¹ trus, Yakub panggil de pu anak smua deng de bilang, “Sa pu anak-anak, kam kumpul kemari. Sa mo bilang buat kam yang nanti akan terjadi sama kam di masa depan. ² ‘Hai Yakub pu anak-anak, kumpul suda. Mari dengar Israel, kam bapa .’” ³ “Ruben, sa pu anak pertama, ko itu sa pu kekuatan, buah pertama dari sa pu kegagahan. Ko su yang paling terhormat deng yang berkuasa dari sa anak smua. ⁴ Tapi, ko pu nafsu itu s'perti air bah yang tra bisa ko tahan. Jadi, ko tra akan tetap jadi sa pu anak yang paling terhormat. Ko naik ke ko pu bapa tempat tidur baru tidur deng de maitua lain. Ko bawa aib ke sa tempat tidur, tempat tidur yang ko tidur.” ⁵ “Simeon deng Lewi itu ade kaka. Senjata kekejaman ada di tempat yang dong tinggal. ⁶ Sa tra akan gabung deng dong pu pertemuan rahasia. sa tra akan ambil bagian dalam dong rencana yang jahat. Dalam marah, dong su bunuh orang, deng dong potong binatang hanya untuk dong senang-senang. ⁷ Terkutuklah dong pu amarah karna dong amarah besar. Terkutuklah dong murka karna dong murka kejam. Sa mau kase pisa-pisa dong dari antara anak-anak Yakub. Sa akan kasi bagi-bagi dong di antara anak-anak Israel.” ⁸ “Yehuda, ko pu sodara-sodara akan puji ko. Ko pu tangan nanti pegang kuat ko pu musuh-musuh pu leher. Ko pu sodara-sodara nanti tunduk sama ko. ⁹ Yehuda sperti singa muda. Sa pu anak, ko sperti singa yang berdiri di atas de pu hasil tangkapan. S'perti singa, Yehuda tidur untuk istirahat, deng t'rada yang b'rani ganggu de ¹⁰ Tongkat kekuasaan tra akan pinda dari Yehuda. Lambang pemerintahan tra akan pinda dari de kaki, sampe de yang berhak atas pemerintahan itu datang. Ke de suda smua bangsa nanti tunduk. ¹¹ Yehuda ikat de pu anak kuda ke pohon anggur deng de pu keledai di pohon anggur yang terbaik. de cuci de pu baju deng de pu jubah dalam air anggur yang terbaik. ¹² De mata merah kar'na minum anggur. De gigi putih kar'na minum susu." ¹³ “Zebulon nanti hidup di dekat laut. De pesisir jadi tempat yang aman untuk kapal-kapal. De Tanah akan baku batas sampe Kota Sidon.” ¹⁴ “Isakhar s'perti keledai kuat, yang tidur di antara de pu alas duduk diatas kuda. ¹⁵ waktu de lihat tempat istirahat yang baik deng tanah itu de senang, de kasi tunduk de pu bahu untuk gendong beban berat; deng jadi budak dalam kerja paksa.” ¹⁶ “Dan akan hakimi de umat jadi salah satu dari suku-suku Israel. ¹⁷ Dan nanti s'perti ular di pinggir jalan. De nanti s'perti ular bisa di jalan setapak, yang gigit kaki kuda, sampe de pu orang di kuda jatuh ke belakang. ¹⁸ TUHAN, sa tunggu kes'lamatan dari Ko.” ¹⁹ “Gad nanti dapa serang dari kelompok perampok, tapi de nanti serang dong pu tumit." ²⁰ “Tanah Asyer akan kasi tumbu makanan yang baik. de akan pu makanan yang cocok untuk seorang raja.” ²¹ “Naftali s'perti satu ekor rusa yang talepas, yang kasi lahir ana-ana yang bagus. ²² “Yusuf adalah s'perti pohon anggur yang subur, pohon anggur yang subur di dekat mata air, yang de pu cabang-cabang panjat dinding. ²³ Tukang panah dong serang deng babi buta, dong panah deng kasi kaco de. ²⁴ Tapi, busur Yusuf tetap kuat, deng de lengan kuat. de kekuatan berasal dari Yang Mahakuasa, pelindung Yakub, karna Sang Gembala adalah Batu Karang Israel. ²⁵ Semoga Allah dari ko bapa mau tolong ko. Semoga Allah Yang Mahakuasa berkati ko. Semoga De berkati ko deng hujan dari langit atas, deng sumber air dari bawa bumi, deng berkat buah susu dan rahim. ²⁶ Ko pu Nene moyang dapa berkati deng banyak hal baik. tapi sa, ko bapa, justru lebih dapa berkati lagi. Kiranya s'mua berkat itu turun ke atas Yusuf pu kepala deng ke atas mahkota dari de pu kepala yang teristimewa dari antara de sodara-sodara.” ²⁷ “Benyamin s'perti serigala yang lapar. Pagi hari, de bunuh de mangsa. Waktu malam hari, de bagi-bagi de pu rampasan.” ²⁸ Itulah kedua belas suku Israel. Deng itu yang Israel bilang waktu berkati dong. De berkati dong masing-masing deng berkat yang sesuai untuk dong. ²⁹ Trus, Israel kasi perintah ke dong, de bilang, “Kalo Sa mati, Sa mau bersama sa pu umat. Sa mo dapa kasi kubur deng sa nene moyang dalam gua di ladang Efron orang Het itu. ³⁰ Gua itu ada di ladang Makhpela dekat Mamre, di tanah Kanaan. Abraham beli ladang itu dari Efron supaya de punya tempat kuburan. ³¹ Abraham deng Sara, de pu maitua, dapa kubur dalam gua itu. Ishak deng Ribka, de maitua dapa kubur dalam gua itu. sa juga kubur Lea, sa pu maitua dalam gua itu. ³² Gua itu ada di ladang yang dapa beli dari orang-orang Het.” ³³ Trus Yakub selesai bicara sama de pu anak-anak, de tidur, de taru de pu kaki kembali ke tempat tidur, trus mati.