¹ Idi lakayen ni Isaac, nganngani saanen a makakita isuna. Iti maysa nga aldaw, pinaayabanna ni Esau nga inauna a putotna ket kinunana kenkuana, "Anakko?" Insungbatna, "Adtoyak!" ² Kinuna ni Isaac, "Dumngegka kaniak. Lakayak unayen, ket saanko nga ammo no kaano ti ipapatayko. ³ Isu nga ita, alaem ti baim ken ti pagikkam a napnoan kadagiti pana ket mapanka iti tay-ak, ket aganupka ti atap nga ayup para kaniak. ⁴ Mangpatayka iti maysa ket mangisaganaka iti kita iti nananam a karne a kayatko. Kalpasanna, iyumaymo kaniak tapno kalpasan a makanko daytoy, bendisionanka sakbay a matayak." ⁵ Dumdumngeg ni Rebecca kabayatan nga ibagbaga dayta ni Isaac iti putotna, a ni Esau. Isu nga idi pimmanaw ni Esau tapno mapan aganup, ⁶ imbaga ni Rebecca iti anakna, a ni Jacob, "Dumngegka kaniak. Nanggegko ti amam a makitungtungtong iti kabsatmo, a ni Esau, kunana, ⁷ 'Mapanka aganup iti atap nga ayup ket isangpetmo ditoy, ket isaganam ti karne iti nananam a wagas, tapno kanek. Kalpasanna, bendisionanka iti imatang ni Yahweh sakbay a matayak.' ⁸ Isu nga ita, anakko, tungpalem ti ibagak kenka. ⁹ Mapanka idiay ayan ti arban ket mangpatayka iti dua a napintas ken kaub-ubinganna a kalding ket iyegmo kaniak ti karnena. Kalpasanna ket mangisaganaak iti sumagmamano a nananam a taraon para iti amam, iti wagas a kayatna. ¹⁰ Kalpasanna ket alaem daytoy para iti amam, tapno kanenna, ket iti kasta, bendisionnannaka sakbay a matay." ¹¹ Ngem kinuna ni Jacob iti inana a ni Rebecca, "Barbunan amin a bagi ti kabsatko a ni Esau, ket ti kudilko ket saan a kasla iti dayta! ¹² Anianto ti mapasamak no arikapennak ti amak? Maamirisnanto nga al-allilawek isuna, ket mangyegak iti lunod iti bagik a saan ket a bendision!" ¹³ Kinuna ti inana kenkuana, "No mapasamak dayta, anakko, bay-am a siak ti mailunod. Aramidem ti ibagbagak kenka. Mapanka ket alaem dagiti kalding para kaniak!" ¹⁴ Napan ngarud ni Jacob ket nangpatay iti dua a kalding ket impanna dagitoy iti inana. Kalpasanna ket nangisagana ti inana iti nananam a taraon, a kas iti wagas a kaykayat ti amana. ¹⁵ Kalpasanna, innala ni Rebecca dagiti kapipintasan a kawes ti inauna nga anakna a ni Esau nga adda iti uneg ti toldana, ket insuotna dagitoy kenni Jacob nga in-inaudi nga anakna. ¹⁶ Insuotna met kadagiti imana dagiti kudil ti kalding ken iti nalamuyot a paset iti tenggedna. ¹⁷ Kalpasanna, inkabilna kadagiti ima ni Jacob dagiti tinapay ken ti nananam a taraon nga insaganana. ¹⁸ Innala ni Jacob daytoy ket napan iti amana ket kinunana, "Amak!" Insungbat ni Isaac, "Adtoyak; siasinoka kadagiti putotko?" ¹⁹ Kinuna ni Jacob iti amana, "Siak ni Esau, ti inauna a putotmo. Inaramidko ti imbagam kaniak nga aramidek. Agtugawka ket manganka iti naluto a karne iti kasta ket mabendisionannak." ²⁰ Ngem sinaludsod ni Isaac iti putotna, "Anakko, nagpartakka man a nakaanup ken nangpatay iti ayup?" Insungbat ni Jacob, "Gapu ta ni Yahweh, a pagrukrukbabam ti nangted iti kabaelak tapno agballigiak." ²¹ Kinuna ni Isaac kenni Jacob, "Umasidegka kaniak, anakko, tapno maarikapka ken maammoak no sika a pudno ti anakko a ni Esau." ²² Immasideg ngarud ni Jacob iti amana. Inarikap ni Isaac isuna ket kinunana, "Ti timek ket timek ni Jacob, ngem ti rikna dagiti ima ket barbunan, a kasla kadagiti ima ti in-inauna a kabsatna a ni Esau." ²³ Saan a nalasin ni Isaac isuna, gapu ta bulag isuna ken gapu ta dagiti ima ni Jacob ket barbunan, a kasla kadagiti ima ti in-inauna a kabsatna a ni Esau. Nagsagana ngarud ni Isaac a mangbendision kenkuana. ²⁴ Ngem sakbayna, sinaludsod ni Isaac, "Pudno kadi a sika ni Esau nga anakko? Insungbat ni Jacob, "Wen, siak." ²⁵ Kinuna ni Isaac, "Anakko, iyegannak iti karne a linutom, tapno kanek ket kalpasanna bendisionanka." Inyegan ngarud isuna ni Jacob ket kinnanna daytoy. Inyegan met isuna ni Jacob iti arak, ket ininumna daytoy. ²⁶ Kalpasanna, kinuna ti amana a ni Isaac kenkuana, "Anakko, umayka ditoy ket agkannak." ²⁷ Immasideg ngarud ni Jacob kenkuana, ket inagkan isuna ti amana iti tengngedna. Naangot ni Isaac ti angot dagiti pagan-anay a nakasuot kenni Jacob. Kaang-angot daytoy dagiti pagan-anay ni Esau. Isu a