¹ Ngane i tahoka tara bakovi i made na tanga dagi iea o Sisaria,rana e Konilias ia tara bakovi i muga na nugu maheto i ala 100 na ami na tanga dagi o Itai. ² Ia bakovi i vasileki bala ne Deo na ruma vona turane hurika tara lobo ri made turana.Ia i habi bala moni i kupo ni kori maka bakovi a ngatavine ri kapo ne virika maki ia i vasileki kunana ne Deo. ³ Tabukoi ge 3 kilok na malunga na parava,ia i mataikavea tara ensel e Deo i valai vona ia i vurena.Lakea ensel i galea,"Konilias!" ⁴ Konilias i matanono a ensel lakea i mangege hale liu lakea i ta,"Ioe ara o ngarua,bakovidagi?"Lakea a ensel i taki maea ia,"Maka ni vasileki vomu turana maki kamumu ioe o habi ne hurika bakovi ri uka maki,i lakea na hunu pali e Deo i luhoi maka naro kamumu ioe o rata. ⁵ Ngane rudu ranga bakovi ge lakea na tanga dagi iea o Jopa ge bolea tara bakovi a rana e Saimon erei a rana tara e Pita. ⁶ Ia i made turana tara bakovi a rana e Saimon,ia a bakovi ni rata maka maki na kulina kania a ruma vona i pesi tabukoi na dari." ⁷ Tahuna a ensel erei i ta turana i pea i vano,Konilias i gale valai a voravora vona i rua tara nugu maheto i kara ni vasileki na palane hurika tara i kara ni rata leho vona. ⁸ Konilias i taki ria na ara maki i bele i rudu ria ri lakea o Jopa. ⁹ Ngane na parava tara i papote ge 12 kilok,tahuna ri lakea na dala i papote rigi bele na tanga dagi,Pali e Pita i rike polomeli na ruma ge vasileki. ¹⁰ Muri i hataki ni vitolo i ngaru ni kani,pali lakea maka bakovi ri tabana ni kuku a maki ni kani, lakea e Pita ri vurena, ¹¹ Ia i masia hunu i mataka i masia maki tara i manga varikia dagi i puru valai na malala,i tahoka kona vona i va. ¹² Pololilo na varikia i tahoka maka kania i matalege lae ranga ri laho na vahane ri i va ranga ri karaka na tamudine ria maka kadirivo ri bebe polomeli. ¹³ Muri vona tara i galea,"Pita,pesirike o rabalaki maka kania o kani." ¹⁴ Pali e Pita i takia,"Viridagi,uka liu,na rana iau kama ga kani tara maki i hale i katoki." ¹⁵ Pali ra nigale iea i valai bloko rua vona i ta maea:"Ara maki e Deo i ratea i bele i matapado,ioe nahani ta maea i hale i katoki." ¹⁶ Ra hini nga i bele bloko tolu tabu.Muri ra varikia iea i hamule laviriri na hunu. ¹⁷ Ngane na tahuna re Pita i luhoi lege lae vona ra vuhuna hini ia i vurena,lakea maka bakovi i rudu ria e Konilias ri pesi na ni hebi.Ri nanea na dala i valai i bele na ruma. ¹⁸ Ri gale ri nana pali re Saimon erei a rana tara e Pita,ia i made vonga. ¹⁹ Tahuna e Pita i tabana ni luhoi ra vurena,Spirit i taki maea ia,"Masia,a bakovi i ala tolu to matakanoe. ²⁰ Pesirike o puru o vano turane tou.Nahani marikoi ni muri ne tou,na rana iau a rudu tou to valai." ²¹ Lakea e Pita i puru na maka bakovi nga i taki tou,"Iau ra bakovi iea mu matakanea.Navai mu valai?" ²² Ria ri ta,"Tara ofisa na nugu maheto a rana e Konilias,ia tara bakovi malamala erei i vasileki ne Deo turane hurika bakovi a ngatavine iea o Juda ri rata nuverei vona,ra bakovi iea a ensel Kiripiripi ne Deo i haba ngava vona ia i rudu mia mi valai ni bole ioe ni lakea na ruma vona ia i ngaru ni longo a ngava i valai ne vomu." ²³ Lakea e Pita i bole ria dili na ruma lakea ri made turana.Na hetelanga tara ia i pesirike i vano turane ria,ranga e hurika turamu iea o Jopa ri vano turana. ²⁴ Na parava tara ri bele ia o Sisaria.Konilias i dava ria;Ia i kalipopo e hurika kabu vona turane huriki ri made tabukoi vona. ²⁵ Tahuna e Pita i dili pololilo na ruma,Konilias i lakea ru vakorokoro ge pasike puru ge vasileki ne Pita. ²⁶ Lakea e Pita i turari rikea limana i ta maea,"Pesi!Iau a bakovi a manga kunana ioe." ²⁷ Tahuna e Pita i leho ni ta turana,ia i dili pololilo na ruma i matai i kupo e hurika bakovi a ngatavine ri vapopo. ²⁸ Lakea i taki maea ria,"Mua kunana mu lohoka vona lo na maka Juda ri taki uka na viri ge made tabukoi ge matai e hurika tara na tabekena tanga ranga.Pali e Deo i vakasiri iau maea nahani taki tara bakovi ge hale o ge katoki. ²⁹ Na vuhuna hini nga iau a valai ne mua,iau kama tapula vona hini mu vakaru a ngava ne nau.Lakea ngane iau a nana mua na rana mu vakaru a ngava ne nau." ³⁰ Konilias i ta,"Parava i tolu i vano pali,palupu manga parava,iau a leho ni vasileki na ruma nau na 3 kilok na malunga,lakea iau a masia tara bakovi turana varikia i para hateka i pesi na matagu. ³¹ Lakea ia i ta maea,"Konilias,Deo i longo maka ni vasileki turana maka presen ioe o habi na maka matasia,Deo i luhoi maka maki ioe o rata. ³² Pali o rudu ranga bakovi rigi lakea o Jopa rigi nana vona tara bakovi a rana e Saimon a rana tara e Pita.Ia i made na ruma na bakovi tara i rata maka maki na kulina maka kania a rana e Saimon ia i made na dari.' ³³ Lakea i laviriri hateka iau a rudu maka bakovi rigi bole valai ioe.Kamumu hateka hini o valai.Ngane,mia lobo mi pesi na matane Deo,ni longo maka ngava e Viridagi i habi vomu go taki mia." ³⁴ Muri e Pita i ta tala i ta maea,"Muholi hateka,Deo kama ge lakea kunana na tabeke i taku ne hurika bakovi a ngatavine. ³⁵ Pali na maka bakovi a ngatavine na malala erei i vasileki i rata naro kamumu,pali ra bakovi iea i ngarua e Deo. ³⁶ Mua mu lohoka vona ngava i vakaru vilia na maka bakovi a ngatavine iea o Israel,tahuna ia i takitala velenga kamumu ni tamudi puruma ne Isu Kristo,erei ia Viridagi na maka bakovi a ngatavine. ³⁷ Mua kunana mu lohoka vona maka ,maki dagi i bele,i bele na hini lobo iea o Judia,i tubu iea o Galili.Ra maka maki nga ri bele muri ne Jon i haba baptais lakea i takitala, ³⁸ maka maki bari bele ne Isu o Nasaret,na ara dala e Deo i gamai e Isu turana Hanu Kiripiripi turana ni tora.Ia i rata naro kamumu i vakamahuri a gilanga ne hurika bakovi a ngatavine erei e Satan i ratahale, ³⁹ Mia mi matai mi lohoka vona ra maka maki i rata e Isu,pololilo na tanga dagi iea o Juda pololilo o Jerusalem.Ri rabalakia na dala ni vaka tavorea na kai tavalavala, ⁴⁰ pali e Deo i vaka mahuri ia na ni mate na parava i tolu ia i rata maea bara ri matai a hini nga, ⁴¹ Kama e huriki lobo ri masia,pali erei ri masia ri lohoka maea e Deo kunana i pasia hosi ne huriki erei ri kani ri ninu turana ne vona i mahuri mule na ni mate. ⁴² Ia i haba ngava ne mia ni vaka longo maka bakovi a ngatavine nigi taki ria maea e Deo kunana viri pasia ge bele manga bakovi ni luhoikado maka bakovi a ngatavine ri made mahuri turane hurika bakovi a ngatavine ri mate pali. ⁴³ Maka profet ri rata virika ngava ne vona kunana,mavonga erei a bakovi i luhoitora ne vona,Deo bari puga voroki maka sin vona na rane Isu." ⁴⁴ Tahuna e Pita i rata ngava na maka maki nga,Hanu Kiripiripi i puru ne hurika bakovi a ngatavine erei ri longo a ngava ia i rata. ⁴⁵ Hurika bakovi a ngatavine erei ri luhoitora ni pala kuli,maka tara ri valai turane Pita ri turutu hale,na rana ri matai a presen na Hanu Kiripiripi i vonu na tara kama ria Juda. ⁴⁶ Na rana ri longo e hurika tara kama ria Juda ri rata ngava na kavunanga ranga ri kavurikea rane Deo.Pali e Pita,i kolia ngavane ria, ⁴⁷ "I kara ne hurika tara ri taki uka ne ria rigi bole a baptais?Ra tara ri bole a Hanu Kiripiripi manga mia mi bolea?" ⁴⁸ Muri ia i haba ngava ne ria ri bole a baptais pololilo na rane Isu Kristo.Muri ri nanea ge made turane ria na parava ge kupo.