¹ Iwaksiyo ngarud ti amin a kinadakes, panangallilaw, panaginsisingpet, panagapal ken pammadpadakes. ² Kas kaipaspasngay a maladaga, nga agtarigagay iti puro a gatas a naespirituan, tapno dumakkelkayo iti pannakaisalakan babaen iti daytoy, ³ no napadasyo a naimbag iti Apo. ⁴ Umasidegkayo kenkuana nga isu a sibibiag a bato a linaksid dagiti tattao, ngem pinili ti Dios ken napateg kenkuana. ⁵ Maiyarigkayo met iti sibibiag a bato a naipatakder nga agbalin a maysa a balay a naespirituan, tapno agbalin a nasantoan a papadi a mangidaton kadagiti daton a naespirituan a makaay-ayo iti Dios babaen kenni Jesu-Kristo. ⁶ Ta kinuna ti Nasantoan a Surat, "Adtoy, mangikabilak idiay Sion ti maysa a pasuli a bato, napili ken napateg. Saanto a maibabain ti siasinoman a mamati kenkuana." ⁷ Ti pateg, ngarud, ket para kadakayo a mamati. Ngem, para kadagiti saan a mamati, "Ti bato a linaksid dagiti agipatpatakder, nagbalin daytoy nga pannakaulo iti suli" ⁸ ken, "maysa a bato a pakaitibkolan, ken dakkel a bato nga pakatnaganda." ⁹ Ngem dakayo ti napili a puli, naarian a papadi, nasantoan a nasion, tattao a kukua ti Dios, tapno iwaragawagyo dagiti nakakaskasdaaw nga aramid ti nangayab kadakayo a rummuar manipud iti kasipngetan aginggana iti nakakaskasdaaw a lawagna. ¹⁰ Ta saankay idi a tattao ti Dios, ngem tattaonakayon ita. Saankayo nga immawat iti asi, ngem ita naawatyon ti asi. ¹¹ Ay-ayatek, awagankayo a kas ganggannaet ken napagtalaw tapno liklikanyo dagiti nainlasagan a tarigagay, a manggubgubat iti kararuayo. ¹² Masapul nga addaankayo iti nasayaat a kababalin kadagiti Hentil, tapno no agsaritada iti maipanggep kadakayo kas nakaaramidda kadagiti dakes a banbanag, ket makitada dagiti nasayaat nga aramidyo ket idaydayawda iti Dios iti aldaw nga iyaayna. ¹³ Agtulnogkayo kadagiti amin nga agtuturay gapu iti Apo. Agtulnogkayo a dua iti ari kas kangatuan ¹⁴ uray dagiti gobernador a naibaon a mangdusa kadagiti agar-aramid ti kinadakes ken tapno mangidayaw kadagiti agaramid iti nasayaat. ¹⁵ Ta isu ti pagayatan ti Dios, ta babaen ti panagar-aramidyo ti nasayaat ket pagulimekenyo ti awan serserbina a panagsao dagiti maag a tattao. ¹⁶ Kas nawayawayaan a tattao, saanyo a tagikuaen ti wayawayayo a kas pangabbong iti kinadakes, ngem agbalinkayo a kas adipen ti Dios. ¹⁷ Raemenyo ti amin a tattao. Ayatenyo dagiti kakabsat. Agbutengkayo iti Dios. Dayawenyo ti ari. ¹⁸ Ad-adipen, paiturayankayo kadagiti amoyo nga addaan iti panagraem, saan laeng a dagiti nasayaat ken naanus nga amo, ngem kasta met dagiti nauunget. ¹⁹ Ta makaay-ayo iti Dios no makaibtur ti siasinoman iti rigat bayat nga agsagsagaba iti pannakaidadanes gapu iti konsensiana a maiturong iti Dios. ²⁰ Ta ania ti pakaidayawan no agbasolkayo ken agibturkayo bayat a madusdusa? Ngem no nakaaramidkayo iti nasayaat ket agsagabakayo iti pannakadusa, makaay-ayo daytoy iti Dios. ²¹ Ta naayabankayo a maipaay iti daytoy, gapu ta nagsagaba met ni Kristo gapu kadakayo, a nangibati kadakayo ti ulidan tapno surotenyo dagiti dalanna. ²² Awan ti naaramidna a basol, awan ti nasarakan uray pay ania a panagulbod iti ngiwatna. ²³ Idi nainsulto isuna, saan isuna a bimmales a nanginsulto. Idi nagsagaba isuna, saan a namutbuteng, ngem intedna ti bagina iti mangukom a sililinteg. ²⁴ Inawitna mismo dagiti basbasoltayo iti bagina idiay kayo, tapno awanen ti pasettayo iti basol, ken tapno agbiagtayo para iti kinalinteg. Naagasankayo babaen kadagiti sugatna. ²⁵ Naiyaw-awankayo amin a kasla mapukpukaw a karnero, ngem nagsublikayo itan iti pastor ken mangbanbantay kadagiti kararuayo.