¹ Po mulusekelo lwa chibama chishita chilungo lukapalamilagha, chicho chikwitishiwa ukuti pasaka. ² Abaputi abosongo nabasimbi bakalondagha mumwo bangamughoghela u Yesu, pakuti bakoghopagha abandu. ³ Po usatana akingila mwa Yudasi, yuyo akitishiwanga Isikaliyoti, yuyo akaba ba bamu bala twelovu. ⁴ U Yudasi akabuka kwa muputi usongo nabalongoshi nukuyughisania nawo mumwo angamubikila u Yesu ku babo. ⁵ Bakahoboka nukwitikisania ukuti bamupe indalama. ⁶ Akitikisha nukulonda ulusako ukuti amupeleke kubabo kubutali nichilundilo. ⁷ Po pakisa ishiku ilya chibama ichishita chilungo, lyo akana ka nang'oshi kakemeshiwa. ⁸ Po u Yesu akamutuma u Peteli nu Yohani, akati, ''Bukagha nukunoshekesha ichakulya cha pasaka, tungalya.'' ⁹ Bakati kukwake, ''Ka mukulonda ukuti iye tunosekeshe kughu?'' ¹⁰ Akabamula akati, ''Tesha, pala mwingilashe mukaya, tiyemukumane numulisha yumo anyamwile ingumbe ya mishi. Mumukonge munyumba yiyo akuya pakwingila. ¹¹ Po muye mumubushe umwene nyumba, 'Umumanyishi akuti kukwako, ''Yilikoki inyumba ya balendo, kuko nguya pakulila u pasaka nafafundiwa wangu?''' ¹² Tiye abalangishe ichipinda ichikulu ichisa icha pamwanya. Iye mutendekeshe mulamula.'' ¹³ Po bakabuka, bakafyagha fyoshi isamumwo akababulila. Po bakatendekesha ichakulya cha pasaka ¹⁴ Mwo akabalilo kakwana, akikala pase nabatumiwa. ¹⁵ Po akababusha akati, ''Nanyenywangani ukuti indye numwe bongali ndatamiwe. ¹⁶ Pakuti ngubabusha umwe, tangalye sona mupaka fise fikwanilishiwe mu bunyafyale bwa Chala.'' ¹⁷ Po u Yesu akegha u kapu, sona mwo apalisha, akati, ''Egha ifi, nukughabana. ¹⁸ Pakuti ngubabusha, ta nise indye sona ifyakulya fya mumughunda wa mafilumupaka ubunyafyale bwa kumwanya bwise.'' ¹⁹ Po akegha ichibama, sona mwo apalisha, akachimenyula, akabapa akati, ''Ughu mubili wangu, ghugho ghukupeghiwa kukwinyu. Mubombe ifi ukuti mungumbukilaghe.'' ²⁰ Akegha u kapu musila isa yiyi mwo alya ichakulya cha namasuwa, akati, ''U kapu uyu lufingo ulupya mwibanda lyangu, lilyo likupunguliwa kukwinyu. ²¹ Lole pulikisha. Inyobe ya yuyo akusambukila yili nune patebulo. ²² Pakuti u Mwana wa Mundu naloli akwendela mumo finokesheliwe. Lole mukoshi ku mundu yuyo akufwima ukusambukila!'' ²³ Bakanda pakuyughisania benebene wini mubabo ingapanga ifindu ifi. ²⁴ Po pala pakanyamuka umukangano mubenebene uwakuti wini yuyo akeghiwanga ukuti wapamwanya. ²⁵ Akababula akati, ''Abomwene ba bandu wa kuse bali namaka papbo, sona bobali namaka papabo bakwitishiwa babombi ba mbombo inyisa. ²⁶ Lole manye fikabange bunobuno numwe. Mubuyo bwake, muleke yuyo wapamwanya pakati pinyu abe isa mukeke ngani, sona muleke yuyo wakulondiwa nganiabe isa yuyo wakubabombela. ²⁷ Pakuti wini wapamwanya, yuyo akwikala patebulo, pamu yuyo akunoshela? Ngimba teweyula yuyo akwikala pa tebulo? Lole ndipakati pinyu isa ne mubombi. ²⁸ Lole mwemwabukilila pakuba nune mukugheliwa kwangu. ²⁹ Ngubapa ubunyafyale, isa mumwo u tata wangu akambila une, ³⁰ ukuti mungalya nukung'wa pitebulo lyangu mu bunyafyale bwangu, sona timukikale pachitengo nukulonga imitundu ya waisilayeli twelovu. ³¹ Simoni, Simoni, chenjela, u satana asumite ukuti ingabasefa isa tiligu. ³² Lole nakwiputila, ukuti ulwtiko lwako manye lupotwe. Pala wanyokela sona uye ubalimbikishe abanyako. ³³ U Peteli akamubusha akati, ''Malafyale, nitendendekeshishe pakubuka nuwe ku jele nakubufwe.'' ³⁴ U Yesu akamwamula, ''Ngukubusha, Peteli ubisa taise abilike umusughu, mwo utanganite katatu ukuti ghumenye une.'' ³⁵ Po u Yesu akati kukwabo, ''Po ngabatuma ukushita ichola cha ndalama, ichola cha fyakulondiwa, pamu ifilato, chilipo chicho mukapotwanga?'' Wakamula, ''Nachimochimo.'' ³⁶ Po akababusha akati, ''Lole akabalilo aka, yuyo ali nichola cha