¹ Karon didto ang simbahan sa Antioquia, aduna didtoy pipila ka mga propeta ug mga magtutudlo. Sila mao si Barnabas ug si Simeon (gitawag nga Niger), si Lucio sa Cirene, si Manaen (ang sinagop nga igsoon ni Herodes ang pangulo sa distrito), ug si Saulo. ² Samtang ilang gisimba ang Ginoo ug nagpuasa, ang Balaang Espiritu miingon, "Igahin alang kanako si Barnabas ug si Saulo, aron magbuhat sa buluhaton nga akong gitawag kanila." ³ Human sila makapuasa,nag-ampo, ug mipandong sa ilang mga kamot niining mga tawhana, sila nagpadala kanila. ⁴ Busa si Barnabas ug si Saulo mituman sa Balaang Espiritu ug milugsong sa Seleucia; gikan didto milayag sila padulong sa isla sa Cipre. ⁵ Sa dihang didto sila sa siyudad sa Salamis, ilang gimantala ang pulong sa Dios sa mga sinagoga sa mga Judio. Kuyog usab nila si Juan Marcos isip ilang katabang. ⁶ Sa dihang naadtoan na nila ang tibuok isla sa Pafos, nakaplagan nila ang usa ka salamangkero, usa ka Judio nga mini nga propeta,kansang nganlan ug Bar-Jesus. ⁷ Kini nga salamangkero adunay kalambigitan sa gobernador, Sergio Paulo, nga usa ka maalamon nga tawo. Kining tawhana ang nagpatawag kang Barnabas ug Saulo, tungod kay buot niya madungog ang pulong sa Dios. ⁸ Apan si Elimas "ang salamangkero" (ingon niana ang paghubad sa iyang ngalan) misupak kanila; iyang gisulayan sa pagpalikay ang gobernador palayo gikan sa pagtuo. ⁹ Apan si Saulo, nga gitawag usab ug Pablo, napuno sa Balaang Espiritu; siya mitutok kaniya ¹⁰ ug miingon, "Ikaw anak sa yawa, napuno ka sa tanang matang sa pagpanglimbong ug pagkadaotan. Kaaway ka sa tanang matang sa pagkamatarong. Dili ka moundang sa paglubag sa tul-id nga mga dalan sa Ginoo, dili ba? ¹¹ Karon tan-awa, ang kamot sa Ginoo diha kanimo, ug ikaw mahimong buta. Dili nimo makita ang adlaw sa makadiyot." Diha-diha adunay nahulog kang Elimas nga usa ka yamog ug kangitngit; ug nagsugod siya ug lakaw palibot ug naghangyo sa mga tawo nga agakon siya pinaagi sa kamot. ¹² Human nakita sa gobernador kung unsa ang nahitabo, mituo siya, tungod kay hilabihan ang iyang katingala sa mga pagtulon-an mahitungod sa Ginoo. ¹³ Karon si Pablo ug ang iyang mga higala naglayag gikan sa Pafos ug miabot sa Perga didto sa Pampilya. Apan si Juan mibiya kanila ug mibalik sa Jerusalem. ¹⁴ Si Pablo ug ang iyang mga higala nagbiyahe gikan sa Perga ug miabot sa Antioquia sa Pisidia. Didto miadto sila sa sinagoga sa Adlaw nga Igpapahulay ug nanglingkod. ¹⁵ Human sa pagbasa sa balaod ug sa mga propeta, ang mga pangulo sa sinagoga nagpadala kanila ug mensahe nga nag-ingon, "Mga igsoon, kung aduna kamoy mensahe sa pagdasig alang sa katawhan dinhi, isulti kini." ¹⁶ Busa si Pablo mitindog ug misinyas uban sa iyang kamot; miingon siya, "Mga katawhan sa Israel ug kamo kinsa nagpasidungog sa Dios, paminaw. ¹⁷ Ang Dios niining mga katawhan sa Israel nagpili sa atong mga amahan ug gihimong