¹ Karon ang mga apostoles ug ang mga kaigsuonang mga lalaki nga kinsa atua sa Judea nakadungog nga ang mga Gentil nakadawat usab sa pulong sa Dios. ² Sa dihang si Pedro misaka ngadto sa Jerusalem, sila nga nasakop sa pundok sa mga tinuli nagbadlong kaniya; ³ miingon sila, "Nakiglambigit ka ngadto sa mga tawo nga walay mga tuli ug mikaon uban kanila!" ⁴ Apan si Pedro nagsugod sa pagpasabot sa butang ngadto kanila sa han-ay; miingon, ⁵ nag-ampo ako sa siyudad sa Jopa, ug ako adunay usa ka panan-awon sa usa ka sudlanan nga nanaog,sama sa lapad nga palid mipaubos gikan sa langit pinaagi sa iyang upat ka mga kanto; kini mikanaog nganhi kanako. ⁶ Gitan-aw ko kini ug naghunahuna ko mahitungod kini. Akong nakita ang upat ug tiil nga mga mananap sa yuta, ihalas nga mga mananap, nagkamang nga mga mananap, ug mga langgam sa langit. ⁷ Unya nakadungog ako ug tingog nga nagsulti nganhi kanako, "Barog, Pedro; pag-ihaw ug kaon!" ⁸ Ako miingon, "Dili gayod, Ginoo: kay wala pay dili balaan o dili hinlo nga nakasulod sa akong baba." ⁹ Apan ang tingog mitubag usab gikan sa langit, "Unsa ang gideklara nga hinlo sa Dios ayaw tawga nga dili hinlo." ¹⁰ Kini nahitabo sa tulo ka higayon, ug unya ang tanang butang gikuha pagbalik paingon sa langit. ¹¹ “Tan-awa, dihadiha dihay tulo ka tawo nga nagbarog atubangan sa balay diin kami didto; sila gipadala gikan sa Cesarea nganhi kanako. ¹² Ang Espiritu nagmando kanako nga mouban kanila, ug nga ako dili magbuhat ug kalainan mahitungod kanila. Kining unom ka mga igsoong lalaki mikuyog uban kanako, ug miadto kami ngadto sa balay sa tawo. ¹³ Siya misulti kanamo giunsa niya pagkakita sa manulonda nga nagtindog sa iyang balay ug nag-ingon, "Pagsugo ug mga tawo ngadto sa Jopa ug dad-a pagbalik si Simon nga ginganlag Pedro. ¹⁴ Siya magsulti nganha kanimo ug mensahe nga mahimong paagi nga ikaw maluwas-ikaw ug ang imong tibuok panimalay." ¹⁵ Sa pagsugod nako ug sulti ngadto kanila, ang Balaang Espiritu niabot kanila, sama kanato sa sinugdanan. ¹⁶ Nahinumdom ako sa pulong sa Ginoo, giunsa niya pag-ingon, "Si Juan gayod nagbawtismo sa tubig; apan kamo pagabawtismohan sa Balaang Espiritu." ¹⁷ Unya kon ang Dios naghatag kanila sa samang gasa nga gihatag niya kanato sa dihang kita mituo kang Ginoong Jesu-Cristo, kinsa man ako, aron ako makasukol sa Dios?" ¹⁸ Sa dihang ila kining nadungog nga mga butang, sila walay ikatubag, apan ila hinuong gidayeg ang Dios ug miingon, "Unya ang Dios mihatag sa paghinulsol alang sa kinabuhi ngadto sa mga Gentil usab." ¹⁹ Karon kadtong mga nagkatibulaag tungod sa paglutos nga nahitabo tungod kang Esteban mikaylap hangtud sa Fenicia, Cipro, ug sa Antioquia, nga nanagsulti sa pulong ngadto lamang sa mga Judio. ²⁰ Apan ang uban kanila, mga tawo nga taga-Cipro ug Cirene, nangadto sa Antioquia, ug nakigsulti usab sa mga Greciahanon, nga nagsugilon kanila sa Maayong Balita mahitungod sa Ginoong Jesus. ²¹ Ang kamot sa Ginoo nag-uban kanila; ang dakong ihap nagtuo ug mibalik ngadto sa Ginoo. ²² Ang balita mahitungod kanila miabot sa mga dalunggan sa simbahan sa Jerusalem: ug ilang gipadala pagawas si Barnabas sama kalayo sa Antioquia. ²³ Sa dihang miabut siya ug nakita niya ang grasya sa Dios, nalipay siya ug gidasig niya silang tanan sa pagpabilin diha sa Ginoo sa tibuok nilang kasingkasing. ²⁴ Kay siya maayo man nga tawo ug puno sa Balaang Espiritu ug sa pagtuo, ug daghang mga tawo nga nadugang ngadto sa Ginoo. ²⁵ Unya si Barnabas migawas ngadto sa Tarsus para mangita kang Saulo. ²⁶ Sa dihang iya nang nakaplagan siya, gidala niya siya ngadto sa Antioquia. Kini nahitabo, nga sulod sa tibuok tuig sila nagtigom uban sa simbahan ug nagtudlo sa daghang mga tawo. Ang mga tinon-an unang gitawag nga mga Kristohanon didto sa Antioquia. ²⁷ Karon niini nga mga adlaw ang ubang mga propeta milugsong gikan sa Jerusalem ngadto sa Antioquia. ²⁸ Usa kanila, si Agabo ang ngalan, mitindog ug pinaagi sa Espiritu mipahibalo nga usa ka dakung gutom mahitabo sa tibuok kalibutan. Kini mahitabo sa mga adlaw ni Claudio. ²⁹ Busa ang mga tinon-an, ingon sa mahimo sa matag usa, Nakahukom sa pagpadala ug tabang sa mga kaigsoonang lalaki sa Judea. ³⁰ Ila kining nahimo; nagpadala sila ug kwarta sa mga pangulo pinaagi sa kamot ni Barnabas ug Saulo.