1
अब हुँवा निकोदेमस नाउँको एक आदमी रहए बा यहुदी महासभाको एक अगुवा रहए ।
2
जा आदमी रातके येशू ठिन आओ, और बासे कही, “गुरुजी, हम जान्त हँएं तुम परमेश्वर आए भए एक शिक्षक हौ, काहेकि परमेश्वर संगमे ना हुइहए तव तुमर करेभए जे चिन्ह कोई ना कर पएँ हँएं ।”
3
येशू बाके जबाफ दैके कही, “नेहत्य मए तुमसे कहात हौं, कोइ नयाँ हुइके ना जन्मैगो तव बा परमेश्वरको राज ना देख पएहएँ ।”
4
निकोदेमस बासे कही, “आदमी बुढो हुइ जएहए तव कैसे जलम हए ? का बा अपन अइयाके गरभ मे दुसरे दाँव घुसके जलम ले हए का ?”
5
येशू जवाफ दै ,“नेहत्य मए तुमसे कहात हौं, कोइ पानी और आत्मासे ना जलमेहए तव परमेश्वरके राजमे ना घुस पएहए ।
6
शरीरसे जन्मो शरीर हए, और पवित्र आत्मासे जन्मो आत्मा हए ।
7
मए तुमके तुम फिर जलमन पडैगो कहात हौँ अचम्मो मत मानौ।
8
हावा जितए चहात हए उतै बहत हए । तुम हावाकि अवाज त सुनत हौ, पर बा कहाँसे आत हए और कितए जात हए, सो ना जानत हौ । पवित्र आत्मासे जलमो सब उईसियए हुई हँए ।”
9
निकोदेमस जवाफ दै, और बासे कही, “जा बात कैसे हुइ पएहए ?”
10
येशू बाके जबाफ दैके कही, “ का तय इस्राएलको गुरु हए तहुँ फिर जे बात ना समझत हय ?
11
नेहत्य, मए तोसे कहात हौं, हम जो जानत हँए बहे कहात हँए, और हम जो देखे हँए, बहेकी गवाही देत हँए, पर तुम हमर गवाही स्वीकार ना करत हौ ।
12
मए तुमसे पृथ्वीको बात कहो, तहुँ फिर तुम विश्वास ना करे, तव तुमके स्वर्गकि बात बतए हौँ तव कैसे विश्वास कर हौ ?
13
स्वर्गसे उतरके आन वालो आदमीको पुत्र बाहेक कोई फिर स्वर्गमे ना गव हए।
14
जैसी मोशा उजाड – ठाउँमे साँपके उठाई , उईसी आदमीको पुत्र उपर उठओ जयहए,
15
और जौन बाके उपर विश्वास करहँए, सब अनन्त जीवन पाएँ हँए ।
16
"काहेकी परमेश्वर संसारसे अईसो प्रेम करी, कि बा अपन एकलौटा पुत्र दै, ताकि बाके उपर विश्वास करनवारे कोइ फिर नाश ना होबए, पर बा अनन्त जीवन पाबए ।
17
काहेकी परमेश्वर संसारके दण्ड देन नाए, पर संसारके बचान ताँही आपनो पुत्र दै ।
18
जौन बाके उपर विश्वास करहए, बा दोषी ना ठहरैगो, पर बामे विश्वास ना करन बारो अगुसे दोषी ठहिरगौ हए, काहेकि बा परमेश्वरको एकलौटा पुत्रके नाउँमे विश्वास ना करी हए ।
19
फैसलाको कारन जहे हए: ज्योति संसारमे आओ हए, और आदमी ज्योतिसे जद्धा अन्धियारोके मन पडाइँ , काहेकी बिनकी काम खराब रहए ।
20
काहेकी खराब काम करन बारो सब ज्योतिके नफरत करत हँएं । और ज्योतिमे ना आत हय, ताकि बाके काम प्रकट ना होबए ।
21
सत्यसे जिन बारो आदमी ज्योतिमे आतहए, और परमेश्वरमे करी भई बाको काम प्रकट होबए ।
22
तओ पिछु येशू और बाके चेला यहूदीयामे गए, और हुवाँ बा बिनके संग कुछ दिन बैठी, और बप्तिस्मा दै ।
23
यूहन्ना फिर सालीमके जौने एनोनमे बप्तिस्मा देत रहए, काहेकी हुवाँ बहुत पानी रहए । हुवाँ आदमी बाके ठिन आत रहँएं और बे बप्तिस्मा लेत रहँएं ।
24
काहेकि यूहन्ना बा बेरा जेलमे ना पडो रहए ।
25
हुँवा यूहन्नाके कुछ चेला और एक जनी यहूदीबिच सुध्दीकरणके वारेमे बिबाद हुइगओ ।
26
यूहन्नाके ठिन आएके बे बासे कहीँ, “गुरुजी, यर्दन नदीयाकि बा पार जो तुमरसंग रहए, जौनके वारेमे तुम गवाही दए रहौ, देखओ, बा बप्तिस्मा दएरहो हए, और सब बाके ठिन जाएरहे हँए ।”
27
यूहन्ना जबाफ दै, “आदमीके स्वर्गसे ना देन तक बा कोई चिज कर ना पएहए ।
28
मए ख्रीष्ट न हौं, पर मए बासे अग्गु पठाओ भव हौं' करके मिर गवाही तुम अपनए देत हौ ।
29
दुलहीन त दुलहाकि हए, । दुलहाके ठिन जो ठाणो होत हए, और बाको अवाज सुनन बारो सँगी दुलहाको आवाज सुनके गजब खुशी होत हए । तव मिर आनन्द अब पुरा होबैगो ।
30
बा बढैगो, और मोके घटन पड्हए ।
31
"उपरसे आन बारो सबसे उँचो हए । पृथ्वीसे होन बारो पृथ्वीको हए, और पृथ्वीकी बात बोल्त हए । स्वर्गसे आन बारो बा सबसे उँचो हए ।"
32
बा जो देखत और सुनत हए, बाकी गवाही बा देत हए, पर बाकी गवाही कोई ग्रहण ना करत् हँए ।
33
जौन बाकि गवाही ग्रहण करी हए, परमेश्वर सत्य हए कहिके प्रमाण देत हए ।
34
काहेकी जौनके परमेश्वर पठात् हए, बा परमेश्वरको वाणी बोल्त हए, काहेकी परमेश्वर बिना नाप पवित्र आत्मा दै हए ।
35
पिता पुत्रके प्रेम करत हए, और सब चिज बाके हातमे दै हए ।
36
जौन पुत्रके उपर विश्वास करहए, बाके संग अनन्त जीवन हए । जौन पुत्रको आज्ञापालन ना करहए, बा जीवन ना देखैगो, और परमेश्वरको क्रोध बाके उपर पड्हए ।