¹ Mga anak, tumana ninyo ang inyong mga ginikanan diha sa Ginoo, kay mao kini ang matarong. ² "Tahora ang imong amahan ug inahan" ( mao kini ang unang sugo nga adunay saad), ³ aron maayo ang inyong kahimtang ug taas ang inyong kinabuhi sa kalibutan." ⁴ Ug, kamo nga mga amahan, ayaw hagita ang inyong mga anak sa kasuko apan hinuon padak-a sila sa disiplina ug sa mga pagtudlo sa Ginoo. ⁵ Mga ulipon, pagtuman kamo sa inyong mga agalon dinhi sa kalibutan nga adunay dakong pagtahod ug kahadlo nga tininuod sa inyong kasingkasing ingon nga gibuhat ninyo kini kang Cristo, ⁶ dili lang ninyo kini buhaton aron malipay sila kung nagtan-aw sila kaninyo, apan ingon nga ulipon kamo ni Cristo mismo, ⁷ buhata ang kabubut-on sa Dios nga gikan sa inyong kasingkasing nga mag-alagad kamo nga magmalipayon alang sa Ginoo ug dili lang alang sa mga tawo. ⁸ hinumdumi ninyo nga sa matag maayong binuhatan sa usa ka tawo makadawat siya ug ganti gikan sa Ginoo, maulipon man siya o gawasnon. ⁹ Ug kamo nga mga agalon, mao usab ang inyong buhaton sa mga ulipon nga dili ninyo hulgaon sila, kay nakahibalo man kamo nga ang Dios ang agalon nila ug agalon usab ninyo nga atoa sa langit, ug walay pinalabi siya. ¹⁰ Sa katapusan, pagmalig-on kamo diha sa Ginoo ug diha sa kakusog sa iyang dakong gahum. ¹¹ Isul-ob ninyo ang tibuok nga hinagiban sa Dios aron makabarog kamo batok sa mga limbongong plano sa yawa. ¹² Kay ang atong gubat dili batok sa unod ug dugo, apan batok sa mga espirituhanong mga nangulo ug sa anaay gahum ug sa mga nagmando sa dautang kangitngitan, batok sa mga dautang espiritu sa kalangitan. ¹³ Busa isul-ob ninyo ang tibuok nga hinagiban sa Dios aron makabarog kamo batok sa kadautan niining panahon ug buhata ang tanan aron makabarog kamo nga lig-on. ¹⁴ Busa barog kamo nga lig-on, nga nagsul-ob sa bakus sa kamatuoran ug sa taming sa dughan sa pagkamatarong ¹⁵ ug pagsul-ub kamo ug sapatos sa inyong mga tiil nga andamon sa pagsangyaw sa maayong balita mahitungod sa kalinaw , ¹⁶ ug kanunay dad-on ninyo ang panagang sa pagtuo nga maoy mopatay sa gadilaab nga mga pana sa yawa. ¹⁷ Ug gamita ang helmet sa kaluwasan ug ang espada sa Espiritu nga mao ang pulong sa Dios, ¹⁸ pinaagi sa tanang pag-ampo ug pangamuyo sa tanang panahon diha sa Espiritu nga nagpaabut sa iyang tubag nga adunay paglahutay sa tanan ug pag-ampo alang sa tanan nga balaang katawhan sa Dios. ¹⁹ Ug iampo ako nga ang mensahe mahatag sa ako inig abri nako sa akong baba nga anaay kaisug inig pahibalo sa misteryo sa maayong balita nga diin nahimo akong embahador nga nakakadina, ²⁰ aron sa akong pagkapriso makasulti ako nga adunay kaisug nga maoy angay nakong himuon. ²¹ Si Tiquico,ang minahal nga igsoon ug matinod-anong alagad sa Ginoo,magpahiblo sa tanan nganha kaninyu,aron kamo makahibalo ug unsa ang akong gibuhat. ²² Ako siyang gipaanha diha alang aning nga tuyo aron makahibalo kamo sa among kahimtang ug iyang hupayon ang inyong mga kasingkasing. ²³ Ang kalinaw ug ang gugma nga adunay pagtuo nga gikan sa Dios Amahan ug sa Ginoong Jesu Cristo maanaa sa kaigsuonan. ²⁴ Ang grasya maanaa sa tanang mga nahigugma sa Ginoong Jesu Cristo sa paghigugma nga dili mamatay.