¹ जे बातके पिछु येशू गालील, औ तिबेरियास समुन्द्रके बा पार गओ । ² और एक बहुत भारी भिड बाके पिछु लाग गई, काहेकी बा रोगीनके उपर करो चिन्ह बे देखत रहए । ³ येशू डाँगामे गओ, और अपन चेलनके संग बैठो । ⁴ यहूदीन को अथबा निस्तार तेउहर ढिंगै रहए । ⁵ तव येशू अपन चारै घेन देखि एक बडो भिड अपने घेन आत देखके फिलिपसे कही, “यिनके खबानके ताहिँ हम कहाँ से रोटी किनए ?” ⁶ बा उनके जाँच करन ताहिँ कहीरहए, कहेकी बा जो करन लागो रहए, सो बाके पता रहए । ⁷ फिलिप बाके जवाफ दै, “प्रत्येक थोडी थोडी पैहए ताहुफिर दुई सौ चाँदीके डलरको रोटीसे ना पुगए हए ।' ⁸ बक चेला मैसे एक जनै सिमोन पत्रुसको भैयाँ अन्द्रियास कही, ⁹ हियाँ एक लौड़ा हए, बक संग जौकी पाँच रोटी और दुई मछ्री हँए । पर उतकसे इतोन के का पुगेहए ?” ¹⁰ येशू कही, “आदमीके बैठन लगओ ।” हुवाँ बहुत घाँस भव बाँगर रहए । तव फिर पाँच हजार लोग हुँवा बैठे ¹¹ तव येशू रोटी लै, और परमेश्‍वरके धन्यबाद चढएके पिछु बैठन बारेके बाँट्दै । और फिर मछ्री बे इच्छा भरके खाइँ । ¹² जब आदमी पेटभरके खाइँ, बा अपन चेलन से कही, “उब्रेभए खुद्रा बटोरओ, और कोई खराब नाए होबए ।” ¹³ उब्रेभए जौके पाँच रोटीके खुद्रा बे बटोरके बाहृ डलैया भरिगए । ¹⁴ बहेमारे बाको करो चिन्ह देखके बे आदमी कहन लागे, “संसारमे आनबारो अगमवक्ता नेहत्य जहे हए ।” ¹⁵ बे आएके बाके जबरजस्तीसे लैजएके राजा बनान ढुड रहेहए करके पता पाएके येशू फिर इकल्लो डँगामे गओ । ¹⁶ संझा हुइगव तव बाके चेला समुन्द्र घेन गए । ¹⁷ और नैयाँमे चढके बे समुन्द्र पार कफर्नहुम घेन गए । तव बा बेरा अँध्यारो हुइगव रहए, और येशू हबए तक बिनके ठिन नाए अओ रहए । ¹⁸ और बहुत भारी आँधी चलत रहए, समुन्द्र लडुरा लेत रहए । ¹⁹ पाँच- छ किलोमिटर नैयाँ अग्गु चलाएके लैगए रहए, पिछु बे येशूके समुन्द्र उपर नेगत नैयाँ घेन आत देखि, और बे डरएगए । ²⁰ फिर बा उन्से कही, “मए हौ, मत डराबओ ।” ²¹ बे बाके खुशीसे नैयाँमे बैठई, और बे जात रहए बा ठाँउमे नैयाँ तुरन्त पुग्गए । ²² समुन्द्र पार रहे भिड बे कल हुवाँ एकए नैयाँ देखि । बिनके पता रहए, कि येशू अपन चेलन संग नैयाँमे नाए चडो हए, और बक चेला इकल्ले गए रहए । ²³ तव तिबेरियाससे और नैयाँ बिनके ठिन आए, जहाँ प्रभु धन्यबाद चढाएके उनके रोटी खबाई रहए । ²⁴ येशू और बाके चेला हुवाँ नाए हए करके पता पाएके बे आदमी येशूके ढुडत नैयाँमे चढके कफर्नहुममे गए । ²⁵ बे बाके समुन्द्रके बा पार पाएके बासे पुछी, “रब्बी, [गुरु तुम हियाँ कब अए ?”] ²⁶ येशू उनके जबाफ दैके कही, “नेहत्य मए तुमसे कहत हौ, तुम चिन्ह देखके नाए, पर तुम पेटभरके