¹ Avy eo nisy Fariseo sy mpanora-dalàgna sasasasany avy agny Jerosalema nagnato an'i Jesosy. Hoy indreo hoe: " ² nagnino gne mpianatrao mandika gne fomban-drazanè zok'olo? Fa tsy manasa gne tagnany indreo alohany gne hihina." ³ Namaly Izy ary nizaka tamindreo hoe: "nagnino ary enareo mandika gne lalàne Zagnahary nohony gne fomban-drazanareo? ⁴ Fa Zagnahary nizaka hoe: 'hajay iabanao sy iendrinao', ary 'gne nizaka ratsy tamigne rainy na gne reniny, da ho faty dato.' ⁵ Fa enareo mizaka hoe: 'ndre ia ndre ia mizaka amigne rainy na gne reniny hoe: "ndre ino ndre ino fagnapia azonareo avy aminaha da fagnomeza ho anè Zagnahary amizao,"' ⁶ izà olo izà da tsy mila magnaza gne rariny. Amizà fomba izà da nofoagnanareo gne zakane Zagnahary nohonigne tombotsoanè fomban-drazanareo. ⁷ Eh mpiatsaravelatsihy! Marigne gne faminanian'Isaia mikasiky anareo raha nizaka izy hoe: ⁸ 'ity vahoky ity da magnaza anahy amigne molotry ndreo, fa gne fondreo da lavitry anahy. ⁹ Tsy misy dikany gne fiderana anahy, satria indreo mampianatry gne didine gn'olombelo akogne fampianarandreo."' ¹⁰ Avy eo nangaiky gne vahoky ho Aminazy Izy ary nizaka tamindreo hoe: "mitenoma da mahazahoa - ¹¹ Tsy gne miditry ambavan'olo gne mandoto gn'olo. F'izy da gn'avokinè vava, gne mandoto gn'olo. ¹² Avy eo nagnato gne mpianatry ary nizaka tam'i Jesosy hoe: "izy me kô fantatrao fa nandiso fagnategna ireo Fariseo raha naharè izà zaka izà?" ¹³ Jesosy namaly danizaka hoe: "gne raha mitsiry izay tsy nambolenè Raiko agny an-dagnitry da hofoagna aby. ¹⁴ Avelay indreo ho eo, indreo da mpitariky jamba. Raha misy olo jamba raiky mitariky jamba raiky hafa, da samby ho latsaky akady izy roy." ¹⁵ Petera namaly da nizaka tam'i Jesosy hoe: "azavay aminay izà fagnohara izà." ¹⁶ Hoy Jesosy hoe: "tsy manam-pahalala vakoa me enareo?" ¹⁷ Tsy hitanao me fa gne miditry amigne vava da mandeha amigne troky ary avy eo da havoaky agny amigne kabonè? ¹⁸ Fa gne raha avôkinè vava da avy amigne fo. Io raha io gne mandoto gn'olo raiky. ¹⁹ Fa avy amigne fo no ivoahane sain-dratsy, gne vono olo, gn'atrerata, gne fangalam-badin'olo, gn'halatry, gne fijoroa vavolombelo tsy marigny, ary gne zaka ratsy. ²⁰ Ireo raha ireo no mandoto gn'olo raiky. Fa gne mihina amigne tagna tsy misasa da tsy manoto gn'olo raiky." ²¹ Avy eo Jesosy niala teo da niverigny tagny amigne faritanin'i Tyro sy Sidona. ²² Igny, nisy viavy Kananita raiky avy amizà faritry izà. Nangaiky mafy izy ary nizaka hoe: "mamindrà fo aminaha, e Tompo, Zanak'i Davida o! Gne zanako viavy da ampizalinè devoly mafy." ²³ I Jesosy tsy namaly zaka anazy. Nagnato gne mpianatriny da niangavy Taminazy, nagnano hoe: " roahy izy, fa mitabataba mafy amitsika." ²⁴ Fa Jesosy namaly ary nizaka hoe: "tsy nirà ndre ia ndre ia Iaho afa-tsy ho anign'ondry very ao amigne fianakavian'Isiraely." ²⁵ Fa da avy nangataky sy nandohaliky tagnatrehany izy, nagnano hoe: " Tompo, vojeo iaho." ²⁶ Namaly Izy da nagnano hoe: "tsy rariny raha alay gne mofon-jaza ka aria ho anign'aboa. ²⁷ Fa hoy izy hoe: "eka, Tompo, ndre gn'amboa aza mba mihina gne sisa tsilany latsaky avy amigne latabatry gne tompony." ²⁸ Da namaly Jesosy ary nizaka taminazy hoe: "raviavy, zakabe gne finoanao; ho tanteraky aminao anie izà araky gne irinao." da sitragny gne zanany viavy tam'izà lera izà. ²⁹ Niala teo Jesosy da nandeha akekigne ranomasin'ny Galilia. Avy eo da niakatry tegny amigne tendrombohitry raiky Izy da nidoboky teo. ³⁰ Vahoky maro gne nagnato Anazy. Nindesindreo niaraky tamindreo gne mandavo, gne jamba, gne moa, gne kilemay, ary gne marary hafa koa. Napetrakindreo teo amigne tombok'i Jesosy ireo; da notsaboiny. ³¹ Da gaga gne vahoky raha nahita gne moa nizaka, gne kilemay sitragny, gne malemy afaka amandeha, ary gne jamba nahita. Nankalaza gn'Andriamanitr'Israely indreo. ³² Niantso gne mpianatriny mba hagnato Anazy Jesosy ary nizaka hoe: "malahelo gne vahoky Iaho, satria efa telo andro sahady indreo gne nipetraky niaraky taminaha nefa tsy mana-sakafo. Tsy te handefa andreo tsy misakafo Iaho, fa mety ho himia egny an-dàla egny." ³³ Hoy gne mpianatry Taminazy hoe: "aia gne hahitanay mofo sahaza sy ampy gne vahoky maro be ireo aty agn'efitry?" ³⁴ Hoy Jesosy tamindreo hoe: " mofo firy gnagny aminareo?" Ary hoy indreo hoe: "fito, sy vily madiniky kidy." ³⁵ Avy eo Jesosy nandidy gne vahoky mba hidoboky amigne tany. ³⁶ Nandray gne mofo fito miaraka amigne vily Izy, ary rehefa nisaotry, da namaky gne mofo da natolotry hoanigne mianatry. Gne mpianatry gne nagnome gne vahoky. ³⁷ Nihina ary afa-po gne vahoky aby. Avy eo indreo nandagno haro zakabe fito feno gne sisa tsy lany. ³⁸ Gne nihina da efatr'arivo lahy, tsy agnatiny gne zaza miaraky vivay. ³⁹ Avy eo Jesosy nam-pody gne vahoky da niondra amigne sambo kidy ary da nandeha amigne faritr'i Magadana.