लिउ २
1
दिजो ख्रिष्टला चेजिक् गा वे, खोकि ङिङ्ज्येकि च्येजिक् सेम सोनि वसिन्, थुचेङिला च्येजिक् छकुप्, च्येजिक् ङिङ्ज्ये तेमे सेम सो वसिन्,
2
खराङ् सेम चिक्राङ् च्युङ्नि, चिक्राङ् ङिङ्ज्येकि किदाङ् क्यानि, थुला चिक्ला च्युङ्नि सेम चिक्राङ् क्यानि ङे गा ला तेरिककि।
3
राङ्ला क्याजिक् नासाम ताङ्नि काङ्ज्यिगाङ् माकि,हिन्सिनाङ् सेम् ज्यापु क्यानि राङ्ला सिनाङ् ज्येन्ला छ्ये कि।
4
राङ्ला गोबु जा तिवाला क्याजिक् नासाम मातोङ् हिन्सिनाङ् ज्येन तिवाला गोवु जा तिवालाङ् नासाम तोङ्।
5
खिरे सेम्बा ख्रष्ट येसुकि सेम् दगे हुङ्सित्,
6
खो कन्ज्यक दगेरराङ् नक् हिन्सिनाङ् कन्ज्यक ताङ्कि राङि तिजो तिजो राङ् खोकि जिम्नि ज्यकुप् च्यालाक दगेरङ् सेम माक्या।
7
तुक किसा खोकि राङ्ला राङ् तोङ्बा जोसुङ्। खोकि यक्पिकि छ्यालुक क्यासुङ् तेमे मिला ग्युर्नि केसुङ्।
8
मिकि छ्यालुक्ला देनि खोकि राङ्ला सेम ज्यापु जोसुङ्, तेमे श्याप मिन्सिन् क्यासिन् ग्याङ्श्यिङ् श्याप् साक् राङ् खाला ङेन्सुङ्।
9
तुक किसा कन्ज्यककि खोला लेम्ग्ये राङ् खोला नाम्ला तेक्सुङ् तेमे खोला तेरिक् मि सिना छ्ये बिन्सुङ्।
10
तुक किसा देवाचेन्ला, जाम्बुलिङ् खाला तेमे जाम्बुलिङ् कि हक्ला वतुप् तेरिककि येसुकि मिन्ला टिमुङ् जु गोक्यु।
11
तेमे पापा कन्ज्यककि सँवा कितुप्ला तेरिक खोकि येसु ख्रिष्ट राङ् चावा हिन् सिनि ङेन् गोक्यु।
12
तुक किसा, ङेकि ङिङ्ज्ये हुङु तिवाला च्युक क्यानि खिरेकि नाम्लाङ का ङेनि वे, ता ति ङा वसिन् क्याजिक् मिन् हिन्सिनाङ् मिजिसाङ् लेम्ग्याराङ् जिवा तेमे रुकिन्दाङ् राङि थार्वा कि लाका तेरिकि।
13
चिला सिसिन् कन्ज्यककि गा लोङ्गुप्ला खिराङ् ङिकार्ला सेम कितुप् तेमे लाका कि जितुप्ला खिरेकि लाका कितुप् खोराङ् हिन्।
14
मुताम् माक्याबा तेमे ख्योताङ् ङा माक्याबा तेरिक् लाका तिवा कि,
15
चिला सिसिन् खिराङ् चुकैसाङ् लाका मेलेवा माक्याबा कन्ज्यककि काङ्लाङ् आप्टि माफगु तेमे सिक्याबु खाला ङेन्दुप् पुज्युङ् गाल्निु मेलेवा ताङ् थोर्थोतुप् गिपा तिवि पार्ला दि लुङ्बाला ठ्याछ्यालि राक्याराङ् ठाछ्यालि गाल्नि देत्।
16
मिचिकि सुङ्ला राम्बु क्यानि जिम्नि देत्, चिला सिसिन् ङा तुक्राङ् माछ्य तेमे ङेकि तुक्राङ् दुक्पा माक्या सिनि ख्रिष्टकि मिन्ला ङा गा कि थुप्सित्।