रोटी खाएके मारे मोके तुम ढुड्त हौ । ²⁷ नष्ट होन बारो भोजनके तही परिश्रम मत करौ, बल्कि अनन्त जीवन तक रहन बारो भोजनके तही परिश्रम करौ, जो आदमीक लौड़ा तुमके दएहए। कहेकी परमेश्‍वर पिता बाके उपर अपनो छाप लगाई हँए ।” ²⁸ बे बासे कही, “परमेश्‍वर के चहान बारो काम करन हमके का करन पडैगो ?” ²⁹ येशू बिनसे कही, “परमेश्‍वरको काम जहे हँए जौनके बा पठाई हए बाके उपर बिश्‍वास करओ ।” ³⁰ जहेमारे बे बासे कही, “तुम का चिन्ह देखए हौ, सो हम देखए, और तुमए बिश्‍वास करए ? तुम का कर्त हौ ? ³¹ हम पिता-पर्खा उजाड-स्थानमे मन्‍न खाइँ, जैसी लिखो हए, 'बा बिनके खानके ताहिँ स्वर्गसे रोटी दै ।” ³² येशू उन्से कही, “नेहत्य, मए तुमसे कहतहौ, तुमके स्वर्गसे रोटी देन बारो मोशा ना हए, बल्कि स्वर्गसे तुमके खास रोटी देन बारो मिर पिता हँए । ³³ काहेकी परमेश्‍वरको रोटी बहे हँए, जो स्वर्गसे उतरके अतहए, और संसारके जीवन देतहए ।” ³⁴ बे बासे कही, “प्रभु जा रोटी हमके सब दिन दिए ।” ³⁵ येशू बिनसे कही, “जीवनको रोटी मए हौ, मेरे जौणे आन बारे नाए भुखए हए, और मिर उपर बिश्‍वास करन बारे कबहु प्यासे नाए हुँइहँए । ³⁶ मए तुमसे कहो हौ, तुम मोके देखे हौ, और फिर बिश्‍वास नाए करत हौ । ³⁷ पिता मोके दएभए सब मेरे ठिन अए हँए, और मेरे ठिन आन बारेके कोई रितिसे मए नाए छुडेहौ । ³⁸ अपन इच्छा पुरो करन मए स्वर्गसे उतरके ना अओ, बल्कि मोके पठान बारेको इच्छा पुरो करनके अओ हौ । ³⁹ और मोके पठान बारेको इच्छा जहे हए, कि बा मोके बा मोके जो दै हए, बा मैसे कोईके फिर मए ना खोमाओ, बल्कि बिनके अन्तके दिनमे जिन्दा करौ । ⁴⁰ काहेकी मिर पिताको इच्छा जहे हए, कि पुत्रके देखनबारे और बाक उपर बिश्‍वास करनबारे, सबए अनन्त जीवन पामए और मए अन्तके दिनमे जिन्दा करङ्गो।” ⁴¹ यहूदी बाके बिरुदमे बर बारान लागे, कहेकी बा कही रहए, “स्वर्गसे उतरके आन बारी रोटी मही हौ ।” ⁴² बे कही, “का जा योसेफको लौड़ा, येशू ना हँए ? जाके अइया और दौवाके का हम ना चिनत् हँए ? हभए जा कैसे कहत हए मए स्वर्गसे उतरके आन बारी रोटी हौँ कहत हए ?” ⁴³ येशू बिनके जबाफ दैके कही, “तुम आपसमे मत बर बाराओ । ⁴⁴ मोके पठान बारो पिता ना खिचन तक कोई मिर ठिन आए ना पैहए है, और मए बाके अन्तके दिनमे जिन्दा करेहौ । ⁴⁵ और बे सब जनै परमेश्‍वरसे सिखे गए हए,' कहीके अगमवक्ताको किताबमे लिखो हए । प्रत्येक जौन पितासे सुनिहए और सिखे बे मेरे ठिन आमङ्गे । ⁴⁶ पिताके कोई आदमी ना देखिहँए, केवल बा इकल्लो देखिहए जो परमेश्‍वरसे अओ हए, बा पिताके देखिहए । ⁴⁷ नेहत्य मए तुमसे कहतहौ, जौन बिश्‍वास करेहए बाके संग