¹ Igoe egiteu la valua la ilabi la takis me egiteu la valua la iruru,egite gomai ge lolo la merera te Isus. ² Tio egiteu e Farisi me egiteu la valua la mari egite vikara totolo maie,''la tahalo ale eia puli egiteu la valua la igo la iruru,me eia ali vikapopo tomi le egite. ³ Tio e Isus igo isa la merera la tovolaila soio te giteu me eia vei maie. ⁴ Mai isasa tamuto tahokea la sipsip la salatu isasa me isa kabili te giteu ge kokovu,koramuli eia ge hiliti taro egiteu ale savulu valasiu gete valasiu oio la ba bubu moli me ge goio ge pamuli ale isasa kokovu ge puli rivua? ⁵ Mae eia sivutiti la sipsip alele,eia ge taua te lamagorola me eia ge sagege sesele. ⁶ Laimamala ale eia guvi oio la luma te tala,tio eia ge tola egiteu e vikilipilipi te tala me tabarabarala ge gomai me eia vei agite mae,amuto gomai sagege tomi le eau.Eiau sivutitia la sipsip taku ale kokovu. ⁷ Eiau vei sesele amuto,la tia sagegela ale uru sesele ge guvi oio la lalage la imamala ale la tahalo la iruru ge vulo la mahulila.La tia sagegela ale pepe sele egite ale savulu valasiu gete valasiu la valalua me hatavivile. ⁸ Latavile isasa eia sautola la vati savulu sasa,me mai la vati tetala i sage kokovu.A soge eia kama koramuli ge viroko la lam,me eia ge sasapa la luma ge mamatea koramuli eia ge sivuti la vati alele. ⁹ Laimamala ale eia sivutitia,tio eia ge tola egiteu e varagalagala me tabarabarala ge gomai ge vikapopo,me eia ge veiagite mae,amuto gomai sagege tomi le eau.Eiau sivutiti la vati tegaku ale eiau igo kokovua. ¹⁰ Ala mae ,eau vei sesele amuto,egiteu e angelo te la Tahalo Uru oata la lalage ge sagege sesele la imamala la tahalo la iruru isasa vulo la mahulila. ¹¹ Me e Isus vei lou maie, la tahalo isa tahoka e latula ilua. ¹² E latula la vailuala vei ale tamala maie,tete,eme vilele la papaga tomi taume kabili tamilua me tuagu.Ale tegaku eme abiagu,tio e tama girua vilelea lapapaga te tala kabili tegirua. ¹³ Akama taba e tama girua vilelea papaga alele,E latula ale bisi goio vikapopo tomi la papaga ale tamala abiala,me eia tuga soi isa la ba ale malau.Te la ba alele eia igo la vulovulo ale kama tartigi la vati te tala kalivu. ¹⁴ La imamala la vati te tala kalivu,la vitolola uru guvi la ba alele.Me eia kati tahoka isa la paga. ¹⁵ Ala eia goio pamuli la igogolu oio te la tahalo isasaoio la ba alele.La tahalo alele bahea goio baumuli la bolobolo te tala. ¹⁶ La imamala ale eia baumuli la bolobolo,eia vitolo bara sesele me eia goma ali la bautu labin ale la bolobolo ali piligiligia.Ilava isa ouka abiala la ilali. ¹⁷ Tio goga la gabutatalala guvi rivu,me eia vei maie,egite la bilalaha oio te laluma te tete,egite tahoka usu la ilali,ala moli eiau ge pou omai ge peho la vitolola. ¹⁸ Eiau ge hele taroa la ba ale me eiau ge beurivua soio te tete.Me eiau ge vei ala maie,''Tete eiau igo la iruru soio te la Tahalo Uru me soio taume tai. ¹⁹ Eiau kama tartigi ala eme umala ge tola le eiau mae e latumumu,eme ge tola le eiau mae la bilalaha taume. ²⁰ Tio eia hiliti tuga rivu soio te tamala.La imamala ale eia solo malau,e tamala hiloa la tia le tamala gogori sesele le eia.E tamala hari soio lauroboa me eia piua. ²¹ Me e latula vei ale tamala mae,tete eiau igo la iruru sio te La Tahalo Uru me soio taume tai.Eiau kama tartigi eme ge tola le eiau e latumu. ²² Alamoli e tamala goi vei agite la bilalaha te tala mae,amuto tuga hari soio abia la lavalava tegiaku ale malau somai ge vikai robo le eia.tau la ring oio la kukula,me vikai le eia la silipa. ²³ Me amuto goio lao isa e latula bulmakau ale la kabilila tubu sesele.Etato ge igo la ilali me e tato ge sagege. ²⁴ Ilava,e latugu ale pehoti,ala moli igoe eia mahuliti lou.Eia goi kokovuti,ala moli igoe e tatou abirivutia.Tio egite sagege bara sesele. ²⁵ Me la imamala ale e latula la posolagu oio la mahuma gomai sibitala.Laimamala ale eia gomai hagagavi la luma,eia lolo la mareregola uru me egite tilalia. ²⁶ Tio eia tola isa labilalaha gomai eia tahia mae egite ale igigo lava. ²⁷ La bilalaha alele vei ala maie,e tarimu beurivutia somai,ala e tamamu bili isa la bulmakau ale la kabilila tubu ilava e tamamu sagege le latula beurivutia somai. ²⁸ E latula la posolagu igo totolo ala eia kama masaga ge goilo la luma.Ala e tamala gali sogala vikara gogo soio te tala veiage lapu la tiala sotalo. ²⁹ Ala moli e latula la posolagu kolia le tamala maie,loloa,la imamala usu sesele eiau igogolu mai la bilalaha taime,me eiau ka lolotaro isa la merera taime.Me laimamala isa ouka eme ge abiagu isa e latu la meme eiau ge sagege tomi le vikilipilipi gu. ³⁰ Ala moli e latumu ale vikaluvu tomi la papaga taume soio la vulovulo ale ale kama tartigi.Ala igoe eia beurivua eme sagege leia eme bili isa la bulmakau ale la kabilila tubu. ³¹ E tamala vei lo ala maie,latugu,laimamala tomi eme mou tomi le eiau me lapapaga tomi tegiaku a taume. ³² E tatou ge sagege,ilava e tarimu ale eia pehoti,ala moli igoe eia abi rivu lou la mahulila.Eia goio kokovuti,ala moli igoe e tato abi rivuti loua.