1
Pali e Sol,erei i tabana ni ta tora nani rabalaki e hurika murimuri ne Viridagi,ia i vano ni matai a mugamuga,
2
lakea i nanea ni here maka raukea ni longo vona ge nugutata e hurika bakovi a ngatavine erei ri ramai a dala ne Viridagi ri made iea o Damaskas, ni bole valai ria o Jerusalem.
3
Na tahuna ia i tabana ni vano,ia i valai tabukoi iea o Damaskas,vavilangau a ni para dagi i valai na hunu lakea i para haluia;
4
lakea i boru puru na malala i longoa tara ni gale i taki maea ia,"Sol,Sol,i navai o ratapile iau?"
5
Lakea e Sol i koli mule ia i ta maea,ioe erei,ioe e Viridagi,e?"Lakea e Viridagi i tamaea,"Iau e Isu,erei ioe o ratapilea.
6
Pesi o dili pololilo na tanga dagi,bara ri takoe na ara maki boro ratea."
7
Hurika bakovi erei ri vano turane Sol ri pesi kama ri ratea tara ngava tahuna ri longoa tara ni gale,pali kama ri masia tara bakovi.
8
Sol i pesirike na malala na tahuna ia i matapara,ia kama i masia tara maki;lakea ri nugua limana ri bole lakea iea o Damaskas.
9
Na parava i tolu ia kama i matapara,lakea kama i kani ge ninu.
10
I tahoka tara murimuri i made iea o Damaskas a rana e Ananias.Lakea i vurena e Viridagi i ta vona i ta maea,"Ananias!"Lakea i koli maea,"Viridagi,iau a made koea."
11
Pali e Viridagi i taki maea ia,"Pesi,o lakea na dala ni gale maea malamala,na ruma ne hurika Judas o nana vona tara bakovi arana e Sol,ia i vasileki vonga.
12
Lakea ia i vurena pali,tara bakovi a rane Ananias i dili pololilo i ru langa limana vona,ia bari matapara tabu."
13
Pali e Ananisa i kolia i ta maea,"Viridagi,iau a longo e hurika bakovi a ngatavine ri tata vona ra bakovi iea,na maka ni hale dagi ia i rata pali na maka bakovi a ngatavine malamala ne vomu iea o Jerusalem.
14
Pali ia ni longo vona na maka mugamuga ni nugutata e hurika bakovi a ngatavine erei ri gale a ramu."
15
Pali e Viridagi i taki maea ia,"Vano,na rana iau a pasia pali ni bele manga voravora nau,ni bole a ragu ge lakea ne huriki a tara ranga a bakovi a ngatavine ne hurika king na maka koma iea o Israel;
16
Pali iau bara vakasiria na maka ni madihi ia bari bolea na maka leho ia i ratea na ragu."
17
Pali e Ananias i lakea lake,ia i dili na ruma.I ru langa limana vona,lakea i takia,"Sol turagu,Viridagi e Isu,erei i bele kavakava ne vomu na dala na tahuna ioe o valai koea,ia i rudau a valai ne vomu go matapara tabu lakea bara o vonu na Hanu Kiripiripi."
18
I laviriri hateka maka maki i manga honana manu ri madoko na matane Sol,lakea ia i mata tabu,lakea i bole a baptasi;
19
Ia i kani i bole a ni tora.Ia i made turane hurika murimuri iea o Damaskas na parava ranga.
20
I laviriri ia i takitalea rane Isu pololilo na ruma ni turume puruma na maka Juda,ia i taki maea ia e tune Deo.
21
Hurika bakovi a ngatavine erei ri longoa ri turutu hateka ri taki maea,"Ia ra bakovi i ratapile hurika bakovi ri gale a rane Viridagi iea o Jerusalem.Lakea ia i valai koea ni nugutata ria ni bole lakea na maka mugamuga."
22
Pali e Sol i bele tora hateka ni takitala ngava ia i rata e hurika tara o Juda ri made iea o Damaskas ri tamudi mava hateka na tahuna ia i takitala maea e Isu ia e Kristo.
