¹ Pangelo ngani pishiku lyabwandilo ilya sabata, bakabuka kwi pumba, nifyakungila fifyo bakanosha. ² Bakaghe ibwe lisembukitepo pipumba. ³ Bakingila mukati lole batakawagha umubili wa Yesu. ⁴ Fikachituka ukuti, mwo bakali bapusanikite ni fya ifi, abalisha babili bakimilila papipi nawo bakafyala imyenda iyakunyikisila. ⁵ Pakuti abakolo bakaba nilyogha bakasinamila paseifyeni fyabo, bakababusha abakolo bala, ''Choni chicho mukulonda ubabumi mubafwe? ⁶ Ata panu, lole ashushiwa! mukumbuke mumwo akayughila kukwinyu po akaba akali ku Galileya, ⁷ akayughagha ukuti u Mwana wa Mundu akwenela ukubikiwa mutukono twa batula nongwa nukukomeliwa, sona pisiku ilyabutatu akwisa ukushuka sona.'' ⁸ Abakolo bala bakakumbukila amashu ghake ⁹ bakanyokela ukufuma kwipumba ukuya pakubabusha fyoshi ifi bala leveninabanine boshi. ¹⁰ Po u Maliya Magadalena, Johana, u Maliya ung'ina wa Yakobo, nabakolo abangi babo bakaba nabobakaya bababusha ifindu ifi abatumiwa. ¹¹ Lole amashu agha ghakaba isa tatakukola ukubabusha abatumiwa, sona batakasubila abakolo bala. ¹² Lole u Peteli akanyamuka akakinda ukuya kwipumba, po sona, akima nukutesha mukati, akatesha utwenda utwelu twene. Po u Peteli akanyamuka akaya ku nyumba yake, nukuswigha fifyo fikabombiwa. ¹³ Tesha, abafundiwa babili bakabukagha ishiku lilalila kukaya kako kakitishiwangaEmasi, ko kakawa sikisite kilomitaukufuma ku Yelusalemu. ¹⁴ Bakayughisanianga benebene pafindu fifyo fikabombiwa. ¹⁵ Fitakachitika ukuti mwo bakuyughisania nukubushikisania, u Yesu mwene akisa kupipi nukwenda nawo. ¹⁶ Lole amaso ghabo ghatakilukagha ukuti bamumanye. ¹⁷ U Yesu akababusha akati, ''Mashu ghaki ghagho umwe babili mukuyughisania po mukwenda?'' Bakimilila palapala bakaboneka bachitima. ¹⁸ Yumo mubabo, ingamu yake kiliyopasi, akamwamula akati, ''We wimwene mu Yelusalemu yuyo atakumanya ifindu fifyo fyabombiwe kulakula amashiku ghagha?'' ¹⁹ U Yesu akati kukwabo, ''Findu fiki?'' Wakamwamula wakati, ''Ifindu ifya kuyana nu Yesu uwa ku Nazaleti, yuyo akaba mukunguluka, wapamwanya mumbombo na mumashu pamaso pa Chala napa bandu woshi, ²⁰ namumwo abaputi abosongo nabalaghili bitu bakamubikila pabulongi ukuti aghoghiwe nukumukomela. ²¹ Lole tukusubila akaba wa bamu wo bakayanga pakumuponesha u Isilayeli. Inga, pakongelesha pa ifi, pakabalilo kak lishiku lya butatuukufuma po ififndu ifi fikabombiwa. ²² Lole sona, abakolo bamu babo tukaba nawo pamupene bakatuswighisha, bakaya kwipumba pangelo ngani. ²³ Mwo batawagha umubili wake, bakisa, bakati batesha abangelo bobakababushaukuti babwumi. ²⁴ Abaalisha bamu babo bakaba nutwe bakabuka kwi pumba, po bakagha fili mo abakolo bala bakayughila. Lole batakamubona. ²⁵ U Yesu akababusha akati, ''O mwe bakonyofu mwebandu umwe sona bakalolo