¹ Mulmuli tela papaga tomi alele, e Isus tuga goio tela gale la mago loio e Galili, me egite toi taila la mago le Tiberias, ² La valua me hatavile usu sele hari mulmuli eia la vuhula egite hilo la irovilala ale eia igoa soio tegite ilalea. ³ Goio e Isus goata la olu oata vola eia pou tomi le egiteu la Disaipel tetala. ⁴ (A la imala Pasova, la pou golula tegite Juda, eia hagavi ti.) ⁵ La imala e Isus mata soata eia hilo la valua me hatavile loio ge gomai tetala, eia goio veiale Philip mago," Etato ge loto la Beret oiove ila egite ali?" ⁶ (Ale e Isus vei moilia maele via ge tovolai e Pilip, eia lou oio rovi larova eia ge igoa.) ⁷ Goio e Pilip koliala mago, "la Dinari la salatu ilua akoramili ge loto la Bret alamoli akama koramuli via egite tomi isasa ge abi bakisi." ⁸ Isa tegite lou la Disaipel tetala, e Andrew, e tabarabara le Pita, a veiale Isus, ⁹ " E giliki isabisi moli omae taola la gale la Bret ilima vikapopo me Elaia ilua, alamoli egiteu aleie usu peho?" ¹⁰ E Isus goio vei mago," Amuto igo egite ge pou otalo." oio la ba alele la garasi usu sele, tio egite la vala pou otalo, la giligi gite la Taosen ilima. ¹¹ Goio la imala e Isus abi la Bret mulmuli tela kilaka eia goio abia giteu ale otalo popou ele. me eia igo maigo tai te Laia le, akoramili sele ale egite masagea. ¹² La imala ale egite la valua me hatavile maru,eia goio veia gite la Disaipel tetala, Tau olu la makara gite mela momola ale piligi le, la vuhula la paga isa kama ge kokovu." ¹³ Tio egite tau olu tomia me egite tovoa soilo la kela savulusa gete lua vikapopo la bautula ale paru momo loio tela Bret ilimao me ale egite ali piligia. ¹⁴ Goio, la imala egite la valalua hilo la rova eia igo tia le, egite goio vei mago, La seselela ale la Propet male gomai ti tala mautu la magasa." ¹⁵ La imala e Isus rovitia mae egite gomai ge sautola eia ge vikara souka ge guvi mae e Suara, eia goio lake taro egite me eia sekela goata tela olu. ¹⁶ La imala agoio maulavi, egite la Disaipel tetala tuga gotalo tela mago. ¹⁷ Egite goio sae soilo te Boti, me egite polo utu olau viage goio e Kapernaum. La imala alele la paga masori ti, e Isus souka gomai tegite. ¹⁸ Goio la lovi ale vagari sele oio vavai, me la mago tai hiliti ti. ¹⁹ La imala ale la mago pigi vulo egite vikapopo mela obu la gili la malau la ba, egite goio hilo e Isus tatuga oata la mago me eia tuga hagavi ti somai te Boti, egite taga tio, ²⁰ Alamoli eia veia gite mago,"Ale eau! amuto umala tataga." ²¹ Goio egite masaga tia viage puli eia soilo e Boti, karutu moliti e Boti guvi oilo la magasa oio la ba ale egite veia gite goio vola. ²² Goio la logo isa polo, la valua me hatavile ale magirigiri oio tela rere la mago loio hiloa mae e Boti isa oukati lou ale moli isale, alamoli e Isus kama sae tomi le egiteu la Disaipel tetala ale egite la Disaipel tetala moli sae me egite tuga. ²³ Soge e Boti isahari loio e Tiberias hagavi soio tela la ba ale etato ali la Bret mulmuli teale la Uru vibalavea. ²⁴ La imala egite la Disaipel tetala hilo tia mae soge e Isus ouka egite la Disaipel