¹ Karon niining mga adlawa, sa dihang ang gidaghanon sa mga tinon-an nagkadaghan, nagsugod ang reklamo sa mga Judio sa Gresya batok sa mga Hebreohanon, tungod kay ang ilang mga balo gikalimtan sa matag adlaw nga pag-apod-apod sa tabang. ² Ang napulo ug duha ka mga apostoles mitawag sa pundok sa mga tinon-an ngadto kanila ug miingon, “Dili angay nga atong talikdan ang pulong sa Diyos aron mag-alagad sa mga lamesa. ³ Kinahanglan magpili kamo, mga kaigsoonan, ug pito ka mga tawo taliwala kaninyo, mga tawo nga maayo ang kadungganan, puno sa Espiritu ug kaalam, kansang atong pilion ibabaw niini nga gimbuhaton. ⁴ Kay alang kanamo, kanunay kami magpadayon sa pag-ampo ug pagpamohat sa pulong." ⁵ Ang ilang mga pamahayag nakapahimuot sa tibuok katawhan. Busa gipili nila si Esteban, usa ka tawo nga puno sa pagtuo ug Balaang Espiritu, ug si Filipe, Procorus, Nicanor, Timon, Parmenas, ug Nicolaus nga usa ka proseletes nga gikan sa Antioquia. ⁶ Ang mga magtutuo nagdala niining mga tawhana atubangan sa mga apostoles, kinsa nag-ampo ug unya gibutang ang ilang mga kamot ibabaw kanila. ⁷ Busa ang pulong sa Dios nagpadayon sa pagkaylap, ug ang gidaghanon sa mga tinon-an didto sa Jerusalem nanaghan pag-ayo,ang dakong gidaghanon sa mga pari nahimong nagmatinumanon sa pagtuo. ⁸ Karon si Esteban, nga puno sa grasya ug gahom, nagbuhat sa daghang mga katingalahan ug ilhanan taliwala sa katawhan. ⁹ Apan dihay mitindog nga pipila ka mga tawo nga sakop sa sinagoga nga gitawag ug sinagoga sa mga Tawo nga gipagawas, sa mga taga-Cirene ug sa mga taga-Alejandria, ug ang uban gikan sa Cilicia ug Asia. Kining mga tawhana nakiglantugi kang Esteban. ¹⁰ Apan wala sila makadaog batok sa kaalam ug sa Espiritu nga nag-uban kang Esteban sa iyang pagpamulong. ¹¹ Unya ilang gisulsulan ang pipila ka mga tawo nga miingon, "Nakadungog kami nga si Esteban nagsulti ug mapasipalaong pulong batok kang Moises ug batok sa Dios." ¹² Ilang gisamok ang mga tawo, ang mga anciano, ug ang mga escriba, ug ilang giduol si Esteban ug gidakop siya ug gidala siya sa atubangan sa konseho. ¹³ Sila nagdalag bakakong mga saksi, kinsa miingon, "Kining tawhana wala mohunong sa pagpamulong batok niining balaang dapit ug sa balaod. ¹⁴ Kay nadungog namo siya nga nag-ingon nga kining Jesus nga taga Nazaret magaguba niining dapita ug usabun ang mga nabatasan nga si Moises maoy naghatag ngari kanato. ¹⁵ matag usa kinsa naglingkod didto sa konseho gitutok ang ilang mga mata ngadto kaniya ug nakita ang iyang dagway sama sa dagway sa anghel.