mundumbula pakusubila fyoshi fifyo abakunguluka bakayughagha! ²⁶ Ngimba chitakaba chakulondiwa ukuti u Kilisitu atamiwe ku findu fyoshi ifi, nukwingila mulughindiko lwake?'' ²⁷ Po pakwandila pa Mose sona namubukunguluka boshi, u Yesu akabang'anamulila ifindu ifya kuyana nayuyo mumasimbo ghoshi. ²⁸ Mwo bakupalamila kukaya kuko bakayanga, u Yesu akabomba isa akulonda ukupitilila. ²⁹ Lole bakamukakamisha, bakati, ''mughone nutwe, pakuti kwaya pakwila sona ishiku lyope lyamala kale.'' Po u Yesu akingila nukwikala nawo. ^{30 31} Fikabombiwa ukuti, mwo ikala nawo ukuti alye, akegha ichibama, akachimenyula akabapa. Po amaso ghabo ghakighuka, wakamumanya, po akasobanika ukushita ukumubona. ³² Bakati uyu kumunine, ''Indumbula shitu shitakapyanga mukati mwitu, po akayughagha nutwe musila, po akatwighulila amasimbo?'' ³³ Bakanyamuka akabalilo kalakala nukunyokela ku Yelusalemu. Bakabagha bala leveni babunganite pamupenena boshgi babo bakaba nabo, ³⁴ bakati, ''U Malafyale ashukite naloli, sona amubonekila u Simoni.'' ³⁵ Po bakayugha fifyo fikabombiwa musila, namumo bakamumanyila u Yesu pakumenyula ichibama. ³⁶ Mwo bakuyugha ifindu ifi, u Yesu umwenecho akimilila pakati pabo, akababusha akati, ''Ulutengano lube numwe.'' ³⁷ Lole bakatetema sona bakisula nubwogha, bakinong'onagfha ukuti batesha ichishuka. ³⁸ U Yesu akababusha akati, ''Choni mukutamiwa mundumbula? Choni amasho ghakunyamuka mundumbula shinyu? ³⁹ Tesha utukono twangu nifilindu fyangu, nene une. Ngole nukungeta. Pakuti ichishuka chita numubila nafupa, isamumwo mumo mukumbonela une indinafyo. ⁴⁰ Mwo ayugha ifi, akabalangisha utukono twake nifilundu fyake. ⁴¹ Pope batakasubilagha chifukwa cha buhoboke, sona bakaswighagha. u Yesu akababusha akati, ''Muli nacho chimo ichakulya?'' ⁴² Bakamupa akamenyu kaswi imbiye, ⁴³ akegha nukulya pamaso ghabo. ⁴⁴ Akati kukwabo, "Agha mashu ghangu ghagho ngababusha mwo indi numwe, ukuti fyoshi fifyo filembiwe mundaghilo sha Mose nabakunguluka na munyimbo fikwenela fikwanilishiwe.'' ⁴⁵ Po aghila imutu yabo, ukuti bingapulikisha amasimbo. ⁴⁶ Akababusha akati, ''Filembiwe, ukuti u Kilisitu atamiwe nukushuka sona kubufwe pishiku ilya butatu. ⁴⁷ Ukupinduka nukuhobokela imbibi kulumbililiwange mungamu yake ku fyisa fyoshi, ukwandila ukufuma ku Yelusalemu. ⁴⁸ Mwe bokamboni wa findu ifi. ⁴⁹ Tesha, ngubatumila chicho u Tata wangu akambanga nune. Lole mwikale mukaya kakaka tashi mupaka mufwikiwe amaka ukufuma kumwanya.'' ⁵⁰ Po u Yesu akabatangilila ukufuma mula mupaka wakaba kupipi ku Betane. Akakwesha utukono twake nukubasaya. ⁵¹ Fikachitika ukuti, mwo akubasaya akanyamuliwa ukuya kumwanya. ⁵² Po bakamwiputa nukunyokela ku Yelusalemu nuluhoboko ulukulu. ⁵³ Bakabukilila ukuba mu tempheli, nukumusaya u Chala.