¹ God i tingim Noa na ol wel animol na ol samting i gat laip i stap long sip. God i mekim win i ron antap long graun na wara i stat long go daun. ² Na wara aninit long graun wantaim windua bilong heven i pas na ren i no pundaun moa. ³ Na tait i wok long i go daun isi isi long graun na bihain long 150 dei, wara i pinis olgeta. ⁴ Na long de namba 17 bilong 7 mun, sip i pas long maunten Ararat. ⁵ Wara i go daun yet i nap long namba 10 mun. Long namba wan dei bilong dispela mun, ol het bilong maunten i kamap ples klia. ⁶ Bihain long 40dei, Noa i opim windua bilong sip em i wokim. ⁷ Na em lusim kotkot i go raun na kam na mekim olsem yet inap wara i go daun na graun em i drai. ⁸ Bihain Noa i salim gen narapela pisin ol i kolim balus long save wara i go daun o nogat, ⁹ Tasol wara i stap yet na nogat ples bilong pisin i sindaun, olsem na pisin i flai i kam bek gen. Noa i putim han i go na kisim pisin i go insait long sip. ¹⁰ Orait Noa i stap 7-pela dei moa na em i salim balus pisin i go gen. ¹¹ Na long avinun pisin i kam wantaim lip bilong diwai oliv long maus bilong en. Olsem na Noa i save wara i go daun pinis. ¹² Na em i weit 7-pela dei moa na salim balus i go. Tasol balus i no i kam bek moa. ¹³ Noa i stap olsem 601 yia. Long dei namba wan bilong namba wan mun bilong dispela yia, graun i drai. Noa i rausim het karamap bilong sip na lukim graun i drai olgeta. ¹⁴ Long dei 27 bilong namba 2mun, graun i drai olgeta. ¹⁵ Orait God i tokim Noa olsem, ¹⁶ "Yu lusim sip na yu kisim meri bilong yu na ol pikinini bilong yu na ol meri bilong ol pikinini bilong yu na i go autsait. ¹⁷ Yu kisim olgeta kain animol i gat laip- ol pisin, ol abus animol bilong kaikai na animol i save wokabaut long graun bai ol i ken karim pikinini na pulumapim ples graun." ¹⁸ Orait Noa wantaim ol pikinini na meri bilong en na ol meri tambu bilong ol pikinini bilong en i lusim sip. ¹⁹ Olgeta animol i gat laip na ol animol i save wokabaut long graun na olgeta kain pisin i save flai ol i go autsait na ol animol i bung wantaim i bihainim wankain lain bilong ol yet na ol i lusim sip. ²⁰ Noa i wokim alta bilong givim ofa i go long God Yawe. Em i kisim sampela ol klinpela animol na sampela ol klinpela pisin na givim olsem ofa long God. Na mekim gutpela smel. ²¹ God Yawe em i amamas long bel bilong em na i tok, "Mi no ken bagarapim olgeta samting long graun gen long bikhet pasin bilong man. Maski, pasin bilong ol man i pulap long sin long taim ol i kamap pikinini, mi no inap bagarapim olgeta samting i gat laip long dispela graun gen olsem mi mekim. ²² Taim graun i stap, bai i gat taim bilong planim, taim bilong kamautim, taim bilong kol, taim bilong hot, taim bilong san, taim bilong win na dei na nait bai i no inap senis."