अध्याय 4
1
जैसी ख्रीष्ट शरीरमे दु:ख भोगी, उइसी तुम फिर बहे किसिमको विचार धारण करओ, काहेकी जौन शरीरमे दु:ख भोगी होथए, बा पाप करनके छोड्थए ।
2
अइसे बा अपन जीवनको बचोभव समय फिरसे आदमीको कुइच्छामे ना, पर परमेश्वरके इच्छामे बितात हए ।
3
बितेके दिनमे अन्यजाति करिँ कता तुम व्यभिचार, कुवासना, मधपान, मोजमज्जा, पियक्कडपन और घृणित मुर्तिपुजामे बहुत समय बिताए |
4
तुम बिनके संग खराबीकी डगरमे नानेंगो भओ देखके बे छक्क पणतहँए और तुमरो बिजरो बतकातहँए |
5
पर जीन्दा और मरेनके न्याय करन तयार होनबारोके बिनके लेखा देन पणैगो|
6
जहेमारे मरेनके फिर सुसमाचार सुनाई , ताकि बे आदमीनहानि शरीरमे इन्साफ पाएसे फिर आत्मामे बे परमेश्वर जैसे जिमए |
7
सब बातकी अन्त जौनिंयए आएगओ हए | जहेमारे अपन प्रार्थनाके ताहिँ शुध्द मनके और सचेत हुइराहबओ |
8
सबसे जद्धा एक-दुसरेक उपर तुमर प्रेम अटल रहबए | काहेकी प्रेम बहुत पापके तोपतहए|
9
विना गनगनाइके एक दुसरेके अथितिसत्कार करओ|
10
जौन जैसो वरदान पाओ हए, परमेश्वरके अनुग्रहके अलग-अलग वरदान पाए भए कारीगरकता बे एक-दुसरेके ताहिँ प्रयोग करओ |
11
अगर कोइ बोल्तहए तव, परमेश्वरको वचन बोलो जैसो बा बोलए | अगर कोइ सेवा कर्तहए तव परमेश्वरकी दैभई शक्तिसे बा सेबा करए, जा कारणसे कि सब बातमे येशू ख्रीष्टसे परमेश्वरएकी प्रशंसा होबए | बहएके महिमा और पराक्रम सदासर्वदा होबए | आमेन |
12
प्रिय हो, तुमके जाँच करनबारो अग्निसमान परिक्षा तुमरे उपर आत कोइ अचम्मि बात कता तुम छक्क मतपणओ |
13
पर ख्रीष्टके कष्ट-भोगमे सहभागी होत रमाओ, ताकि बाको महिमा प्रकट होत तुम फिर आनन्दित और खुशी होन सिकओ |
14
अगर ख्रीष्टके नाउँमे तुम निन्दित हुइहौ कहेसे तुम धन्यके हौ | काहेकी महिमाको और परमेश्वरको आत्मा तुमरे उपर रहात हए |
15
पर तुम मैसे कोइ फिर हत्यारा,अथवा चोर,अथवा खराबी करनबारे, अथवा दुसरेके काममे हात डारनबारे कता दु:ख मतभोगओ |
16
पर कोइ ख्रीष्टियान होनके कारण दु:ख भोगत् हए कहेसे बा शरम ना मानए, पर बहे नाउँमे बा परमेश्वरके महिमा देबए |
17
काहेकी न्याय परमेश्वरएके परिवारसे सुरु होनके समय आओ हए, और अगर जा हमैसे सुरु भवहए तव परमेश्वरको सुसमाचार ना मानन बारेनको अन्त कैसो हुइहए?
18
और, “अगर धर्मी जनको उध्दार कठिनसे होतहए कहेसे अधर्मी और पापीकी गति का हुइहए?”
19
जहेमारे परमेश्वरको इच्छाअनुसार दु:ख भोगनबारे भलाइ करँए और बे अपन आत्मा विश्वासयोग्य सृष्टिकर्ता के सौँपएं|