hilabihan kadaghan ang mga tawo sa dihang nagpuyo sila sa kayutaan sa Ehipto, ug uban sa binayaw nga bukton gipangulohan niya sila pagawas niini. ¹⁸ Kay sa mga kwarenta ka mga katuigan siya nag-uban kanila didto sa kamingawan. ¹⁹ Human niya malaglag ang pito ka mga nasod sa yuta sa Canaan, iyang gihatagan ang atong katawhan sa ilang yuta alang sa panulondon. ²⁰ Kining tanan nga panghitabo nahitabo subra sa kwatro sentos singkwenta ka mga katuigan. Human niining mga butanga, ang Dios mihatag kanila ug mga maghuhukom hangtod kang Samuel ang propeta. ²¹ Unya ang mga tawo nangayo ug usa ka hari, busa ang Dios naghatag kanila kang Saul ang anak ni Kish, ang tawo nga gikan sa tribo ni Benjamin, sa panahon sa kwarenta ka tuig. ²² Human siya kuhaa sa Dios sa pagkahari, iyang gituboy si David aron mahimong ilang hari. Kini mahitungod kang David nga ang Dios miingon, 'Ako nang nakaplagan si David nga anak ni Jesse nga mao ang tawo sunod sa akong kasingkasing;kinsa ang nagbuhat sa tanan nakong gusto nga iyang buhaton.' ²³ Gikan sa mga kaliwat niining tawhana ang Dios nagdala sa Israel ug usa ka Manluluwas, si Jesus, sama sa iyang gisaad nga buhaton. ²⁴ Sa wala pa ang pag-abot ni Jesus, Si Juan nagmantala ug bautismo sa paghinulsol ngadto sa tanang katawhan sa Israel. ²⁵ Samtang gihuman pa ni Juan ang iyang buluhaton, miingon siya, 'Kinsa ako sa inyong hunahuna? Dili ako ang usa. Apan paminaw, ang usa moabot sunod kanako, ang sapatos sa maong tiil dili ako takos sa pagbadbad.' ²⁶ Mga igsoon, mga anak sa kaliwat ni Abraham, ug kadtong kauban ninyo nga nagsimba sa Dios, kini alang kanato nga ang mensahe mahitungod niining kaluwasan gipadala na. ²⁷ Kay sila kinsa nagpuyo sa Jerusalem, ug ilang gituman ang mga pulong sa mga propeta nga ginabasa sa matag-adlaw nga igpapahulay pinaagi sa paghukom kaniya. ²⁸ Bisan tuod wala silay nakitang rason alang sa silot sa kamatayon,sila naghangyo kang Pilato sa pagpatay kaniya. ²⁹ Sa dihang sila nakahuman na sa tanang butang nga nahisulat mahitungod kaniya, gikuha nila siya paubos gikan sa kahoy ug gipahigda siya sa lubnganan. ³⁰ Apan ang Dios nagbanhaw kaniya gikan sa mga patay. ³¹ Nagpakita siya sulod sa daghang mga adlaw niadtong mitungas uban kaniya gikan sa Galilea ngadto sa Jerusalem. Kining mga tawhana karon iya nang mga saksi ngadto sa katawhan. ³² Busa kami nasugilon kaninyo ug maayong balita mahitungod sa mga saad nga gihimo ngadto sa atong mga amahan: ³³ Siya ang nagtuman alang kanato, ilang mga anak, pinaagi sa pagbanhaw kang Jesus. Ingon sa nahisulat sa ikaduhang Salmo:'Ikaw ang akong anak nga lalaki, karong adlawa ako nahimo nga imong Amahan.' ³⁴ Ang kamatuoran nga iyang gibanhaw siya gikan sa mga patay aron ang iyang lawas dili madunot, ang Dios misulti niini nga paagi: misulti siya sama niini: 'Akong ihatag kanimo ang balaan ug kasigurohan nga mga panalangin nga