kinunana, "Pudno, ti angot ti anakko ket kas iti angot ti talon a binendisionan ni Yahweh. ²⁸ Idawatko iti Dios a pababaenna kenka dagiti linnaaw manipud langit tapno sibuganna dagiti talonmo, paaduenna ti apitmo manipud iti daga, ken ikannaka iti napintas nga apit iti bukbukel, ken ubas a maaramid nga arak. ²⁹ Idawatko a dagiti tattao iti adu a bunggoy dagiti tattao ket pagserbiandaka ken agrukobda kenka. Idawatko nga iturayam dagiti kakabsatmo, ken kasta met nga agrukob dagiti kaputotan ti inam kenka. Dawatek nga ilunod ti Dios dagiti mangilunod kenka, ken bendisionanna dagidiay mangbendision kenka." ³⁰ Kalpasan a binendisionan ni Isaac ni Jacob, rumuaren ni Jacob iti siled nga ayan ti amana, idi nagsubli ti inauna a kabsatna, a ni Esau, manipud iti panaganupna. ³¹ Nagluto ni Esau iti nananam a karne ket inyegna daytoy iti amana. Kinunana iti amana, "Amak, pangaasim ta agtugawka ket manganka iti karne nga inlutok, tapno iti kasta ket bendisionannak!" ³² Kinuna ni Isaac nga amana kenkuana, "Siasinoka?" Insungbatna, "Siak ni Esau, ti inauna nga anakmo!" ³³ Kalpasanna ket nangrugin nga agpigerger ni Isaac iti napalalo unay. Kinunana, "Ket siasino ngarud daydiay nangyeg kaniak iti karne manipud ti ayup a naanupanna ken pinapatayna, ket kinnanko amin? Adda ditoy tattay sakbay la unay ti isasangpetmo. Binendisionak isuna, ket saanko a mabalin a babawyen dayta a bendision. ³⁴ Idi nanggeg ni Esau dagidiay a sao ti amana, nagsangit iti napigsa. Napalalo unay iti pannakapaayna. Kinunana iti amana, "Amak, bendisionannak met!" ³⁵ Ngem kinuna ti amana, "Immay ti kabsatmo, inallilawnak, ket innalana ti bendisionmo!" ³⁶ Kinuna ni Esau, "Rebbengna a ti naganna ket Jacob, gapu ta inallilawnak iti namindua a daras. Ti immuna a tiempo, innalana dagiti karbengak a kas inauna nga anak, ken ita a tiempo, innalana ti bendisionko!" Kalpasanna ket sinaludsodna, "Awan kadin ti aniaman nga imbatim a bendision para kaniak?" ³⁷ Simmungbat ni Isaac ket kinunana kenni Esau, "Imbagakon nga iturayannaka ti in-inaudi a kabsatmo, ken naibagakon a pagserbianto amin isuna dagiti kakabagianna. Ken naibagakon nga ikkanto isuna ti Dios ti adu a bukbukel ken ubas a maaramid nga arak. Isu nga, anakko, ania ngay ti maaramidak para kenka?" ³⁸ Sinaludsod ni Esau ti amana, "Amak, maymaysa laeng kadi ti bendisionmo? kenkuana, "Amak, bendisionannak met koma!" Ket nagsangit ni Esau iti nakapigpigsa. ³⁹ Simmungbat ti amana a ni Isaac ket kinunana kenkuana, "Ti lugar a pagyanamto ket adayo manipud iti nadam-eg a daga ken manipud iti linnaaw nga iyeg ti Dios manipud langit tapno sibuganna dagiti kataltalonan. ⁴⁰ Agtakawkanto ken pumatayka kadagiti tattao tapno maalam no ania iti masapulmo tapno agbiagka, ken agbalinkanto a kasla adipen ti kabsatmo. Ngem no ikeddengmo a bumusorka kenkuana, mawayawayaam ti bagim manipud iti panangtengngelna kenka." ⁴¹ Gapu iti bendision nga inted ti amana kenni Jacob, ginura ni Esau ti kabsatna. Kinuna ni Esau iti bagina, "Kalpasan a matay ti amak ket malpaskami nga agladingit gapu kenkuana, papatayekto ni Jacob!" ⁴² Ngem naammoan ni Rebecca ti panpanunoten ti anakna nga inauna a ni Esau. Isunga pinaayabanna ti in-inaudi nga anakna a ni Jacob, ket kinunana kenkuana, "Dumngegka kaniak. Ti inauna a kabsatmo a ni Esau ket liwliwaenna ti bagina babaen iti panagpangpanggepna a mangpapatay kenka, tapno agibales iti panangallilawmo iti amam. ⁴³ Isunga ita, anakko, denggem a nasayaat ti ibagak kenka. Darasem ti aglibas ket mapanka makipagnaed iti kabsatko a ni Laban, idiay Haran. ⁴⁴ Makipagnaedka pay laeng kenkuana agingga a bummaawen ti unget ti in-inauna a kabsatmo. ⁴⁵ Inton malipatanna dagiti inaramidmo kenkuana, mangipatulodakto iti mensahe kenka tapno ibagak nga agsublikan manipud sadiay. No mapataynaka ni Esau, papatayento isuna ti sabali, ket aggiddankayto nga annakko a matay!" ⁴⁶ Imbaga met ni Rebecca kenni Isaac, "Dagitoy a gangannaet a babbai nga inasawa ni Esau, a kaputotan ni Het, ket pagbalbalinenda a nakaay-ay-ay ti biagko. No mangasawa met ni Jacob iti babai iti daytoy a disso, a kameng iti kaputotan ni Het, awanto ti serserbi ti biagko!"