti dalan. ³³ Ngem adda maysa a Samaritano, kabayatan ti panagdalyasatna, nakdanon iti ayanna. Idi nakitana isuna, natignay iti asina . ³⁴ Inasitganna ket binaredbedanna dagiti sugsugatna, binukbukbukanna iti lana ken arak dagitoy. Insakayna iti bukodna nga ayup, sana impan iti balay a pagdagdagusan, ken inaywananna isuna. ³⁵ Iti sumaruno nga aldaw ket nangiruar isuna iti dua nga denario, ken intedna iti agpadpadagus, ket kinunana, 'Aywanam isuna, ket aniaman nga sobra a magastom, inton agsubliak, bayadankanto.' ³⁶ Siasino kadagiti tallo iti panagkunam nga kaarruba daytoy nga tao a dinangran dagiti agtatakaw?" Kinuna ti eksperto, "Daydi nangipakita kenkuana iti kaasi." ³⁷ Kinuna ni Hesus kenkuana, "Mapanka ket isu met laeng ti aramidem." ³⁸ Itatta, bayat nga agdaldalyasatda, simrek isuna iti maysa nga barrio, ket adda maysa a babai nga managan Marta a nangpadagus kenkuana iti balayna. ³⁹ Adda kabsatna a babai a managan Maria, nga nagtugaw iti sakaanan ti Apo ket nagdengngeg iti saona. ⁴⁰ Ngem ni Marta ket makumikum unay iti panangisagana iti makan. Napan isuna ken ni Hesus, ket kinunana, "Apo, awan kadi aniamanna kenka nga iti kabsat ko a babai ket binaybay-annak nga agmaymaysa nga agserbi? Ibagam ngarud kenkuana nga tulungannak." ⁴¹ Ngem simmungbat ti Apo ket kinunana kenkuana, "Marta, Marta, mariribukan ken madandanaganka ka unay ti adu a banbanag, ⁴² ngem maysa laeng a banag ti kasapulan. Pinili ni Maria no ania iti kasasayaatan, ket isu iti saanto nga maawan manipud kenkuana."