ndalama, muleke eghe, sona nichola chafyakulondiwa. Yuyo ata nichipeni aghulishe ichakufwala chake aghule ichipeni. ³⁷ Pakuti ngubabusha, fifyo filembiwe ifya une fikwenela ukukwanilishiwa, 'Akabelengiwa pamupene nabatula nongwa.' Pakuti fifyo fikasakishiwanga ifya une fikukwanilishiwa.'' ³⁸ Po bakati, ''Malafyale, tesha! Tuli nifipeni fibili pano.'' Akababusha akati, ''Fwakukwanila.'' ³⁹ U Yesu akafumapo, isamumwo akabombelagha mukabalilo akingi, akabuka kwighamba ilya Oliva, abafundiwa bakamukongagha. ⁴⁰ Mwo bafika, akababusha akati, ''Iputa ukuti manye mwingilaghe mungelo.'' ⁴¹ Akafumapo pakati pabo ukuyana nubutali bubo ibwe lingenda pala waponia, akafughama nukwiputa, ⁴² akati, ''Nandi ukuulonda, tisha ukapu kukwangu. Nangabuli nashiku mongulondela, lole umwe mo mukulondela mubombe.'' ⁴³ Po umungelo ukufuma kumwanya akamubonekela, akamukasha. ⁴⁴ Pakuti akaba mububafu, akiputa ngani, sona amafuku ghake ghakisa ghaba ngani matonya gha libanda lilyo lkuwa pase pachisu. ⁴⁵ Mwo anyamuka ukufuma ku nyiputo, akabuka ku bafundiwa akabagha bapitile chifukwa cha chitima ⁴⁶ akababukisha akti, ''Choni mupitile? Nyamuka nukwiputa, ukuti manye mwingile mungelo.'' ⁴⁷ Mwo akali akuyugha, tesha, ichilundilo chikafika, nu Yudasi, uwamu twelovu, akabatangilila. Akabuka kupipi kwa Yesu ukuti amufyofyone, ⁴⁸ lole u Yesu akati kukwake, ''Yudasi, ngimba ukumusambukila u Mwana wa Mundu nukumufyofyona?'' ⁴⁹ Mwo babo bakamushungulila u Yesu batesha fifyo fikabombiwa, bakati, ''Malafyale tucheke numupeni?'' ⁵⁰ Po yumo babo akamucheka uwambombo wa muputi usongo, nukucheka ichufyo cha kumwisa. ⁵¹ U Yesu akati, ''Fitakabombiwe sona!'' Akakola ichufyo, nukumuposha. ⁵² U Yesu akati kumuputi usongo, nakumulongoshi wa mutempheli, nakubosongo babo bakamukola u Yesu akati, ''Ngimba mukwisa kokumwifi ni mipeni nindughu? ⁵³ Akabalilo koshi kako ngaba numwe ishiku nishiku mutempheli, mutakabika inyobe papangu. Lole aka kabalilo kinyu, namaka gha chisi.'' ⁵⁴ Wakamukola nukubuka nawe ku nyumba ya muputi usongo. Lole u Peteli akongagha pabutali. ⁵⁵ Mwo bapemba umulilo pakatikati pabuyo bwa bulongi, nukwikala pase pamupene, u Peteli akikala pakatikati palapala. ⁵⁶ Umubomba mbombo yumo umukolo akamutesha u Peteli mu bwelu bwa mulilo akamuketa maso namaso akati, ''Umundu uyuwepe akaba nawe.'' ⁵⁷ Lole u Peteli akakana, akati, ''We mukolo, ndamumenye.'' ⁵⁸ Mwo pakindashe akabalilo panandishe, umundu yumo akamubona akati, ''Nuwe wewabamu.'' Lole u Peteli akati, ''Mulisha, ndakufimanya fifyo ukuyugha.'' ⁵⁹ Mwo pakinda iawala limulyene numundu uyngi akalondelela akati, ''Naloli umundu uyu akaba nawe, pakuti Mugalileya.'' ⁶⁰ Lole u Peteli akati, ''Mulisha, ndakufimanya fifyo ukuyugha.'' Papo napapo, mwo akali akuyugha ubisa akabilikila. ⁶¹ Akasanusha, nukumuteshau Peteli, u Peteli akakumbuka amashu gha Malafyale, po akamubusha akati, ''mwo u bisa atabilikile umusughu tise ungane katatu.'' ⁶² U Peteli akafuma kuse nukulila ngani. ⁶³ Po abndu babo bakamilindilila u Yesu bakamuhoyagha nukumukoma. ⁶⁴ Nukumupinya kumaso nukumubushikisha ukuti, ''Talusha! Wini yuyo akukoma?'' ⁶⁵ Bakayugha ifindu ifyingi ifyakumushusha nukumukosha isoni. ⁶⁶ Mwo kwacha, abosongo songo bakabungana pamupene, abaputi abosongo nabasimbi. Bakabuka nawe ku mphala ⁶⁷ bakati, ''Nadi we Kilisitu, tubushe.'' Lole akababusha akati, ''Nadi nababusha, mutamupulikishe, ⁶⁸ sona nandi nabalalusha mutamwamule. ⁶⁹ Lole ukwanda ipano ukuya mundashi, u Mwana wa Mundu tise ikale kukakono kamwisa aka Chala wamaka.'' ⁷⁰ Boshi bakati, ''Po we Mwana wa Chala?'' U Yesu akabamula akati, ''Mukuyugha ukuti nene.'' ⁷¹ Bakati, ''Choni tukali tukulonda ukamboni? Pakuti utwe twibene twapulika ukufuma kumulomo wake.''