¹ God Yawe i tingim Sera long wanem tok em i bin tokim em na God Yawe i mekim olsem long inapim tok promis. ² Sera i gat bel na i karim pikinini man, long dispela taim Abraham i lapun pinis, long inapim taim God i bin tokim em. ³ Abraham i gat pikinini man na i kolim nem bilong em Aisak, long taim Sera i karim em. ⁴ Abraham i katim skin bilong Aisak long taim em i 8-pela dei tasol, olsem God i bin tokim em. ⁵ Abraham i gat 100 yia taim em i gat pikinini man Aisak. ⁶ Sera i tok, "God i mekim mi lap na husat i harim dispela stori tu ol tu ken lap wantaim mi." ⁷ Sera i tok moa olsem, "Husat i ken tokim Abraham olsem mi inap long karim pikinini longtaim, tasol nau mi i gat pikinini long taim mi i kamap lapun!" ⁸ Long taim Aisak i kamap bikpela boi na em i lusim susu, Abraham i mekim bikpela kaikai long taim em i lusim susu bilong mama. ⁹ Na taim Sera i lukim pikinini man bilong Hagai, em i bin karim wantaim Abraham, olsem na em i mekim kain kain tok bilas long em. ¹⁰ Na Sera i tokim Abraham, "Rausim Hagai na pikinini man bilong em long wanem, Sera i ting olsem nogut Ismael bai kisim ol samting bilong Aisak." ¹¹ Olsem na Abraham i wari tru long pikinini man bilong em. ¹² Tasol God i tokim Abraham olsem, "Yu no ken wari tumas long pikinini man na mama bilong em. Harim tok bilong Sera long wanem olgeta samting bai kamap, long inapim tok bilong God i tok olsem. Long Aisak planti pikinini bai kamapim pikinini long nem bilong yu. ¹³ Na mi bai mekim wankain olsem tu long pikinini bilong wok meri bilong yu long kamapim planti manmeri, long wanem em pikinini bilong yu tu." ¹⁴ Long monin taim tru Abraham i kirap na redim bret na pulapim wara, insait long skin bilong meme na putim long solda bilong Hagai. Na givim Ismael long em na tupela i go. Tupela i wokabaut long drai ples i go kamap long ples Biaseba. ¹⁵ Taim wara i pinis insait long skin meme, Haga i lusim Ismael arere long bus na i go i stap longwe liklik long Ismael, long wanem em i les long lukim Ismael bai dai. ¹⁶ Na taim em i givim baksait long Ismael, em i singaut strong tru na krai. ¹⁷ God i harim krai bilong Ismael na i salim ensel i kam tokim Hagai olsem, "Wanem samting i givim hevi long yu, Hagai? Yu noken pret, God i harim pinis nek bilong Ismael long wanem hap em i stap. ¹⁸ Kirap, kisim em na strongim em, bai mi mekim wanpela strongpela taun antap long em." ¹⁹ Nau God i opim ai bilong Hagai na em i lukim wanpela hul wara. Na em i go na pulumapim insait long skin meme na givim long Ismael long em bai i dring. ²⁰ God i stap wantaim pikinini na em i kamap bikpela na em i stap long bik bus na em i kamap man bilong sut long bunara. ²¹ Em i stap long bikbus bilong Paran na mama bilong em i kisim wanpela meri bilong ples Isip na em i maritim em. ²² Nau i kam long wanpela taim Abimelek na Pikol, tupela kepten bilong ami i kam tokim Abraham olsem, "God i stap wantaim yu long olgeta wok yu mekim. ²³ Olsem na yu no inap toktok nambaut long mi God na long ol pikinini bilong mi na ol pikinini bilong ol pikinini bilong mi. Long wanem, yu mas soim mi ol hap graun mitupela i bin wanbel na mi givim long yu." ²⁴ Na Abraham i tok, "orait." ²⁵ Abraham i toktok planti tu long ol wokboi bilong Abimelek i bin kisim bek hulwara bilong em. ²⁶ Abimelek i tok, "Mi no bin save husat i bin mekim dispela samting. Yu no laik tokim mi long taim, mi no bin harim na nau long dispela taim stret mi harim." ²⁷ Abraham i givim sipsip na bulmakau long Abimelek na tupela i mekim Kontrak. ²⁸ Olsem na Abraham i makim sevenpela sipsip meri insait long banis na putim ol long sait. ²⁹ Abimelek i askim Abraham olsem, "Wanem as tingting bilong sevenpela sipsip meri yu putim long sait?" ³⁰ Abraham i bekim tok olsem, "Dispela sevenpela sipsip meri em i mak bilong soim yu olsem mi bin dikim dispela hulwara." ³¹ Na em i kolim dispela ples Besiba, long wanem, tupela i bin mekim kontrak. ³² Tupela i mekim kontrak pinis long ples Besiba na Abimelek wantaim Pikol, dispela kepten bilong ami i lusim ples Besiba na i go bek long Filistia. ³³ Abraham i planim diwai tamarisk long ples Besiba. Na long dispela ples em i lotu long God Yawe stap oltaim oltaim. ³⁴ Abraham i stap olsem man long narapela ap longpela taim long ples bilong ol Filistia.