¹ Рубен ва Гад ўғилларининг чорвалари жуда ҳам кўп эди. Улар Йазер ва Гилъад ери чорва учун яхши жой эканини кўрдилар. ² Гад ва Рубеннинг ўғиллари Мусонинг, руҳоний Элеазарнинг ва жамоа бошлиқларининг олдиларига келиб дедилар: ³ “Атарот, Дибон, Йазер, Нимраҳ, Ҳешбон, Елеалеҳ, Себам, Небо ва Беон ерлари ⁴ яъни, Раббий Исроил жамоаси қаршисида қириб ташлаган ер чорва учун яхши, сенинг қулларингнинг эса чорвалари бор”. ⁵ Шундай қилиб, улар: “Агар биз сенинг нигоҳингда илтифот топган бўлсак, ушбу ерни ўз қулларингга мулк қилиб бер ва бизни Йордандан нарига олиб ўтма”,- дедилар. ⁶ Мусо Гад ва Рубеннинг ўғилларига деди: “Сизнинг биродарларингиз урушга борадилар, сизлар эса шу ерда қоласизларми? ⁷ Нима учун сизлар Исроил ўғилларининг юракларини Раббий уларга бераётган ерга боришдан қайтармоқдасизлар? ⁸ Сизларнинг оталарингиз ҳам мен уларни ерни кўздан кечириб келиш учун Қадеш-Барнеаҳга юборганимда, шундай қилган эдилар. ⁹ Улар Эшкол водийсига етиб бориб, ерни кўрганларида, Исроил ўғиллари Раббий уларга бераётган ерга бормасликлари учун уларнинг юракларига ваҳима солдилар. ¹⁰ Ўша куни Раббийнинг ғазаби алангаланди ва У шундай, деб қасам ичди: ¹¹ Мисрдан чиққан, йигирма ёш ва ундан юқори бўлган ушбу одамлар эса Мен Иброҳимга, Исҳоқ ва Ёқубга қасам ичган ерни кўрмайдилар, чунки улар Менга бўйсунмадилар. ¹² Қенизлик Йефуннеҳнинг ўғли Калеб ва Нўн ўғли Йешуа бундан мустасно, чунки улар Раббийга бўйсундилар. ¹³ Раббийнинг ғазаби Исроилга қарши алангаланди ва Раббийнинг нигоҳида ёвузлик қилган бутун авлод қирилиб кетмагунича, У уларни саҳро бўйлаб қирқ йил олиб юрди. ¹⁴ Мана, Раббий ғазабининг қаҳрини Исроилга қарата янада кучайтириш учун оталарингизнинг ўрнига сизлар, гуноҳкорларнинг авлоди кўтарилдингизлар. ¹⁵ Агар сизлар Ундан қайтсангизлар, У уни саҳрода яна узоқ муддат қолдиради ва сизлар ушбу бутун халқни ҳалок қиласизлар”. ¹⁶ Улар унинг олдига келиб дедилар: “Биз бу ерда подаларимиз учун қўй қўтонлари ва болаларимиз учун шаҳарлар қурамиз. ¹⁷ Ўзимиз эса, тезда қуролланиб, уларни ўзларининг ерига олиб бормагунимизча Исроил ўғиллари олдидан борамиз. Бизнинг болаларимиз эса, ернинг аҳолисидан ҳимояланиши учун мустаҳкамланган шаҳарларда қолишсин. ¹⁸ Исроил ўғилларининг ҳар бири ўз улушини қўлга киритмагунича, биз уйларимизга қайтмаймиз. ¹⁹ Зеро биз Йорданнинг нариги томонидан ва узоқроғидан улар билан бирга улуш олмаймиз, чунки шарқда, Йорданнинг бу томонидан бизга улуш бўлади”. ²⁰ Мусо уларга деди: “Агар сизлар шундай қилсангизлар, агар сизлар қуролланиб, Раббийнинг олдида урушга борсангизлар, ²¹ Раббий Ўзининг душманларини Ўзининг қаршисидан қириб ташламагунича, сизларнинг