अनन्त जीवन हए । ⁴⁸ मए जीवनकी रोटी हौ । ⁴⁹ तुमर पिता पुर्खा उजाड स्थानमे मन्‍न खाई ताहु फिर बे मरके गए । ⁵⁰ स्वर्गसे उतरन बारो रोटी जहे हए, जौन जा खाए हए बा ना मरैगो । ⁵¹ स्वर्गसे उतरन बारी जिन्दा रोटी मही हौ । कोई फिर जा रोटी खए हए ,बा सदिमान जिहए । और जौन रोटी मए संसारके जीवनके ताहिँ दओ हौ, बा त मिर देहे हए ।” ⁵² तव यहूदी आपसमे बहस करन लागे, “जा आदमी कैसे हमके अपनी देहे खान देहए ?” ⁵³ येशू बिनसे कही, “नेहत्य मए तुमसे कहतहौ, तुम आदमीके पुत्रको देहे ना खान तक, और बाको खुन ना पिन तक, तुमरमे जीवन ना हुइहए । ⁵⁴ मिर देहे खान बारो और मिर खुन पिन बारे संग अनन्त जीवन हए, और अन्तके दिनमे मए बाके जिन्दा करेहौ । ⁵⁵ कहेकी मिर देहे नेहत्य खानबारी हए, और मिर खुन नेहत्य पिन बारो हए । ⁵⁶ मिर देहे खान बारो और मिर खुन पिन बारो त मिर मे रहमङ्गे, और मए बिनमे रहमङ्गो । ⁵⁷ जैसे जिवन देन बारो पितामोके पठाइ औेर उइसी मए पिताके कारनसे जित हओ, अइसिए मोके खान बारो फिर मिर कारन से जिबैगो । ⁵⁸ स्वर्गसे आन बारी जा रोटी अइसी ना हए, जो पिता पुर्खा खाइँ ताहु फिर मरगए । जा रोटी खान बारो सदिमान जिहए ।” ⁵⁹ बा जा बात कफर्नहुमके सभाघरमे शिक्षा देतपेती कही रहए । ⁶⁰ जा सुनके बाके चेला मैसे बहुत कही, जा वचन कठोर हए, कौन जा ग्रहण कर पैहए हए ?” ⁶¹ तव बाके चेला जाके वारेमे बरबारात् हए करके जानके येशू बिनसे कही, “का जा बात तुमरे ताहिँ ठोकरके कारण हुइरहो हए ?” ⁶² तुम आदमीके पुत्रके जहाँ बा अग्गु रहए हुवाँ चढत देखे रहओ का ? ⁶³ जीवन देन बारो आत्मा हए, शरीरसे कोई फाइदा ना हए । जौन बचन मए तुमसे बोलोहौ बा आत्मा और जीवन हए । ⁶⁴ पर तुमर बीचमे कित्तो हँए, जौन बिश्‍वास ना करत हए ।” कहेकी कौन कौन बिश्‍वास ना करत हँए, और बाके धोखा देन बारो कौन हुइहँए कहिके येशूके सुरुसे पता रहए । ⁶⁵ और बा कही, “जहेमारे मए तुमसे कहो रहौ, 'अगर पितासे ना द्ओ हए तव कोई आदमी मिर ठिन ना आए पाएहए ।” ⁶⁶ तव पिछु बक चेला मैसे बहुत जनि पिछु हटे, और बाके संग नेगन छोडी । ⁶⁷ येशू बाहृ जनि से कही, “का तुम फिर मोके छोडन चँहत हओ ? ” ⁶⁸ सिमोन पत्रुस जबाफ दैके कही, “हे प्रभु, हम कैन ठिन जाए ? तुमर संग त अनन्त जीवनको बचन हए् । ⁶⁹ और हम बिश्‍वास करे हँए, और जाने हँए, तुम परमेश्‍वरके पवित्र जन हौ ।” ⁷⁰ येशू बिनके जबाफ दैके कही, “का मए अपनए तुमके बाहृओ जनिके ना छानो ? और तुमर मैसे एक जनि त धोखे बाज हए । ⁷¹ जा बा सिमोन इस्करियोतको लौड़ा यहूदाके वारेमे कही रहए, कहेकी बा बाहृा मैसे एक जनि रहए ताहु फिर बा बाके धोखा देन तही तयार रहए ।”