17
खिरेकि मोवा तेमे लाका ति चावाला पुलुप् जिन्बा दगेराङ् हिन्। ति जिन्बाताङ् ङेकि राङि ठाककि जिन्बा पुल्गोसिनाङ् ङा गा किउइ, तेमे ङा खिराङ् तेरिक् तानि गा किउइ।
18
दुक्राङ् क्यानि, खिराङ्साङ् गा किगोक्यु तेमे ङा तानि राङ् सेम् किर्मु कि गोक्यु।
19
तिमोति ला खिरे ते टिबुराङ् तोङ्गुप् ला ङेकि चावा येसुला रेवा ज्याकु हिन्, चिला सिसिन् तिकि त्यावा खिरेकि काला थोङ्नि ङा आलाराङ् गा कि थुप्सित्।
20
ति दगेराङ् खिराङ्ला सेम्नेराङ् टेङ्बु क्यानि ल्हाप् ङा तानि ज्येन् सुङ् मेत्।
21
चिला सिसिन् तिवा तेरिककि येसु ख्रिष्टकि ताम सिनाङ् राङि सेम्ला ड्वप् ताम क्याजिक् कितुप् छोल्गिनक्।
22
हिन्सिनाङ् खिराङ्ला तिमोथि ति चो आछेउइ छ्याराङ् वे, चिला सिसिन् चुक् क्यानि आङिकि राङि पापि लाका कि, तुक्राङ् क्यानि लेन् ल्यामुला ङातानि लाका क्यानि वे।
23
तुक किसा ङाला काङ् गि सिनि छ्या ङेदु तुच्यिक् चो टिबु आछ्येउइ ङा तिमोथिला खिरे ते तोङ्गुप् रेवा किउइ।
24
हिन्सिनाङ् ङा दाक्पुराङ् खिरेकि पार्ला टिबु राङ् गिउइ सिरुप् ताम चावाला लेमु क्यानि छ्या वे।
25
इपाफ्रोडिटसला खिरे ते ग्युर् तोङ्गुप् ङा गोवा हिन् सिउइ। ति ङे नुक् तेमे लाका किटो कितुप् तेमे दाल्जा माक् हिन्, तेमे खिरेकि लेन् क्योलुप् ताङ् ङाला गोबु दासा नेवाकि लाका कितुप् कि मि हिन्।
26
ति आमोछ्योबु क्याबु ताम्ङेन खिरेकि छ्या ङेतुप् तिकि ति लेम्ग्याराङ् जिवा किनक्, तेमे खिराङ् तानि हुङ्गुप् सिनि तिकि सेम्बा किनक्।
27
चिला सिसिन् ति हुतुङ्राङ् तिनक् आ मोछ्योनक्, ति श्येप्राङ् छाल्नक् हिन्सिनाङ् कन्ज्यककि तिला ङिङ्ज्ये क्यासुङ्, तेमे तिला क्याजिक् मोन् दुक्पि खाला दुक्पा मेङ्सित् सिनि ङाला साङ् ङिङ्ज्ये क्यासुङ्।
28
तुक किसा तारुङ् लेम्गेराङ् गा किइदाङ् ङा तिला खिरे ते तोङिन् वे, तेमे खिरेकि तिलाङ् थोङुइ, खिराङ् सेम किर्मु किउइ तेमे ङा सेम्ना कितु तेवा थेन्ग्यु।
29
तुक किसा तेरिक् सेम्ला गा कि चावाला इपाफ्रोडिटसला गासो श्यु, तेमे ति दगे मि तिवाला ताङ्देन् कि,
30
चिला सिसिन् ख्रिष्टकि लाका किसिन् ति श्येप् राङ् छाल्नक्। खिरेकि ङे लाकाला कि माथुबु लाका सिन्दा कितुप्ला तिकि राङि मिजि श्येप् जिवाला क्याल्सुङ्।