21

¹ Naging mabuti si Yahweh kay Sara, gaya ng kanyang sinabi na kanyang gagawin. Tinupad niya kung ano ang kanyang pinangako kay Sara, ² dahil nagbuntis si Sara at isinilang ang isang batang lalaki para kay Abraham kahit na napakatanda na nito, sa panahong pinangako ng Diyos na mangyayari ito. ³ Pinagalanan ni Abraham na “Isaac” ang batang lalaki na isinilang ni Sara. ⁴ Tinuli ni Abraham ang kanyang anak na si Isaac sa ika-walong araw ng pagkasilang nito, ayon sa iniutos ng Diyos sa kaniya. ⁵ Nasa isandaang taong gulang si Abraham nang ipanganak ang kanyang anak na si Isaac. ⁶ Sinabi ni Sara, "Kahit na malungkot ako dati dahil wala akong anak, ngayon pinatawa ako ng Diyos nang may kagalakan, at ang lahat nang makakarinig sa ginawa ng Diyos sa akin ay tiyak na tatawa rin kasama ko." ⁷ Sinabi rin niya, "Walang sinuman ang makakapagsabi kay Abraham na ako'y mag-aalaga pa ng bata, gayunpaman nabigyan ko pa rin ng anak na lalaki si Abraham kahit na siya ay napakatanda na!"

⁸ Lumaki ang bata. Dumating ang panahon na inawat ang bata sa pagsuso sa gatas ng kanyang ina. Sa araw na iyon, naghanda si Abraham ng isang malaking pista para magdiwang. ⁹ Isang araw napansin ni Sara na ang anak na lalaki ni Agar na si Ismael ay pinagtatawanan si Isaac. ¹⁰ Kaya sinabi niya kay Abraham, "Itaboy mo ang babaeng alipin na taga Ehipto at ang kanyang anak na lalaki! Hindi ako papayag na makuha ng anak ng babaeng alipin na iyan ang mamanahin ng anak kong si Isaac." ¹¹ Labis itong ikinalungkot ni Abraham dahil nag-aalala rin siya tungkol kay Ismael na kanyang anak. ¹² Ngunit sinabi ng Diyos kay Abraham, "Huwag kang malungkot tungkol sa iyong anak, na si Ismael, at tungkol sa iyong lingkod na si Agar. Pakinggan mo ang lahat ng sasabihin ni Sara na iyong gagawin, at gawin mo ito, dahil si Isaac ang magiging ninuno ng mga kaapu-apuhan na pinangako kong ibibigay sa iyo. ¹³ Ngunit ang anak na lalaki ng iyong lingkod na si Agar ay magiging ninuno rin ng isang malaking lahi, dahil anak mo rin siya." ¹⁴ Kaya bumangon si Abraham ng maaga. Naghanda siya ng kaunting pagkain, nilagyan ng tubig ang isang sisidlan, at binigay niya ito kay Agar. Isinabit niya ang lalagyan ng tubig sa balikat ni Agar, ibinigay niya rin si Ismael at pinaalis niya ang mag-ina tungo sa kasukalan ng Beer-seba. ¹⁵ Nang maubos ni Agar at ng kanyang anak ang lahat ng tubig na nasa sisidlan, nilagay niya ang bata sa ilalim mababang punong kahoy. ¹⁶ Pagkatapos umalis siya at umupo sa layo ng aaubitin ng isang pana. Sinabi niya sa kanyang sarili, "Hindi ko makakayang makitang mamatay ang aking anak!" Habang nakaupo siya roon, nagsimula siyang umiyak ng malakas. ¹⁷ Kinalaunan, narinig ng Diyos ang tinig ni Ismael, kaya nagpadala siya ng isa sa kanyang mga anghel upang tawagin si Agar mula sa langit. Sinabi niya, "Agar, ano ang bumabagabag sa iyo? Huwag kang matakot, dahil narinig ng Diyos ang iyak ng bata sa kanyang kinaroroonan. ¹⁸ Tumayo ka, itayo mo ang bata at tulungan mo siyang maging matapang, dahil gagawin kong isang malaking bansa ang kanyang lipi." ¹⁹ Pagkatapos ipinakita sa kanya ng Diyos ang isang balon ng tubig. Kaya pinuntahan ni Agar ang balon at pinuno niya ng tubig ang lalagyan, at pinainom ang batang lalaki. ²⁰ Tinulungan ng Diyos ang batang lalaki habang lumalaki siya sa ilang, at siya ay naging mahusay na mangangaso. ²¹ Nanirahan siya sa ilang ng Paran. Kumuha si Agar ng asawa para sa kaniya mula sa Ehipto.

²² Sa panahong iyon, si Haring Abimelek at Ficol na pinuno ng kanyang hukbo ay kinausap si Abraham at nagsabing, "Tunay na tinutulungan ka ng Diyos sa lahat ng iyong mga ginagawa. ²³ Kaya ngayon, taimtim kang mangako sa akin dito, habang nakikinig ang Diyos, na hindi mo ako dadayain pati na ang aking mga anak, o ang aking mga kaapu-apuhan. Ipangako mong magiging tapat ka sa akin at sa lahat ng mga taong nandito sa lupain kung saan ka naninirahan. Ipangako mong magiging tapat ka sa akin gaya ng pagiging tapat ko sa iyo." ²⁴ Kaya nanumpa si Abraham na gagawin iyon. ²⁵ Nagreklamo rin si Abraham kay Abimelek patungkol sa isa sa mga balon na inagaw sa kanya ng mga lingkod ni Abimelek. ²⁶ Ngunit sinabi sa kanya ni Abimelek, "Hindi ko alam kung sino ang gumawa ng mga bagay na iyan. Hindi mo ito sinabi sa akin noon at ngayon ko lang narinig ito. ²⁷ Kaya nagdala si Abraham ng ilang mga tupa at baka at binigay ang mga ito kay Abimelek, at taimtim silang nagkasundo na magkaroon ng kapayapaan sa pagitan nilang dalawa. ²⁸ Pumunta si Abraham sa kanyang kawan at pinili niya ang pitong babaeng tupa mula rito. ²⁹ Tinanong ni Abimelek si Abraham, "Bakit mo binukod itong pitong babaeng tupa mula sa iyong kawan?" ³⁰ Sumagot si Abraham, "Nais kong tanggapin mo itong pitong babaeng tupa mula sa akin. Sa ganitong paraan, ang aking handog para sa iyo ay maging patunay sa lahat na ang balon na ito ay akin dahil ako ang naghukay nito." ³¹ Kaya tinanggap ni Abimelek ang mga tupa. Tinawag ni Abraham ang lugar na iyon Beer-seba, na nangangahulugang 'Balon ng panunumpa,' dahil siya at si Abimelek ay sumumpa ng isang panunumpa roon upang maging mapayapa sa bawat isa. ³² Pagkatapos nilang ginawa ang kasunduan sa Beer-seba, si Abimelek at ang pinuno ng kanyang hukbo na si Ficol, ay umalis at bumalik sa lupain ng Filisteo. ³³ Nagtanim si Abraham doon ng isang punong kahoy na tamarisko at doon sinamba niya si Yahweh ang Diyos ng walang hanggan. ³⁴ Nanatili si Abraham bilang isang dayuhan sa lupain ng Filisteo sa mahabang panahon.