¹ Kayatmi a maamoanyo, kakabsat, ti maipapan iti parabur ti Dios a naited kadagiti iglesia iti Macedonia. ² Kabayatan ti nakaro a pannakapadas iti panagrigat, ti aglaplapusanan a rag-o ken ti napalalo a kinakuraypayda ket nangipaay ti dakkel a kinabaknang iti kinamanagparabur. ³ Ta paneknekak a nangitedda iti adu kas kabaelanda, ken nalablabes pay ngem iti kabaelanda, ken iti bukodda a wayawaya ⁴ napasnekda a nagpakaasi kadakami a nangkiddaw ti gundaway a makibingay iti panagserbi kadagiti kakabsat a namati. ⁵ Saan a napasamak daytoy a kas ninamnamami, ngem ketdi intedda nga immuna dagiti bagbagida iti Apo ken kadakami babaen iti pagayatan ti Dios. ⁶ Isu a ginuyugoymi ni Tito, a nangirugin iti daytoy nga aramid, a leppasenna kadakayo daytoy a naparabur nga aramid. ⁷ Ngem naglaplapusanankayo iti amin a banbanag - iti pammati, iti panagsao, iti pannakaammo, iti amin a kinagaget, ken iti panagayatyo kadakami. Kasta met a siguraduenyo a nabungakayo iti daytoy a naparabur nga aramid. ⁸ Ibagak daytoy saan a kas maysa a bilin ngem ketdi tapno padasek ti kinapudno ti ayatyo babaen iti panangkompara iti kinagagar dagiti dadduma a tattao. ⁹ Gapu ta ammoyo ti parabur ni Apotayo a Jesu-Kristo. Numan pay nabaknang isuna, para iti pagimbaganyo ket nagbalin isuna a napanglaw, tapno babaen iti kinakurapayna ket agbalinkayo koma a nabaknang. ¹⁰ Ballakadankayo maipapan iti daytoy a banag tapno matulongannakayo. Iti napalabas a tawen, saanyo laeng a rinugian nga aramiden ti maysa a banag, ngem tinarigagayanyo nga aramiden daytoy. ¹¹ Ita, leppasenyo daytoy. Kas iti kaadda iti gagar ken tarigagay a mangaramid iti daytoy idi, leppasenyo met koma ngarud daytoy, iti amin a kabaelanyo. ¹² Ta no magagarankayo a mangaramid iti daytoy a banag, nasayaat ken nakaay-ayo daytoy a banag. Masapul a maibasar daytoy no ania ti adda iti maysa a tao, saan a no ania iti awan kenkuana. ¹³ Ta daytoy nga aramid ket saan a tapno mapaglag-anan dagiti dadduma ken dakayo ket mapadagsenan. Ngem ketdi, adda koma iti panagpapada. ¹⁴ Ti kinawadwadyo ita a tiempo ti mangipaay iti kasapulanda. Daytoy ket, tapno ti kinawadwadda met ti mangipaay iti kasapulanyo, tapno adda iti panagpapada. ¹⁵ Daytoy ket kas iti naisurat: "Ti addaan ti ad-adu ket awan ti aniaman a nateddana, ken ti addaan iti bassit ket awan ti aniaman a nagkuranganna." ¹⁶ Ngem agyamanak iti Dios, ti nangikabil iti puso ni Tito iti isu met laeng a napasnek a panangipateg nga adda kaniak para kadakayo. ¹⁷ Ta saanna laeng nga inawat ti kiddawmi, ngem kasta pay unay ti kinapasnekna maipapan iti daytoy. Immay isuna kadakayo iti bukodna a pagayatan. ¹⁸ Imbaonmi a kaduana ti kabsat a lalaki a madaydayaw kadagiti amin nga iglesia gapu iti trabahona iti panangiwarwaragawag iti ebanghelio. ¹⁹ Saan laeng a daytoy, ngem napili pay isuna dagiti iglesia a makipagdaliasat kadakami iti panangipatungpal iti daytoy nga aramid iti kinaparabur. Daytoy ket para iti pakaitan-okan ti Apo ken iti kinaimbag a nakemmi a tumulong. ²⁰ Likliklikanmi nga adda ti siasinoman nga agreklamo maipapan kadakami maipanggep iti daytoy a naparabur a panangited nga ar-aramidenmi. ²¹ Naannadkami a mangaramid iti naimbag, saan laeng nga iti sangoanan ti Apo, ngem uray iti sangoanan dagiti tattao. ²² Mangibaon kami pay iti sabali a kabsat a lalaki kadakuada. Masansan ti panangpadasmi kenkuana, ket naammoanmi ti kinagagetna para kadagiti adu nga ar-aramid. Ad-adda pay a napaspasnek isuna ita gapu iti dakkel a kinatalgedna kadakayo. ²³ No maipanggep kenni Tito, kaduak ken padak a trabahador a maipaay kadakayo. No maipapan met kadagiti kakabsattayo a lallaki, imbaon ida dagiti iglesia. Pakaitan-okan ida ni Kristo. ²⁴ Isu nga ipakitayo kadakuada ti ayatyo, ken ipakitayo kadagiti iglesia ti rason a panagpaspasindayawmi maipapan kadakayo.