gisaad ngato ni David.' ³⁵ Mao kini nganong siya usab miingon sa lain nga salmo, 'Ikaw dili motugot nga ang imong Usa ka Balaan makasinati ug pagkadunot.' ³⁶ Kay pagkahuman ni David ug human sa iyang kaugalingong kaliwatan nga mialagad sa mga tinguha sa Dios, siya nahikatulog; ug gipahigda kauban sa iyang mga amahan, ug nakasinati ug pagkadunot. ³⁷ apan siya nga gibanhaw sa Dios wala makasinati ug pagkadunot. ³⁸ Busa tugoti nga mahibaloan kini diha kaninyo, mga igsoon, nga pinaagi niining tawhana namantala diha kaninyo ang kapasayloan sa mga sala. ³⁹ Pinaagi kaniya ang matag-usa nga motoo gipakamatarung gikan sa tanang mga butang nga ang kasugoan ni Moises dili makapamatarung kaninyo. ⁴⁰ Busa pagbantay nga ang butang nga gipamulong sa mga propeta dili mahitabo kaninyo: ⁴¹ 'Tan-awa, kamong mga bugalbugalon, ug katingala pag-ayo ug unya mangahanaw; kay ako maghimo ug buluhaton sa inyong mga adlaw, usa ka buluhaton nga dili gayod kamo motuo, bisan pa kung adunay usa ka tawo nga magpahibalo niini kaninyo.'" ⁴² Samtang si Pablo ug si Barnabas mibiya, ang mga tawo nagpakiluoy kanila nga ila untang isulti ang sama nga mga pulong pag-usab sa sunod Adlaw nga Igpapahulay. ⁴³ Sa dihang ang panagtigom sa sinagoga nahuman, daghan sa mga Judio ug ang mga matinud-anon nga dili mga Judio ang misunod kang Pablo ug Barnabas, kinsa nakigsulti ngadto kanila ug nag-awhag kanila sa pagpadayon diha sa grasya sa Dios. ⁴⁴ Sa sunod Adlaw nga Igpapahulay, halos ang tibuok siyudad nagtigom aron makadungog sa pulong sa Ginoo. ⁴⁵ Sa diha nga ang mga Judio nakakita sa panon, napuno sila sa pangabugho ug misultig pagsupak sa mga butang nga gipamulong ni Pablo ug miinsulto kaniya. ⁴⁶ Apan si Pablo ug Barnabas misulti nga maisogon ug miingon, "Kini kinahanglan nga ang pulong sa Dios mauna ug sulti diha kaninyo. Sa paglantaw kaninyo nga gituklod kini palayo gikan sa inyong kaugalingon ug giila ang inyong kaugalingon nga dili takos sa kinabuhing walay kataposan, tan-awa, mobalik kami sa mga Gentil. ⁴⁷ Kay mao kini ang gimando sa Ginoo kanamo, nga nag-ingon, 'Ako nagbutang kanimo isip usa ka kahayag alang sa mga Gentil, nga kinahanglan nimong dad-on ang kaluwasan ngadto sa pinakalayo nga mga bahin sa kalibotan.'" ⁴⁸ Sa pagkadungog sa mga Gentil niini, nalipay sila ug gidayeg ang pulong sa Ginoo. Daghan ang gipili sa kinabuhing walay kataposan nga mituo. ⁴⁹ Ang pulong sa Ginoo mikaylap ngadto sa tibuok rehiyon. ⁵⁰ Apan ang mga Judio nag-awhag sa mga matinud-anon ug mahinungdanong kababayen-an, ug ang mga nag-unang kalalakin-an sa siyudad. Kini nagpasugod sa paglutos batok kang Pablo ug Barnabas ug gilabay sila paggawas lagpas sa utlanan sa ilang siyudad. ⁵¹ Apan si Pablo ug Barnabas mitaktak sa abog gikan sa ilang tiil batok kanila. Unya miadto sila sa siyudad sa Iconio. ⁵² Ug ang mga tinon-an napuno sa kalipay ug uban sa Balaang Espiritu.