¹ Jesosy nitodiky da nahita ireo lelahy mana-karena izay nandatsaky gne fanatitry ndreo tao amigne fandatsahan-drakitry. ² Nahita pivatotry mahantra raiky nandrotsaky farantsa roy tao Izy. ³ Ka hoy Izy hoe: "zakaiko marigny aminareo, ity pivatotry mahantra ity da nandatsaky maro noho izy aby. ⁴ Ireo rehetra ireo da nagnome rakitry araky gne habenè hareny. Fa ity pivatotry ity, tamigne fahatrany, da nandatsaky gne fivelomany aby." ⁵ Raha nisy maro niresakay gne momba gne tempoly, fa voravaky vato tsara endriky sy rakitry izà, da hoy Izy hoe: ⁶ "fa gn'am'ireo raha itanareo ireo, mbola ho avy gn'andro izay tsy hisy na vato raiky hijanogny amigne hafa ka tsy ho ravay." ⁷ Da nagnotany Anazy indreo, nagnano hoe: "eh ramosè, ovia io raha io hitranga? ⁸ Jesosy namaly hoe: "mitandrema mba tsy ho vofitaky enareo. Fa maro gne hoavy amign'agnarako, hagnano hoe: 'Iaho gn'izy,' efa akeky gne fotoa.' Ka magnaraky endreo. ⁹ Rehefa mahare ady sy fikomia da kamalia enareo, da ka mihorohoro, fa io raha io da tsy maintsy hitranga aloha, fa gne farany da tsy hitranga eo no eo." ¹⁰ Ary hoy Izy tamindreo hoe: "gne firenena da hitsanga hanohitry firenena, ary fanjakà hanohitry fanjakà. Hisy horohoron-tany zakabe, ary mosary sy areti-mandavo agny amigne toera samihafa. ¹¹ Hisy tranga mampalia ary famatara zakabe avy agny an-dagnitry. ¹² Fa alohan'ireo raha aby ireo, da hisambotry anareo indreo ary hagnenjiky anareo, hanolotry anareo ao amigne synagoga sy gne figadrà, inday anareo eo alohanigne mpanjaka sy gne mpandidy nohonign'agnarako. ¹³ Izà da hagnome fahafaha ho amigne fijoroanareo vavolombelo. ¹⁴ Noho izà da manapà hevitry ao am-ponareo mba tsy hagnoma gne fiarovanareo alohanigne fotoa, ¹⁵ fa Iaho hagnome teny sy fahendrè anareo, izay tsy afaka toherina sy ho lavin'ireo mpanohitry enareo. ¹⁶ Fa enareo koa da ho atolotry gne ray aman-dreny, gne rahala, gne hava sy gne nama, ary indreo da hamono ho faty gne sasany aminareo. ¹⁷ Ho halanigne tsiraikiraiky noho ny gn'agnarako enareo. ¹⁸ Fa tsy hisy ho very ndre da vim-bolo raiky eo amigne lohanareo aza. ¹⁹ Amigne faharetanareo gne hamonjenareo gne fagnahinareo. ²⁰ Rehefa hitanareo vodidine miaramila Jerosalema, da fataro fa efa akeky gne faharavany. ²¹ Da oka ireo agny Jodia handotsitry agny amigne tendrombohitry, ary oka ireo agny amigne tegnetegnene tanà hiala, ary ary kavela hiditry ao gnagny ambanivohitry. ²² Fa ireo gn'androne valifaty, mba ho tanteraka gne raha efa vosoratry. ²³ Loza ho an'ireo minday vahoky sy ho an'ireo mampinono amin'izà andro iza! Fa hisy fohoria zakabe eo amigne tany, ary hatezera an'io vahoky io. ²⁴ Ho lavony gn'antsy lava lela indreo ary hindesy ho babo agny amigne firenena aby, ary Jerosalema da ho vohosihosin'ireo Jentilisa, mandrapa-tanteraky gn'andronè Jentilisa. ²⁵ Hisy famantara egny amigne masoandro, egny amigne vola, sy egny amigne kinta, ary an-tany etoa. Ho tratrinigne fahoria ireo firenena, hiasaloha nohony gn'eron-dranomasy sy gn'onja. ²⁶ Hisy lelahy himianigne lia sy gne fendrasa ireo raha izay ho avy an-tany etoa. Fa ho voahozongozogny gne herinigne lagnitry. ²⁷ Avy eo da ho hitandreo gne Zanak'Olo avy egny amigne rahogny miaraka amigne hery sy voninahitry zakabe. ²⁸ Fa rehefa manomboky mitranga ireo raha ireo, da mitsangàna ary hasandrato gne lohanareo, satria efa akeky gne fagnafaha anareo." ²⁹ Nagnano fagnohara tamindreo Jesosy hoe: "iteo gne hazon'aviavy sy gehazo aby. ³⁰ Rehefa magnasarogny ireo, da ho itanareo fa efa akeky gne lohatao. ³¹ Akoizà koa, rehefa hitanareo mitranga ireo raha ireo, da fantatrareo fa efa akeky gne fanjakan'Andriamanitry. ³² Zakaiko aminareo, marigny dato, ity taranaky ity da tsy ho faty mandra-pibodany gne raha io. ³³ Gne lagnitry sy gne tany da ho rava, fa gne tegnako da tsy ho rava mandrakizay. ³⁴ Fa mitandrema amigne tegnanareo, mba tsy vesarinigne vokatry gne fisotroa sy gne fahamamoa gne fonareo, sy gne fisalasalanè fiaina, ka avy eo da hihidy tampoky aminareo akoigne fandriky izà andro izà. ³⁵ Fa izà da ho ho avy amigne tsiraikiraiky izay miegny magnera-tany. ³⁷ Nandritry gn'andro da nampianatry tamigne tempoly Izy, ary tamign'ariva da nandeha nijotso teo amigne tendrombohitr'Oliva. ³⁸ Gne vahoky aby da avy vo magneno akoho mba hiteno Anazy tamigne tempoly.