ҳар бирингиз қуролланиб, Йорданнинг нариги томонида Раббийнинг олдида борсангизлар ²² ва ер Раббийнинг қаршисида забт этилса, ўшандан сўнг ортга қайтсангизлар, Раббийнинг қаршисида ҳам, Исроилнинг қаршисида ҳам айбдор бўлмайсизлар. Шунда бу ер Раббийнинг қаршисида сизларнинг мулкингиз бўлади. ²³ Бироқ агарда шундай қилмасангизлар, унда Раббийнинг қаршисида гуноҳ қилган бўласизлар ва гуноҳингиз учун сизларнинг бошингизга тушадиган жазони бошдан кечирасизлар. ²⁴ Болаларингиз учун шаҳарлар, қўйларингиз учун қўтонлар қуринглар ва оғизларингиз айтган ишларни бажаринглар”. ²⁵ Гад ва Рубеннинг ўғиллари Мусога дедилар: “Сенинг қулларинг хўжайинимиз айтганидек қилади. ²⁶ Бизнинг болаларимиз, хотинларимиз, подаларимиз, барча чорвамиз шу ерда, Гилъаднинг шаҳарларида қоладилар. ²⁷ Сенинг қулларингнинг барчаси эса жангчилар каби қуролланиб, хўжайинимиз айтганидек, Раббийнинг қаршисида урушга борадилар”. ²⁸ Шундай қилиб, Мусо улар ҳақида руҳоний Элеазарга, Нўн ўғли Йешуага ҳамда Исроил ўғилларининг қабилабошиларига амр бериб, ²⁹ шундай деди: “Гад ва Рубеннинг ўғилларининг ҳар бири урушга қуролланиб, Раббийнинг қаршисида сизлар билан Йордандан ўтса ва ер сизларнинг қаршингизда забт этилса, унда уларга Гилъад ерини мулк қилиб беринглар. ³⁰ Бироқ агарда улар қуролланиб сизлар билан Йордандан ўтмаса, унда улар сизлар билан бирга Канъан еридан улуш оладилар”. ³¹ Гад ва Рубеннинг ўғиллари жавоб бериб, дедилар: “Раббий ўз қулларига қандай буюрган бўлса, худди шундай қиламиз. ³² Биз қуролланиб, Раббийнинг олдида Канъан ерига борамиз, бизнинг мулк улушимиз эса Йорданнинг бу томонидан бўлсин”. ³³ Мусо уларга: “Гад ўғилларига, Рубен ўғилларига ва Юсуфнинг ўғли Манашеҳ қабиласининг ярмига амўрликлар подшоҳи Сихоннинг шоҳлигини, Башан подшоҳи Огнинг шоҳлигини, ернинг шаҳарларини чегаралари билан, бу ернинг шаҳарларини атрофидаги ерлари билан бирга берди”. ³⁴ Шунда Гаднинг ўғиллари Дибонни, Атаротни, Ароэрни, ³⁵ Атрот-Шофанни, Йазерни, Йогбеҳаҳни, ³⁶ Бейт-Нимраҳни, Бейт-Ҳаранни, мустаҳкам шаҳарларни ҳамда қўйлар учун қўтонларни қурдилар. ³⁷ Рубеннинг ўғиллари эса Ҳешбонни, Элеалеҳни, Қиръатаимни, ³⁸ Небони, Баал-Меонни, Шибмаҳни қурдилар ва ўзлари қурган шаҳарларга номлар бердилар. ³⁹ Манашеҳнинг ўғли бўлмиш Махир ўғиллари эса Гилъадга келиб, уни қўлга олдилар ва у ерда бўлган амўрликларни қувиб юбордилар. ⁴⁰ Мусо Гилъадни Манашеҳнинг ўғли Махирга берди ва у шу ерда жойлашди. ⁴¹ Манашеҳнинг ўғли Йаир бориб, уларнинг қишлоқларини ҳам олди ва уларни “Йаир қишлоқлари”, деб атади. ⁴² Нобаҳ ҳам бориб, Кенатни ҳамда унга қарам бўлган қишлоқларни олиб, уни ўзининг исми билан “Нобаҳ”, деб атади.