¹ Tio la imala e Isus tetepolo, eia goio hilo vuti la tahalo isa e tilala pigoa eia matakea loio ti la pepesola, ² Egite la Disaipel tetala goio tahia mago, Tahalo la vimari, ere igo la iruru, la tahalo aleie ouka e tilala tamala, Ala e tilala pigoa eia matakea moli mae?" ³ E Isus kolia mago," Akama la iriru tela tahalo aleie, ouka te tilala me tamala, ouka maele la vuhula la igolula te Deo ge sibitala matagaga oilo tetala. ⁴ Etato ge igo la igolula te la tahalo ale baha eau la imala ale la haro soloio. la maligoma loio ge gomai la imala ale isa ouka tilou ge igo la igolula. ⁵ La imala eau oilo tela mautu la magasa, Eau la matagaga oilo tela mautu la magasa." ⁶ Mulmuli teale e Isus vei kaluvu tia gite la papaga alele, eia goio kapute sotalo la magasa a igoa maela Pita, me agoio bubu la Pita oio la matala. ⁷ Agoio veiala mago," Tuga goio, pupuru oio la lomu le siloam" (la masovala mae "bahataro"). tio la tahalo le goio tuga, agoio pupuru, agoio beurivua la matala mata pulala ti. ⁸ Goio egite la valalua ale egite mou vikapopo me egite ale pala hiloa mae eia la maura egiteu vei mago," Muto ale soge la tahalo moli ale popou kaka la vuliti?" ⁹ Isahari tegite vei mago," Ale eia moli," Egite ale isahari vei lou mago," ouka, aga mae moli eia." Goio eia veia mago," Ale eau moli." ¹⁰ Egite goio veiala mago," Me la matamu kope mave, ¹¹ Eia kolia mago, " La tahalo ale la isala e Isus igo la pita gomai bubua omai la matagu kaluvu agoio veiagu, ' Goio te la lalu e Siloam eme pupuru, tio eau tuga goio pupuru, me la matagu kope." ¹² Egite goio veiala," Me eia la oveiti?" Eia goio kolia giteu," Eau oukati rovi eia." ¹³ Egite goio vahari la tahalo ale matakea le soio tegite Paraseo. ¹⁴ La logo ale eia la Sabat male e Isus igo la pita goio kope la mata la tahalo le ovola le. ¹⁵ Tio egite Paraseo goio tahi loua mago la matamu tartigi mave. Eia goio vei loua giteu," La tahalo le tau la pita omai la matagu,me eau goio vipuru, ala male eau omai mata tie." ¹⁶ Egite Paraseo isahari goio vei mago,"La tahalo aleie kama loio te Deo a oio kama togo la Sabat. " Egite ale isahari vei mago, La tahalo aleie eia la tahalo la iriru sele age igo la irovilala ale mae mave?" Tio kabili tegite lou egite vilele tio. ¹⁷ Egite goio tahi suku lou e moura la matakea le," Eme ge vei mave tela tahalo aleie, loio ti la imala ale eia kope la matamu gomae, La tahalo ale matakea le vei mago, Eia isasa la Propet." ¹⁸ Ala moli egite Juda soloio kama tautaulailo tela matala ale kopele igoa kara mae egite tola e tilala me tamala tahalo ale la matala kope le. ¹⁹ Egite goio tahi e tamala me tilala," Ale e latu mula ale hatamale e tilala pigoa me eia matakea male? Me ale eia oio mata a igo mave?" ²⁰ Goio e tilala me tamala kolia gite mago," Amila rovia mae ale e latu mila ale hatamale e tilala pigoa eia matakea moli. ²¹ Me eia igo mave eia oio mata pulala tie, Amila kama rovia, me ere tai kope la matala, amila kama rovia. Amuto tahi eia, eia tai uru ti. Eia lou ge vei eia." ²² E tamala me tilala vei tomia gite la papaga alele,La vuhula egira taga egite Juda. La vuhula egite Juda kisiti la merera via mae la tahalo isa ge veia mae eia e Kraist, Egite ge pigia sogala loilo la luma la lotu. ²³ La vuhula ala, e tamala me tilala veia gite mae, " Eia uru ti, tahi eia." ²⁴ Egite tola lou la tahalo ale matakea la tagara luala soio tegite me egite goio veiala mago," Abia le Deo la marasala. Amite rovia mae la tahalo alele eia la tahalo la iriru. ²⁵ Goio la tahalo le kolia mago," Eau kama rovi mae eia la tahalo la iriru o ouka. La paga moli isa eau rovia: Amae eau matakea, me ale igoe eau koramuli ge mata." ²⁶ Goio egite kolia mago," Eia igo larova soio taume? Eia kope la matamu mave?" ²⁷ La tahalo le goio kolia gite mago," Eau veitia muto mamuga, Amuto kama loloa,! Ilava amuto viage lolo loua? Mave amuto tai masaga ge guvi mae la Disaipel tetala, amuto masagea? ²⁸ Egite mera barala me egite vei mago," Eme tai e Disaipel tetala, Amite ale la Disaipel te Moses. ²⁹ Amite rovia mae e Deo meramera ti soi te Moses, Ale amite kama rovia ale isale loiola ba ale mave," ³⁰ La tahalo le goio kolia gite a vei mago, " La paga ale uru sele me a halaba, ale amuto kama rovia a loio la ba ale mave, alamoli eia kope la matagu. ³¹ Amite rovia mae e Deo kama lolo egite la tahalo la iriru, ouka la tahalo moli ale abi la imala tetala me eia tilimuli la masagala tetala, me eia ge lolo eia. ³² Araura ti la siloko la mautula etato kama lolo isa la tahalo kope la mata la tahalo ale e tilala pigoa me eia matakea. ³³ Mae la tahalo aleie kama ge loio te Deo, eia kama koramuli ge igo isa la paga," ³⁴ Egite goio koliala egite veiala mago," E tilamu pigo eme oilo tela vulovulo ale kama kora, eme omai viage vimari lou amite?" Tio egite goio sautolea pigi eia sogala. ³⁵ E Isus goio loloa mae egite pigi ti la tahalole loilo la luma la lotu, Eia goio poga eia me eia veiala mago, eme tautaulailo tai oilo te e latula tahalo?" ³⁶ Agoio tahi mago, Eia ere sele, via eau ge tautaulailo oilo tetala?" ³⁷ E Isus goio koliala mago,"Eme hilo ti eia, me eia moli male vigagia tomi le emei." ³⁸ La tahalo le goio vei mago," Uru, Eau tautaulailo ti," eia goio lotu tavu eia ³⁹ E Isus vei mago,"Oilo tela mata mulila eau gomai tela mautu la magasa via egiteu ale kama mamata egite mata lou me egite ale mamata egite ge matakea." ⁴⁰ Tio egite Paraseo ale isahari vikapopo mele eia egite lolo la papaga alele me egite goio tahi eia," Mave amite tai matakea?" ⁴¹ E Isus goio veia giteu mago," mae amuto ge matakea, amuto kama ge tahoka la iriru, alamoli igoe amuto veia. amuto oio mamata, ala la iriru tamuto oio tabuli moli,"