23
Muri na parava i kupo,maka tara o Juda ri vata ni rabalakia.
24
Pali e Sol i lohoka pali vona ni vata ne ria.Lakea ri matakari maka ni hebi na tanga dagi na haro na rodo rigi rabalakia.
25
Pali maka murimuri vona ri bolea ri rua na kulopi ri vakatavore purua na gagana,ruma i vano.
26
Na tahuna ia i bele o Jerusalem,ia i ngaru ni vapopo turane hurika murimuri.Pali ria lobo ri mangege vona,pali kama ri luhoitora maea ia i bele manga tara voravora.
27
Pali e Barnabas i bolea i taparaki lakea na maka aposel,lakea i taki maea ria,Sol i masia na dala e Viridagi lakea e Viridagi i takia,pali e Sol kama i mangege i ta dagi hateka iea o Damaskas na rane Isu.
28
Ia i vapopo turane ria,tahuna ri valai o Jerusalem ri vano.Lakea kama i mangege i takitala torea a rane Viridagi e Isu
29
Ia i tavagege turane hurika turana tara iea o Juda;ri valai o Gris,ri toni ni rabalakia.
30
Tahuna maka turana ri lohoka na hini nga,ri bole purua iea o Sisaria ri rudu tabua i lakea o Tarsus.
31
Tahuna a maki nga i bele,maka sios iea o Judia,Galili turana Samaria ri bole a ni tamudi puruma ri bele tora;ri laho vona ri mangege ne Viridagi i rata kamumu ria a Hanu Kiripiripi,i kupo e hurika bakovi a ngatavine ri pulo a vilone ria.
32
Na tahuna iea,e Pita i laho na maka tanga lobo,ia i puru valai i matai maka bakovi a ngatavine ri luhoi tora ri made na tanga dagi iea o Lida.
33
Na tabeke nga ia i matavisia tara bakovi a rane e Ainias.Ia i mahita na kiri vona na pida i polotolu,na rana a kakaina lobo i mate pali.
34
Lakea e Pita i takia,"Ainias,e Isu Kristo i vaka mahuri ioe.Ioe o pesirike o ratea kiri vomu,"Lakea i laviriri i pesi.
35
Lakea maka bakovi a ngatavine ri made iea o Lida turane Saron ri masia ra bakovi iea ri pulo a vilone ria ri valai ne Viridagi.
36
Iea o Jopa i tahoka tara murimuri a rana e Tabita,(a vuhuna rana iea i maea"Dokas"Na ni tana Grik).Ra ngatavine iea i vonu na naro kamumu lakea i kara ni dodo e hurika bakovi a ngatavine ri matasia.
37
Na tahuna iea ia i bole a gilanga i mate ri vahiloloa ni ru polomeli liu na ruma a podana.
38
Lida i made tabukoi iea o Jopa maka murimuri ri longo maea e Pita i made vonga.Lakea ri rudu a bakovi i ala rua ru nanea ru ta,"Valai laviriri ne mia."
39
Lakea e Pita i pesirike i muri ne ria.Tahuna ia i bele,ri bole dilia na rum i tabuli polomeli.Pali maka ngatavine e girihine ria i mate pali ri pesi tabukoi vona ri tangi,ri vakasiri vona varikia i rata e Dokas na tahuna ia i made turane ria.
40
Lakea e Pita i lilitala ria lobo na rum,ia i pasike puru i vasileki;muri ia i pulo lakea na podana lakea i takia,"Tabita,pesirike."Lakea ia i matapara,na tahuna ia i matai e Pita ia i pesi i made.
41
Lakea e Pita i toto puru i tulipesia;lakea i gale e hurika bakovi a ngatavine ri luhoitora turana maka ngatavine i mate pali e girihine ria,ia i habia ne ria.
42
Ra nuverei iea i bele dagi na hini lobo iea o Jopa,i kupo e hurika bakovi a ngatavine ri luhoitora ne Viridagi.
43
Pali e Pita i made parava kupo iea o Jopa turane Saimon,ia a bakovi ni rata varikia na kulina maka kania.