tetala male oio le. tio egite tomi sae soilo te Boti egite goio mata e Isus. ²⁵ Mulmuli teale egite goio pogea oio tela gale la mago loio, egite goio tahia mago, Rabbi, la imala ale mave eme gomai?" ²⁶ E Isus goio kolia gite, a vei mago, " la seselela,me asele,amuto mata eau, la vuhula kama via amuto hilo la irovilala, ouka la vuhula amuto ali isahari la Bret me amuto maru. ²⁷ Amuto umala ge igogoluala ilali ale ge kaluvu, ouka amuto ge igolu tela ilali ale ge vituga amuto soio tela mahulila ale la tapasila ge ouka ale e latula tahalo ge abia mu, la vuhula e Deo tama tau ti la irovilala oata tetala." ²⁸ Goio egite veiala mago, " Me amite ge igo mave, via amite ge igo la igolula te Deo?" ²⁹ E Isus kolia me a veia gite mago, "Ale la igolula te Deo: Mae amuto ge tautaulailo oilo tela tahalo ale eia bahea." ³⁰ Tio egite veiala mago, "Me la irovilala ale mave eme ge igoa, ila amite ge hiloa me amite ge tautaulailo oilo taume? Eme ge igo larova? ³¹ E tatama gatou ali la Mana oilo la ba la kue pa, a mae moli ale kekesitia, 'Eia abia giteu la Bret loata la ilo lalage via egite ge alia. ³² Goio e Isus kolia gite mago,"La seselela,me asele, Ale kama e Moses male abia muto la Bret loiolo la ilo lalage, ouka ale e tete male abia muto la Bret ale sele loio la ilo lalage. ³³ La Bret te Deo eia male guvi loio la ilo lalage me eia viguvi la mahulila somai tela mautu la magasa." ³⁴ Goio egite veiala mago, Tahalo uru, eme ge abia mite la Bret alele la imala tomi." ³⁵ E Isus kolia gite mago, " Eau la Bret tela mahulila, la tahalo ale ge gomai taku kama koramuli ge vitolo lou, me la tahalo ale tautaulailo taku kama koramuli ge malehu. ³⁶ Alamoli eau ge veia mutou asele amuto hilo ti eau, alamoli amuto kama tautaulailo. ³⁷ Egite tomi ale e tete ge abia gu egite ge gomai taku, me la tahalo ale ge gomai taku eau kama koramuli ge pigi eia sogala. ³⁸ Me eau loata la ilo lalage, kama ge igo la masaga gu, ouka la masaga la tahalo ale baha eau. ³⁹ Aleie eia la masaga la tahalo ale baha eau, via eau umala ge tau taro isa tegiteu ale eia abitia gu, Alamoli ge vahiliti rivu egite oio tela tapasila elogo. ⁴⁰ Ale eia la masaga le tamagu, via egite tomi ale hilo e latu la tahalo me egite tautaulailo oilo tetala ge tahoka la mahulila ale la tapasila ge ouka me eau ge vahiliti rivu eia tela tapasila logo." ⁴¹ Goio egite Juda mera kumu tiala la vuhula eia veia mae, "Eau la Bret ale loata la ilo lalage." ⁴² Egite vei mago," ila e Isus ale kama e latule Josep, e tamala me tilala etato rovi egira? Ale eia vei tiloua age mave, 'Eau guvi loata tela ilo lalage?" ⁴³ Goio e Isus kolia gite a vei mago, "Amuto ge maila la vikarara kumula. ⁴⁴ Isa kama koramuli ge gomai taku mae moli e tete ale baha eau ge lapu eia, me eau ge vahiliti rivu eia oio tela tapasila logo. ⁴⁵ Egite kekesi tia oilo tegiteu la Propet, ' Egite tomi e Deo ge vimari egiteu.' Me egite tomi ale lolo me egite vimari loio te tete egite ge gomai tegaku. ⁴⁶ Kama via egite tomi hilo ti e tete, ouka egite moli ale loio te Deo--- egite hiloti e tete. ⁴⁷ Asele, me asele, la tahalo ale tautaulailo eia tahoka ti la mahulila ale la tapasila ge ouka. ⁴⁸ Eau la Bret la mahulila, ⁴⁹ E tatama mutou ali la Mana oilo la ba la kue pa, me egite tomi peho. ⁵⁰ La Bret ale loata la ilo lalage, ila la tahalo ge ali oio volae eia kama koramuli ge peho. ⁵¹ Me eau la Bret ale mahulili ale guvi loata la ilo lalage. Mae la tahalo isa ge ali isahari la Bret ale, Eia ge mahuli la kama ge tapasi, Me la Bret ale eau ge abia muto eia la mailigu ale eia la mahulila tela mautula magasa tomi." ⁵² Egite Juda vaigo tolo rivu lou goio egite vikorosi, me egite vei mago, " La tahalo ale ge abia gatou la vovola ge alia mave?" ⁵³ Goio e Isus veia gite mago," La seselela, me asele, Mae moli eme kama ge ali la vovo le latula tahalo me eme kama ge liu la kasosola, eme kama ge tahoka la mahulila oilo taume. ⁵⁴ Ere moli ale ali la vovogu mae eme ge liu tai la kasosogu eme ge tahoka la mahulila ale la tapasila ge ouka, me eau ge vahiliti rivu eia tela tapapasi la logo. ⁵⁵ La vovogu eia la ilali sele, me la kasosogu eia tai la lalalu iliu sele, ⁵⁶ Ere moli ale ali la vovogu me eia liu la kasosogu age mou oilo taku, me eau tai ge mou oilo tetala. ⁵⁷ Mae moli e tete ale mahulili baha eau, Mae eau tai mahuli la vuhula e tete moli, Ala mae ere isa ge ali eau, me eia tai ge mahuli la vuhula eau moli. ⁵⁸ La Bret ale eia loata la ilo lalage, akama mae ale egite tatama gatou alia me egite peho. Mae ere isa ge ali la Bret aleie eia ge mahuli akama ge kokovu." ⁵⁹ Ale e Isus vei pala la papaga aleie la imala ale eia igigo la vimari oilo e Kapernaum. ⁶⁰ Goio egite la Disaipel tetala usu lolo la merera tetala me egite vei mago," La vimari ale tivura sele, ; ere koramuli ge abia?" ⁶¹ E Isus, la vuhula eia lou rovia oilo tetala via egite la Disaipel tetala oio vikara mulmuli la paga alele, eia goio veia giteu, "mave la paga aleie igo bara sele amutou? ⁶² Goio mae eme ge hilo e latu la tahalo ge goata rivu tela ba ale eia oio vola pala? ⁶³ Ale la kalulu maroka male viguvi la mahulila; La vovo kama viguvi isa la paga. La merera ale eau vagogalea soio taume eia la kalulu, me eia tai la mahulila. ⁶⁴ Alamoli isahari tamuto soloio souka tautaulailo." E Isus rovitia loio tela silokoloko egiteu ale kama ge tautaulailo me egite ale ge tahi taro eia. ⁶⁵ Eia vei mago," Ale a la vuhula ale eau veia muto mae isa kama koramuli ge gomai taku mae moli e tete ge sugutaroa eia somai taku. ⁶⁶ Me ale la vuhula ale, egite la Disaipel tetala usu hele taro eia me egite kati tuga tomi le eia. ⁶⁷ Goio e Isus veia gite ale savulusa gete lua, " Amuto tai kama masaga ge beu taia, amuto tai? ⁶⁸ Gio e Saimon Pita veiala mago,"Uru, Me amite ge goio lou tere? eme moli tahoka la merera la mahulila, ⁶⁹ Amite tautaulailo me amite rovi selea eme sekela moli maroka ale loio te Deo." ⁷⁰ E Isus vei gite mago," Mave eau kama hilovi emei, egite ale savulusa gete lua, me isa tamutou eia la hitu?" ⁷¹ Ale eia vevei e Judas e latule Saimon Iskariot, me ale eia, isa tegite ale savulusa gete lua, Eia ge abia gite la gima e Isus.