¹ U Yesu akatesha nukubabona abalisha abakabi babo bakabikagha ifyabupi muchakusopelamo. ² Po akamutesha yumo umupotwe umufwilwe akasopa utukopala tubili. ³ Po akayugha akati, ''Naloli nguyugha ku kwinyu, umupotwe uyu umufwilwe abika ifyingi ukukinda mweboshi. ⁴ Boshi aba bakasobagha ifyabupe ukufuma mufyingi. Lole umufwilwe uyu, pabupina bwake, asopa fyoshi fifyo akaba nafyo ifyakumwafya akikalile.'' ⁵ Mwo bamu bakuyugha isha tempheli, po finoshiwe buleghe nubisa bwamabwe sona nifyakupeleka, akati, ⁶ ''Ukufyana nifindu ifi fifyo mukufitesha, amashiku ghakuya pakwisa papo nalimo ibwe lilyo likuya ukuba pamwanya palinine ukushita kubutuliwa.'' ⁷ Po bakamulalusha yuyo, ukuti, ''Mumanyishi, po ifi fikwisa ukubombewa lighi? Po chikwisa kuba chifwanikisho chiki po fyoshi ifi fikwisa kubombiwanga?'' ⁸ U Yesu akamula, ''Muchewe ukuti manye mwise mushimbuliwe. Po abingi bakwisa kwisa mungamu yangu, nukuyugha, 'Nene une, sona, 'Akabalilo kapalamila.' Manye muye pandashi pabo. ⁹ Pala mukupulika ishi bwite nukwambana, manye mutetemaghe, poin fyoshi fikwisa kubombiwa tashi, pabumalilo fitakwisa kubombiwa papo napapo.'' ¹⁰ Po akati kukwabo, ''Ichisu chikwisa ukung'amukila ichisu ichinine, ubunyafyale pa bunyafyale. ¹¹ Tikukabe utusenyenda utukulu, sona mubuyo ubwingi isala nimbina. Tikukabe ifyakubombiwa ifyakuswighisha nifimanyikkisho ifikulu ifya kufuma kumwanya. ¹² Lole mwo fitabombiwe fyoshi ifindu ifi, tibakabike utukono twabo papinyu nukubafyima, ukubabika kusinagogi namuma jele, ukubuka numwe kubanyafyale na balaghili ba chisu chifukwa cha ngamu yangu. ¹³ Tighukabe mwabi palushimikisho lwinyu. ¹⁴ Polelo mushimikishe mundumbula shinyu ukuti mutakise musenganiange ishakuyugha pakabalilo kalakala, ¹⁵ pakuti tingabape amashu namahala ukuti abalughu binyu boshi tabakakane pamu ukususha. ¹⁶ Lole sona timukapelekiwange naba papi binyu, nabowamwinyu, sona tibakabaghoghe bamu mwa umwe. ¹⁷ Timukabengiwe na aliweshi chifukwa cha ngamu yangu. ¹⁸ Lole nakamu akang'ili ka pamutu winyutikakanangike. ¹⁹ Mukupilila kwinyu timukabwaghe ubwumi bwinyu. ²⁰ ''Pala mukutesha u Yelusalemu ashingiliwe nabashilikali, po mumanye ukuti ukupokiwa kwake kuli papipi. ²¹ Po baleke aba Judeya bakindile ku fighamba, po bali mukaya akakulu bakaleke, po nababo bafumite muchisu manye bingilaghemo mukaya akakulu. ²² Pakuti agha mashku ghakunyosha, pakuti ifindu fyoshi fifyo fisimbiwe fikwanilishiwe. ²³ Mukoshi kubabo bali nifukwe nababo bakongesha mumashiku ghalaghala! Pakuti tikukabe ukuyimba ukukulu mukaya nubukali kubandu aba. ²⁴ Bakwisa pakuwa pobatesha ichilwilo, sona po bali balongosha kuba basha ba fyisu fyoshi, po u Yelusalemu akwisa pakupondeliwa nabakuse mupaka po akabalilo kubakuse kakwanishiwa. ²⁵ Po pasukuba ifimanyikisho mwisuba, mu mweshi, sona na mundondwa, sona namu chisu. Ichisu chikwisa pakutamiwa, ukusulumania chifukwa cha kakutile ka nyanja namayigha. ²⁶ Bakwisa ukubapo abandu babo bakwisa pakushilika ukufuma kubwogha sona nukufuma kufifyo bakwinong'ona ku findu fyondifyise fibombiwe pa chisu. Po amaka ghakumwanya ghakwisa kuyungana. ²⁷ Po bakwisa pakumutesha u Mwana wa Mundu akwisa mumabingu namaka sona nubukulu bwake. ²⁸ Po pala ifindu ifi fyanda pakubombiwa, nyamuka sona nyamusha imitu yinyu, papo umupoki winyu ali papipi pa kwisa.'' ²⁹ U Yesu akababula ichili, ''Tesha ichikokwe icha mafilu, sona nifikokwe fyoshi. ³⁰ Po fyabika ubwesha nutuseke, mukwisa ukutesha mwebene sona nukumanya ukuti ichishiku chili papipi. ³¹ Po sona, linga mukutesha ifindu ifi fikubombiwa timukamanye ukuti ubunyafyale bwa Chala buli papipi. ³² Naloli nyuyugha kukwinyu, ingulile iyi yitakuya pakushilapo mupaka fyoshi ifi fyise fibombiwe. ³³ Kumwanya sona ichisu fikwisa pakumala, lole ishu lya Chala litakwisa pakumala lumo. ³⁴ "Lole upulikishe pawimwene, ukuti indumbula yako manye ying'wamilwe nifyakung'wakung'wa sona nuboching'wela sona nifyakupasha nifyakupasha fya bumi, sona ichiku lila telikabe papipi nuwe lole umwakushishimusha isa kapingo. ³⁵ Po chikuya pakwisa pa mundu wishe yuyo akwikala pa chisu cha pase choshi. ³⁶ Lole mube maso akabalilo koshi, mwiputaghe ukuti mube namaka ukwenelela ukuti mwitishe ku findu fyoshi fifyo tifikabombewanga, sona nukwimilila papipi nu Mwana wa Mundu.'' ³⁷ mukabalilo kalakako akamanyishanga mutempheli, papo pabushiku akufumapo sona akikala pighamba lya Oliva. ³⁸ Abandu boshi bakalabila pangelo ngani ukuti bapulike kukwake mu tempheli.